So É Hkyô Eq Sêng É Chyûnghuq Pé
12
Gu-mang wuì ê, so é hkyô eq sêng é chyûnghuq pé lé, núngmòq a sê gyo râ lé ngò a ô nau é nghut lhê. 2 Núngmòq gi, a lùmjíng bang nghut nyî kô é hkûn lé, dang a nyo é hparà lhô noq râ matú hkyô shuî nghoq é hui kô é hkyô lé, núngmòq sê lhê. 3 Haû mù luî, “Yesuq gi, nhîng pyâm é hui sháng gàq.” ga, Garai Gasâng é Sô mai taî é byù ó yùq le a nyi é eq, haû Chyoiyúng Sô mai za a nghut jáng, “Yesuq gi, Yhûmsîng nghut lhê.” ga, ó yùq le a wó taî é nghut lhê nghû, ngò, núngmòq lé taî kyô é nghut lhê.4 So é hkyô eq sêng é chyûnghuq ajung jung jòq lhê; nghut kôlhang, Chyoiyúng Sô mai chyat nghut lhê. 5 Dójaú é hkyô ajung jung jòq lhê; nghut kôlhang, Yhûmsîng rayùq lé za dójaú é nghut lhê. 6 Zui saî é hkyô ajung jung jòq lhê, nghut kôlhang, Garai Gasang yhang za, byù lhúnglhâng bang má, haú pé bànshoq lé kut é nghut lhê.
7 So é hpông shit hkyô gi, byu pê é gè hkyô matú, yùq hkangmó lé byi bê nghut ri. 8 Rayùq lé gi, Sô haû mai, hpàqchyî byéng-yá byíng é danglù byî é nghut ri; góyùq lé gi, Sô hau èq za, sumsé hpàqchyî byíng é danglù byî é nghut ri; 9 góyùq lé gi, Sô hau èq, lùmjíng myìt byî é nghut ri; dum góyùq lé gi, Sô hau èq, nò lhoqge é chyûnghuq byî é nghut ri; 10 dum, góyùq lé gi, hpungwup a-tsam pé; dum, góyùq lé gi, myìqhtoi htoî é ahkáng; dum, góyùq le gi, sô pé lé sê gam hkoq é ahkáng; dum, góyùq lé gi, làklaí dang ahú hú ge taî é ahkáng; dum, góyùq lé gi, dang haú pê é lichyúm taî sân kyô é ahkáng, byî é nghut ri. 11 Chyûnghuq haú pé bànshoq gi, Sô hau èq za kut é lòqmú chyat nghut mù, Yhang myìt hpyit é dông yùq hkangmó lé haú pé tsing gàm byî é nghut ri.
Gùngbun Myo Kôlhang, Ragùng Za
12 Gùngdu gi, gùngsho showui showang pé myo myo lé pong tô é nghut kôlhang, ragùng za nghut ri; gùngsho showui showang pé bànshoq myo myo nghut kôlhang, gùngdu ragùng za dùt tô é nghut ri. Haû eq rajung za, Hkrisidùq eq le haú dông nghut ri. 13 Hkâsu mù gâ le, ngá-nhúng bànshoq bang gi, Yudaq byù nghut nghut, Grik byù nghut nghut, jùn nghut nghut, lùt bang nghut nghut, gùngdu ralhum za dùt râ matú, Sô rayùq mai za wuìmyhup hkâm yù bê nghut luî, Sô rayùq lé za chôm shuq yû bê bang nghut lhê.
