11
Ngò gi, Hkrisidùq é alik châng é su, núngmòq gi, ngá é alik cháng keq.Noqkuq É Má Htàp Htuk Râ Hkyô
2 Núngmòq gi, hkyô hkangmó má ngo lé bûn nyì kô é yánmai le, núngmòq lé ngò lhai byi bê mhoqshit hkyô pé lé myhik zing nyì kô é yánmai le, ngò, núngmòq lé hkya-ôn lhê.
3 Ahkuî, ngò, núngmòq lé sê hkyâng nhâng nau é hkyô gi, yùqgè hkangmó é ulhum gi, Hkrisidùq nghut ri; myiwe hkangmó é ulhum gi, yùqgè nghut ri; Hkrisidùq é ulhum kúm gi, Garai Gasang nghut ri. 4 Yùqgè hkangmó gi, kyûdûng le nghut nghut, myìqhtoi htoî le nghut nghut, yhâng é ulhum lé nghop tô é nghut jáng, yhâng é ulhûm é xânghpoq nge wó hkyô lé lhoqhpoî pyâm é nghut bê. 5 Myiwe hkangmó gi, kyûdûng le nghut nghut, myìqhtoi htoî le nghut nghut, yhâng é ulhum lé a nghop tô é nghut jáng, yhâng é ulhûm é xânghpoq nge wó hkyô lé lhoqhpoî pyâm é nghut bê. Haû gi, yhâng é ulhum lé wùq pyâm é eq rajung za nghut ri. 6 Myiwe rayùq gi, yhâng é ulhum lé a nghop pyâm é nghut jáng, yhâng é xâm lé nyhâm pyám ra râ nghut lhê. Nghut kôlhang, xâm nyhâm pyâm é nghut nghut, xâm wùq pyâm é nghut nghut, myiwe rayùq é matú xânghpoq nge wó hkyô hpoî é nghut jáng, yhang gi, yhâng é ulhum lé nghop to ra râ nghut lhê. 7 Yùqgè gi, Garai Gasâng é azòng isâm eq hpungwup shingkang nghut é yánmai, yhâng é ulhum lé a nghop râ é nghut lhê. Myiwe kúm gi, yùqge é hpungwup shingkang nghut ri. 8 Hkâsu mù gâ le, a‑nham sânghi má, yùqgè gi, myiwe mai lo é a nghut, myiwe shèq yùqgè mai lo é ru nghut lhê.a 9 Hau htoq agó, yùqgè lé gi, myiwê é matú hpan tô é a nghut, myiwe lé shèq, yùqge é matú hpan tô é ru nghut lhê. 10 Haû nghut é yánmai le, maumang lagyô pê é yánmai le, myiwe gi, ahko ahkáng alhô agàn dông yhâng é ulhum lé nghop râ dùt lhê.
11 Nghut kôlhang, haû Yhûmsing hí má, myiwe gi, yùqgè lé nghêhkau é su, yùqgè le, myiwe lé nghêhkau é nghut lhê. 12 Hkâsu mù gâ le, myiwe gi, yùqgè mai lo é su, yùqgè le, myiwe mai hku lé é nghut lhê. Nghut kôlhang, jung hkangmó gi, Garai Gasang mai lo é nghut lhê. 13 Myiwe rayùq, ulhum a nghop é za Garai Gasang lé kyûdûng é gi, htuk kôrâ lhú? Núngmòq, yhûmsing gung é matú dòqdân yù keq. 14 Yùqgè xâm hîng tô é nghut jáng, yhâng é matú xânghpoq nge wó hkyô hpoî byùq é nghut kôle, 15 myiwe xâm hîng tô é nghut jáng, yhâng é matú hpungwup shingkang nghut é hkyô lé, htûnglî èq núngmòq lé mhoqshit lhê, a nghut kó lhú? Hkâsu mù gâ le, xâm hîng tô é gi, nghop râ zè dông yhang lé byî tô é nghut lhê. 16 Rayùq yùq, haú hkyô lé dangnyhin nyhín nau é nghut jáng, ngá-mòq chyáng le, Garai Gasâng é noqkuq hpûng pê chyáng le, gótû htûngli a jòq é nghut lhê.
