Isira-elaq Pê É Labaû Mai Sidìq Byî É Hkyô
10
Gu-mang wuì ê, ngò gi, dùt laî lo é hkyô lé, núngmòq lé a sé a dùt nhâng nau é nghut lhê; hí hkûn, ngá-nhûng é îchyí îwâ pé bànshoq bang gi, mhutdûm ô má nyì mù, Nhông Nè mai wó laî byìt kô é nghut lhê.a 2 Yhángmòq bànshoq bang gi, mhutdûm eq Nhông Nè má, Mosheq é chángzô pé dông baptisima hkam yu é bang chyat nghut bekô. 3 Yhángmòq bànshoq bang gi, rajung zâ é sô zang zo kô é eq, 4 rajung zâ é sô wuì shuq kô é nghut lhê; hkâsu mù gâ le, yhángmòq eq rahá nghut nyi é sô eq sêng é lùqbùm mó mai, yhángmòq shuq kô é nghut lhê; lùqbùm mó haû gi, Hkrisidùq nghut bê. 5 Nghut kôlhang, yhángmòq myo hpyang lé, Garai Gasang a nau é nghut mù, yhángmòq é gùng sôm lé yòso pé má myhîn so san kut pyâm é hui bekô nghut ri.6 Haú hkyô pé dùt htoq é gi, agè ashop hkyô má yhángmòq myìt tuî bum é su, ngá-nhúng a myìt tuî nyì râ matú ngá-nhûng é azòng dùt bê nghut ri. 7 “Byu pé gi, zùng mù, zo luî shuq luî, a lùmjíng bang kut é dông, toq mù, ye bum akô.”b ga kâ tô é eq rajung za, yhángmòq mâ é ra-am hparà noq é bang dùt byùq é su, núngmòq hkâdùt kó. 8 Yhángmòq mâ é ra-am gi, ashop é dông gùngsho zùm yàp é hkyô shut kômù, ra-nyí má za í mûn sum hkyîng yùq shi byùq é su, ashop é dông gùngsho zùm yàp é hkyô lé, ngá-nhúng gi, a ge kut shut râ nghut lhê. 9 Yhángmòq mâ é ra-am gi, haû Yhûmsîng lé chyâm luî, lhângmuì pê èq htê sat é huî bùm kô é su, haû Yhûmsîng lé, ngá-nhúng gi, a ge chyâm râ nghut lhê. 10 Yhángmòq mâ é ra-am gi, nhutlùq shô-myo kôluî, lhoqhtên é maumâng èq sat pyâm é hui kô é su, núngmòq gi, nhutlùq shô-myo hkâkut kó.
11 Yhángmòq chyáng wú yû râ azòng dông haú pé dùt htoq luî, ló htáng râ i-pyàt pé má nyì âng to bang ngá-nhûng é matú sidìq byi râ dông kâ to bê nghut ri. 12 Haû mù luî, núngmòq gi, yàp gîng nyì bê su ngàm kô é nghut jáng, a lèqbàt râ matú sidìq nyì keq! 13 Byu chyáng htoq sê é gúnglaú hkyô za núngmòq hui râ nghut lhê. Garai Gasang gi, lhumzui sû nghut lhê mù, núngmòq a wó jân é gúnglaú hkyô lé hui nhâng râ a nghut. Nghut kôlhang, núngmòq gúnglaú huî é hkûn, Yhang gi, haû lé núngmòq wó jan râ matú, hkyô htong byi râ nghut lhê.
Hparà Lhô Noq Hkyô Lé Koi Pyám Râ Hkyô
14 Haû mù luî, ngò chyitdàp é luzúm wuî ê, hparà lhô noq hkyô lé koi pyám keq. 15 Nhik gying bang lé ngò taî lhê; ngò haî taî nyi é hkyô lé núngmòq gùng myìt sôn yù keq. 16 Ngá-nhúng, jeju bûn nyi é jeju góm lé shuq é hkûn, Hkrisidùq é sui má chôm zùm bê a nghut kó lhú? Ngá-nhúng, myhik hpê é mùk lé zô é hkûn, Hkrisidùq é gùngdu má chôm zùm bê a nghut kó lhú? 17 Haî mù gâ le, mùk htung ralhum za nghut mù, ngá-nhúng gi, myo myo nghut kôle ragùng za nghut nyi lhê. Hkâsu mù gâ le, ngá-nhúng bànshoq bang gi, haû rahtung zâ é mùk lé chôm gàm zô é bang chyat nghut lhê.
