Myiwe Yu É Eq Sêng É Hkyô
7
Ahkuî, núngmòq kâ kat é hkyô pé eq séng luî ga jáng, yùqgè rayùq gi, myi a yu le ge ri. 2 Nghut kôlhang, ashop é dông gùngsho zùm yàp é hkyô gyai myô é yánmai, yùqgè hkangmó gi, yhûmsing é myiwe wó râ lhê; myiwe hkangmó gi, yhûmsing é yùqgè wó râ lhê. 3 Haû yhûmsîng hpó gi, wò jòq é eq rajung za, yhâng yhûmsîng myhí eq zùm sháng gàq; haú dông za, yhûmsîng myhí le, yhâng yhûmsîng hpó eq zùm sháng gàq. 4 Haû yhûmsîng myhî é gùngdu gi, yhânggùng yhang za sêng é a nghut, yhâng é yhûmsîng hpó eq le sêng lhê. Haû eq rajung za, yhûmsîng hpô é gùngdu gi, yhânggùng yhang za sêng é a nghut, yhâng é yhûmsîng myhí eq le sêng lhê. 5 Núngmòq myìt huî lhum luî, kyûdûng é má rago àp nhông râ ahkyíng ayòq za a nghut jáng gi, rayùq eq rayùq hkâhe lhum kó. Núngmòq yhûmsing gùng lé a wó hkang é yánmai, Tsádán èq gúnglaú é a hui kô sháng gàq, ahkyíng ayòq haû lai jáng, rahá dum zùm keq. 6 Ngò, haû su nghû taî é gi, hkunmó hkyô é dông a nghut, ahkáng byî kat é dông ru nghut lhê. 7 Byù bànshoq bang gi, ngò su nyì râ lé ô nau ri. Nghut kôlhang, yùq hkangmó gi, ó le ô é chyûnghuq lé Garai Gasâng chyáng mai wó bum akô nghut ri; rayùq gi, rajung chyûnghuq, góyùq gi, gójung chyûnghuq wó bum akô.8 Ahkuî, myiwe a yù lô é bang eq chuimó pé lé ngò taí kôlé, ngò su, haú dông jâng nyi pyám kô é nghut le, yhángmòq é matú ge é hkyô nghut ri. 9 Nghut kôlhang, yhûmsing gùng lé a wó hkâng kô é nghut le gi, yhángmòq, myi yû myi ló râ lhê; hkâsu mù gâ le, myi su nyé luî ô nau nyì râ malaî, myi yû myi ló le je ge lhê.
10 Myi yû bê bang lé, ngò, hkunmó hkyó kôlé, shî gi, ngò dông hkyô é a nghut, Yhûmsing chyáng mâ é ru nghut lhê: Yhûmsîng myhí gi, yhâng é yhûmsîng hpô chyáng mai a ge gang râ nghut lhê. 11 Nghut kôlhang, yhang gâng é nghut jáng, myi a dum ló é za nyì râ lhê, haû a nghut jáng, yhâng é yhûmsîng hpó eq dum xoq yû râ lhê. Yhûmsîng hpó le, yhâng é yhûmsîng myhí lé a ge kâng pyám râ nghut lhê.
12 Góbang lé ngò shî su nghû taí kôlé, shî gi, Yhûmsing chyáng mâ é a nghut, ngò dông mai taî é ru nghut lhê. Gu-mang rayùq yùq gi, lùmjíng sû a nghut é yhûmsîng myhí wó é nghut le, myiwe haû, yhang eq rahá nyì nau é nghut jáng, yhang lé a ge kâng pyám râ nghut lhê. 13 Myiwe rayùq gi, lùmjíng sû a nghut é yhûmsîng hpó wó é nghut le, yùqgè haû, yhang eq rahá nyì nau é nghut jáng, yhang eq a ge gang râ nghut lhê. 14 Hkâsu mù gâ le, haû a lùmjíng sû yhûmsîng hpó gi, yhâng yhûmsîng myhí dông mai lhoq sân-yúng é hui bê nghut mù, a lùmjíng sû yhûmsîng myhí le, lùmjíng sû nghut é yhâng é yhûmsîng hpó dông mai lhoqsan lhoqyúng é hui bê nghut ri. Haû a nghut jáng, núngmòq é zo wuî gi, a sanséng dùt kôrâ nghut lhê; nghut kôlhang, yhángmòq gi, haú dông mai, chyoiyúng bekô nghut ri.