14 Haû gùngdu gi, gùngsho showui showang rabun lé za kut tô é a nghut é za, myo myo lé pong tô é nghut lhê. 15 Haû hkyî gi, “Ngò, lòq a nghut é yánmai, gùngdu eq a sêng é nghut lhê.” gâ é nghut jáng, hau é yánmai, gùngdu eq a séng wó dùt é a nghut. 16 Dum, haû nohkyap gi, “Ngò, myòqjí a nghut é yánmai, gùngdu eq a sêng é nghut lhê.” gâ é nghut jáng, hau é yánmai, gùngdu eq a séng wó dùt é a nghut. 17 Ragùng dû é gi, myòqjí za nghut é nghut jáng, gyô é hkyô gi, hká má nghut râ lhú? Ragùng dû é gi, nohkyap za nghut é nghut jáng, shôm nam é hkyô gi, hká má nghut râ lhú? 18 Nghut kôlhang, Garai Gasang gi, gùngsho showui showang hkangmó lé, Yhang dùt nhâng nau é eq rajung za, gùngdu má kut to bê nghut ri. 19 Gùngsho showui showang gi, rabun za nghut é nghut jáng, gùngdu gi, hká má nghut râ lhú? 20 Hkyak ga jáng, gùngsho showui showang pé myo kôlhang, gùngdu gi, ragùng za nghut ri.
21 Haû myòqjí gi, lòq lé, “Ngò, nang lé a ra!” nghû a ge taí. Haû ulhum gi, hkyî lé, “Ngò, nang lé a ra!” nghû a ge taí. 22 Haû za a nghut, gùngdu mâ é gùngsho showui showang pé má wum je nyhôm é su dùt é pé le, a bò a ge é chyat nghut lhê. 23 Hau htoq agó, hpau a lûm tap râ su myìt ngam é gùngsho showui showang pé lé, ngá-nhúng je hpautap râ lhê. Haû a shit é jung gùngsho pé lé, ngá-nhúng hpautap é dông rago nghop râ lhê. 24 Ngá-nhûng é wó shit é gùngsho pé kúm gi, haú hkyô a ra nghut ri. Nghut kôlhang, Garai Gasang gi, gùngdû é gùngsho showui showang pé lé pong to mù, xânghpoq nge wó hkyô nyhum é lé, je riyhang xânghpoq nge wó hkyô byi bê nghut ri. 25 Haû mù, gùngdu má gamhkuî lhûm é hkyô a bo é za, gùngsho showui showang pé ralhum eq ralhum, rajung za kut wó myìt tê byî lhum kôrâ nghut lhê. 26 Haû gùngsho showui showang ralhum jamjau huî é nghut jáng, lhum hkangmó bo jamjau râ nghut lhê. Ralhum hpautap huî é nghut jáng, lhum hkangmó bo gabú é nghut lhê.
27 Ahkuî, núngmòq gi, Hkrisidùq é gùngdu nghut kôluî, núngmòq yùq hkangmó gi, hau é gùngsho showui showang pé nghut akô. 28 Garai Gasang gi, noqkuq hpúng má, sânghi lé, lagyô pé, í lhum nghû râ má, myìqhtoî pé, sûm lhum nghû râ má, mhoqshit bang, hau htâng má, làklaí alhô agàn pé kut râ bang, nò wó lhoqgê râ chyûnghuq wó é bang lé le, góbang lé wó garúm é bang, shuî-u râ chyûnghuq wó é bang, làklaí dang ahú hú ge taî é bang lé, masàt to bê nghut ri. 29 Bànshoq bang gi, lagyô pé nghut lhê lhú? Bànshoq bang gi, myìqhtoî pé nghut lhê lhú? Bànshoq bang gi, mhoqshit bang nghut lhê lhú? Bànshoq bang gi, làklaí alhô agàn kut akô lhú? 30 Bànshoq bang gi, nò lhoqge é chyûnghuq wó é nghut lhê lhú? Bànshoq bang gi, làklaí dang ahú hú ge taî lhê lhú? Bànshoq bang gi, dang haú pê é lichyúm ge taî sân kyô lhê lhú? 31 Nghut kôlhang, núngmòq gi, je gyaú é chyûnghuq lé gyai yhang ô nau nyì keq.
Chyitdàp Myìt
Hau htoq agó, ahkuî, ngò, núngmòq lé, je gyaú dik é hkyô ralhum shit kôlé.