18 Isira-elaq byu pê é hkyô lé myìt wú keq. Haû hkungga lé zô é bang gi, hkungga gyàp má chôm lom é bang nghut lhê, a nghut kó lhú? 19 Hparà lhô, a nghut jáng, hparà lhô lé tîng byî é hkungga gi, rajung jung nghut lhê nghû, ngò taî é lhú? 20 Haû su taî é a nghut, a lùmjíng bâng é hkungga gi, Garai Gasang lé nhông byî é a nghut, nàt gâng pé lé tîng byî é ru nghut lhê. Ngò gi, núngmòq, nàt gâng pé eq chôm zum nyì bang dùt râ lé a ô nau é nghut lhê. 21 Núngmòq gi, haû Yhûmsing é góm lé le, nàt gâng pê é góm lé le, ge shuq râ a nghut; núngmòq gi, haû Yhûmsing é zangbó má le, nàt gâng pê é zangbó má le, rahá ge bo lòm râ a nghut. 22 Ngá-nhúng gi, haû Yhûmsîng lé manôn nhâng nau é bang dùt râ a nghut kó lhú? Ngá-nhúng gi, Yhâng htoq je wúm bo é bang nghut lhê lhú?
Lùmjíng Su É Lùthkyô
23 “Jung hkangmó kut râ ahkáng wó lhê.” nghut kôlhang, jung hkangmó gi, a-kyû wó é a nghut. “Jung hkangmó kut râ ahkáng wó lhê.” nghut kôlhang, jung hkangmó gi, byù lé wó kô làm nhang é a nghut.c 24 Ó yùq le, yhûmsing é gè hkyo matú ho é a nghut é za, góbâng é gè hkyo é matú hô râ dùt lhê.
25 Sho ung gaì má ûng é haî lé le, uq-ô é myìt èq a myî gôn é za zo keq. 26 Hkâsu mù gâ le, “Myìdàm htoq eq haú má jòq é jung hkangmó gi, Yhûmsing é chyat nghut lhê.”d gâ tô ri.
27 A lùmjíng bang ra-am, núngmòq lé zang zo jì mù, núngmòq ê nau é nghut jáng, uq-ô é myìt èq a myî gôn é za, núngmòq hí má to byî é gû lé zo keq. 28 Nghut kôlhang, rayùq yùq, núngmòq lé, “Shî gi, hparà lhô lé tîng byi bê nghut lhê.” ga taî kyô é nghut jáng, núngmòq lé taî kyo su é yánmai le, myìt uq-ô é yánmai le, haú lé hkâzo kó. 29 Uq-ô é myìt haû gi, núngmòq é a nghut, góyùq uq-ô é myìt lé taí nau é ru nghut lhê. Ngá é lùthkyô lé, haî mù góyùq uq-ô é myìt èq jéyáng é huí nhang lhê lhú? 30 Ngò jeju bûn é myìt mai bo zo bo shuq yu é nghut jáng, Garai Gasang lé jeju hkya-on bê nghut é zoshuq hau é yánmai, haî mù lùmu pyâm é ngò hui râ lhú?
31 Haû mù luî, núngmòq zo kôlhang, shuq kôlhang, haî kut kôlhang, Garai Gasâng é hpungwup shingkâng é matú chyat kut keq. 32 Ngò gi, yùq hkangmó lé, hkyô hkangmó má shi-kùt luî myìt ngón nhang é eq rajung za, núngmòq gi, Yudaq byu pé lé nghut nghut, Grik byu pé lé nghut nghut, Garai Gasâng é noqkuq hpúng mâ é byù lé nghut nghut, ó yùq lé le myìt hkâ lèqbàt nhâng kó. 33 Hkâsu mù gâ le, ngò gi, yhángmòq hkyi yu é wó hui kó sháng gàq nghû, ngá é gè hkyô ho é a nghut é za, myo myô é matú gè hkyô ho nyi é ru nghut lhê.