15 Nghut kôlhang, haû a lùmjíng sû gâng ló naû jáng gi, gâng ló sháng gàq. Lùmjíng é yùqgè nghut nghut, myiwe nghut nghut, haû sû é hkyô pé má gi, hkûm zing tô é hkyô a jòq é nghut lhê. Garai Gasang gi, ngá-nhúng lé, nguì ngón shoq nyì sháng gàq ga ji yù bê nghut lhê. 16 Yhûmsîng myhí ê, náng é yhûmsîng hpó lé wó hkyi yù râ nghû, hkâsu wó sé râ lhú? Yhûmsîng hpó ê, náng é yhûmsîng myhí lé wó hkyi yù râ nghû, hkâsu wó sé râ lhú?
17 Hká dông nghut kôlhang, yùq hkangmó gi, Garai Gasang, yhang lé ji yu tô é hkûn, haû Yhûmsîng mai yhang lé nyì nhang tô é dông chyungxe dui nyì râ lhê. Haû gi, noqkuq hpúng pé bànshoq má ngò tô to byî é târâ nghut lhê. 18 Byù rayùq gi, ji yu é huî é hkûn, ahpyo-kuq hpyit hkam yu to gù bê nghut jáng, ahpyo-kuq hpyit a hkâm sû dông a dùt byùq sháng gàq. Byù rayùq gi, ji yu é huî é hkûn, ahpyo-kuq hpyit a hkam yu to shî é nghut jáng, ahpyo-kuq hpyit a hkam yù sháng gàq. 19 Ahpyo-kuq hpyit hkâm hkyô gi, haî ahkyàk a nghut; ahpyo-kuq hpyit a hkâm hkyô gi, haî ahkyàk a nghut. Garai Gasâng é hkunmó pé lé châng nyi é za shèq ahkyàk nghut lhê. 20 Yùq hkangmó gi, yhang lé Garai Gasâng èq ji yu é hkun lhê su xoq nyi nyì râ lhê. 21 Nàng gi, ji yù huî é hkûn jùn dut nyi é lhú? Haú hkyô lé hkâ-myìt chiq. Nghut kôlhang, nàng gi, lùthkyô wó yu é nghut jáng, haú dông nyì àq. 22 Hkâsu mù gâ le, haû Yhûmsing èq ji yu é huî é hkûn, jùn dut nyi é sû gi, haû Yhûmsing èq lhoqlhut yu é byù nghut bê. Haû eq rajung za, ji yu é huî é hkûn, lùthkyô wó é sû gi, Hkrisidùq é jùn nghut ri. 23 Núngmòq gi, Garai Gasâng èq ahpau byi mù wui hpyit yu é hui bê bang nghut akô. Haû mù, byu pê é jùn hkâdùt kó. 24 Gu-mang wuì ê, yùq hkangmó gi, yhûmsîng lé Garai Gasâng èq ji yu é huî to bê dông, Yhâng é hí má xoq nyi nyì râ lhê.
25 Ahkuî, zo-myi zorâm wui é hkyô taí kôlé. Haû Yhûmsing chyáng mâ é hkunmó gi, ngò a wó; nghut kôlhang, Yhûmsing é shogyo nhikmyîn é yánmai, lùm gíng sû rayùq nghut nyi é dông, ngò, núngmòq lé hkyô shit râ nghut lhê. 26 Ahkuî hui zô é wuîhke hkyo é yánmai, núngmòq gi, yhûmsîng nyi tô é su xoq nyi nyi le je ge ri nghû, ngò wó myìt ri. 27 Nàng, myiháng bê a nghut lhí? Lhoqkang râ hkâda lo. Nàng, myi a háng shi a nghut lhí? Myi hkâhô lo. 28 Nghut kôlhang, nàng, myihâng é nghut le gi, mara a nghut. Zo-myi gi, myi ló é nghut jáng, mara a nghut. Nghut kôlhang, myihâng é bang gi, shí pyàt má wuîhke hkyô pé myo myo hui kôrâ nghut mù, ngò, núngmòq lé haû mai hkyi yù nau ri.