Yhûmsing É Myínzang
17 Núngmòq é zùphpong pé gi, gè hkyô kut râ htoq má a-kyû a bo é hkyô je kut kô é yánmai, a‑ô má hkyô shit tô é pé má, ngò, núngmòq lé hkya-ôn é a nghut. 18 Sânghi má, noqkuq hpúng ralhum dông núngmòq zùp zîng é hkûn, núngmòq hkaû má gam hkoq hkyô jòq é lé wó gyô é nghut luî, têng é le bò râ nghû, ngò lùmjíng lhê. 19 Ô pé gi, Garai Gasang o é hkyam shut nghut é lé wó shit râ matú, núngmòq ahkaû má gam hkoq lhum hkyô jòq râ dùt lhê. 20 Núngmòq rahá zùp zing kô é hkûn, núngmòq gi, haû Yhûmsing é myínzang zô é a nghut kó. 21 Hkâsu mù gâ le, núngmòq zô é hkûn, góyùq lé le a láng é za, ó le ó hí yù zô akô. Haû mù, rayùq gi, zò-mut huî nyì, góyùq gi, shuq wùt to dùt akô nghut ri. 22 Núngmòq gi, zo jang shuq jang yhûm a wó bang nghut akô lhú? Garai Gasâng é noqkuq hpúng lé wú tiq pyám kô é eq, a wó bang lé hoq hpu nhâng kô é, nghut akô lhú? Núngmòq lé ngò hkâsu nghû taí kôrâ lhú? Haú pê é yánmai, ngò, núngmòq lé hkya-on râ lhú? Ra-tsuí lháng a wó dùt!
23 Hkâsu mù gâ le, haû Yhûmsing chyáng mai ngò wó hàp yu é gû lé, núngmòq lé lhai byi bê nghut lhê: Haû Yhûmsîng Yesuq gi, Yhang lé àp pyám huî é myìn má, mùk lé yù mù, 24 jeju hkya-ôn é htâng má, haú lé myhik hpé mù, taî é gi, “Shî gi, núngmòq é matú Ngá é gùngsho nghut lhê; Ngo lé bûn nyì râ matú, shî su kut nyî keq.” gâ ri. 25 Haû eq rajung za, myínzang bàn zô é htâng má, Yhang gi, góm lé le yù mù, “Góm shî gi, Ngá é sui mâ é dangshikaq asik nghut lhê; hkâ-nhám le, núngmòq shî shuq é hkûn, Ngo lé bûn nyì râ matú shî su kut keq.” ga taî ri. 26 Hkâsu mù gâ le, núngmòq gi, mùk shî lé zo luî, góm shî lé shuq é hkangmó, haû Yhûmsîng shî hkâm é hkyô lé, Yhang jé lé shoq, shit kyô nyì râ lhê.
27 Haû mù luî, ó yùq nghut kôle, a gíngdán é dông Yhûmsing é mùk haû lé zo mù, góm haû lé shuq é nghut jáng, haû Yhûmsing é gùngdu eq sui lé shut é mara wó bê nghut lhê. 28 Haû mù, ó yùq le, mùk zo góm shuq râ hí má, yhûmsing gùng yhûmsîng jep wú ra râ nghut lhê. 29 Hkâsu mù gâ le, ó yùq nghut kôle, haû Yhûmsing é gùngdu eq sêng é hkyô lé a sê gyô é za mùk zo góm shuq é nghut jáng, yhânggùng yhang mara zô bò shuq bo yu é nghut lhê. 30 Haû nghut é yánmai, núngmòq mâ é byù myo myo gi, wum nyhôm é, nòhpyo huî é nghut bum akô. Ra-am gi, shi ló byùq bekô nghut ri. 31 Nghut kôlhang, ngá-nhúng gi, yhûmsing gùng yhûmsîng hí sôn sê yu é nghut jáng târâ jéyáng é hui râ a nghut. 32 Ngá-nhúng gi, mingkan eq rahá, mara byî é a hui zo sháng gàq ga, ngá-nhúng lé haû Yhûmsing èq jéyáng é hkûn, ngá-nhúng gi, mhoqshit é huî nyì gù bê nghut lhê.
33 Haû mù luî, ngá é gu-mang wuì ê, núngmòq gi, zo râ nghû rahá zùp zîng é hkûn, rayùq eq rayùq láng lhum keq. 34 Núngmòq rahá zùp zîng é hkûn, jéyáng é a hui zo kó sháng gàq, rayùq yùq zò-mut é nghut jáng, yhûm má zô chûng râ lhê.
Gótû myìt tô é hkyô pé gi, ngò jé lé é hkûn shèq shit kyo râ nghut lhê.