29 Gu-mang wuì ê, ngò taí nau é lichyúm gi, ahkyíng tot byùq bê nghut mù, ahkuî mai, myi wó é bang gi, a wó é bang dông nyì kó sháng gàq.a 30 Yón ngaû huî é bang gi, a huî é bang su; gabú é bang gi, a gabú é bang su; sùtzè lé wui yu é bang gi, sùtzè a wó é bang su; 31 haû mingkan zè pé lé chung é bang gi, haú pé lé a myìt tuî é bang su, nghut kó sháng gàq. Hkâsu mù gâ le, shî mingkân é ahkui lhê é azòng isâm gi, laî ló nyi é nghut lhê.
32 Ngò gi, núngmòq lé a myìt myo nhâng naù. Myi a yù shî é sû gi, haû Yhûmsîng lé hkâsu wó gabú nhâng râ matú, haû Yhûmsing é múzó lé myìt chiq nyi ri. 33 Nghut kôlhang, myi yû bê sû gi, yhâng é yhûmsîng myhí lé hkâsu wó gabú nhâng râ matú, mingkan shi é múzó eq séng luî myìt chiq nyi ri. 34 Haû mù, yhang shîrong é myìt gi, byo myín nyi ri. Myi a ló é myiwe nghut nghut, zo-myi gyíng nghut nghut gi, yhâng é gùngdu eq sô má haû Yhûmsîng lé rago wó àp nhông râ matú, Yhûmsing é múzó pé eq séng luî myìt chiq nyi ri. Nghut kôlhang, myi ló bê myiwe gi, yhâng é yhûmsîng hpó lé hkâsu wó gabú nhâng râ matú, mingkan shi é múzó eq séng luî myìt chiq nyi ri. 35 Ngò, haû su nghû taî é gi, núngmòq é matú ge é hkyô nghut lhê; núngmòq lé târa èq zuî zing é a nghut é za, myìt a byò loshoq Yhûmsîng lé wó àp nhông râ matú, jô é dông chyungxe wó duî kô sháng gàq nghu é hkyô ru nghut lhê.
36 Nghut kôlhang, rayùq yùq gi, yhang dûng tô é zo-myi gyíng lé a htuk é dông kut nyi é su wó myìt ngàm jáng, myiwe haû chyungxe kô lo nyì mù, hâng yù râ dùt bê nghû myìt é nghut le gi, yhang ô nau é dông kut sháng gàq. Yhang mara kut é a nghut. Yhángnhik gi, hâng lhum râ lhê. 37 Nghut kôlhang, yhang gi, haú hkyô lé yhâng é myìt mai wó lhoqzîm pyâm é nghut mù, yùt yùt ô naù hkyo é ahkaû má a nghut é za, yhûmsîng ô nau é hkyô lé wó hkûm zing pyâm é sû nghut luî, haû zo-myi gyíng lé a hâng yù râ matú wó myìt hpyit bê sû nghut é nghut jáng, yhang gi, ge é hkyô kut bê nghut ri. 38 Haû mù luî, zo-myi gyíng haû lé hâng yu é sû gi, jô é hkyô kut bê nghut ri; nghut kôlhang, zo-myi gyíng haû lé a hâng yu é sû gi, je ge é hkyô kut bê nghut ri.
39 Myiwe rayùq gi, yhâng é yhûmsîng hpó rû dui nyì nyì, yhang eq xoq tô ashî nghut lhê. Nghut kôlhang, yhâng é yhûmsîng hpó shi byùq é nghut jáng, yhang gi, myi ló râ ahkáng dum wó bê nghut lhê, nghut kôle, haú yùq gi, Yhûmsîng eq sêng é sû dùt râ lhê. 40 Ngò jéyáng é dông ga jáng, myi a dum ló é wó nyi le gi, yhâng é matú je gabú hkyô dùt râ nghut lhê. Ngò le, Garai Gasâng é Sô wó sû nghû wó myìt ri.