Lùmjíng Bâng Hkaû Má Jéyáng Lhûm É Hkyô
6
Núngmòq mâ é rayùq yùq gi, gu-mang góyùq eq dangnyhin nyhîn lhûm tô é nghut jáng, haú hkyô lé jéyáng nhâng râ matú, haû sân-yúng bâng é hí má taí râ malaî, Garai a wó bâng é hí má wám taí râ lhú? 2 Haû sân-yúng bang gi, mingkan lé jéyáng râ nghut é hkyô lé, núngmòq a sé kô lhú? Núngmòq gi, mingkan lé jéyáng râ bang nghut kôle nhîng, tiq é mû pé lé wó jéyáng é bang a nghut kó lhú? 3 Ngá-nhúng gi, maumang lagyô pé lé jéyáng râ nghut é hkyô lé, núngmòq a sé kó lhú? Haû mù, shí pyàt mâ é hkyô pé lé, gè gè yhang wó jéyáng kôrâ nghut lhê ô! 4 Haû mù luî, núngmòq gi, dangnyhin nyhîn lhûm é mû pé jòq é nghut jáng, noqkuq hpúng má ahkyàk a nghut é bang lé târâ agyì kut nhâng kôrâ lhú? 5 Ngò, haû su nghû taî é gi, núngmòq lé hoq hpu nhâng râ matú nghut lhê. Lùmjíng bâng chyáng dangnyhin nyhîn lhûm é hkyô lé wó jéyáng râ hpàqchyî lùq shoq bo é byù, núngmòq chyáng rayùq lháng a nyì dùt a kô lhú? 6 Nghut kôlhang, núngmòq gi, gu-mang yhangchang rayùq eq rayùq, a lùmjíng bâng é hí má lháng rûng shok lhûm akô nhung!7 Núngmòq hkaû má mû jéyáng lhûm é hkyô jòq é nghut jáng, núngmòq gi, sum lùgù nghut bê. Góyùq èq shut le lháng rû ge lhê a nghut kô lhú? Mhaú zô é huî le lháng rû ge lhê a nghut kô lhú? 8 Nghut kôle, núngmòq yhang gi, mhaú zo kô é eq shut kô é nghut luî, haû gi, núngmòq é gu-mang wuì lé kut é nghut lhê.
9 Agè agaú é bang gi, Garai Gasâng é mîngdán mâ é shimân jeju a myang hkam yù kôrâ nghut é hkyô lé, núngmòq a sé kó lhú? Hkâ‑nâ nyì kó. Ashop é dông gùngsho zùm yàp é bang le, hparà noq é bang le, su-myi sulàng lú é bang le, shiwa hpó kut é bang le, yùqgè yhangchang nyì zô lhûm é mara kut shut é bang le, 10 hkau bang le, myòqnòq bang le, î shuq wùt bang le, lùmù gànsang é bang le, mhaú zô é bang le, Garai Gasâng é mîngdán mâ é shimân jeju lé myang hkam yù kôrâ a nghut. 11 Núngmòq mâ é ra-am gi, haû su kut kô é bang nghut akô. Nghut kôlhang, núngmòq gi, ngá-nhûng é Garai Gasâng é Sô eq Yhûmsîng Yesuq Hkrisidùq é myìng mai, mara hkyut san byî é, lhoq sân-yúng é eq chî sân pyám byî é hui bekô nghut ri.
Ashop É Dông Gùngsho Zùm Yàp É Hkyô
12 “Jung hkangmó kut râ ahkáng ngò wó lhê.” Nghut kôlhang, jung hkangmó gi, a-kyû byî é a nghut. “Jung hkangmó kut râ ahkáng ngò wó lhê.” Nghut kôlhang, haí jûng èq le ngo lé wó sing pyám râ a nghut. 13 “Zoshuq gi, wamdaû é matú nghut mù, wamdau gi, zoshuq é matú nghut ri.” ga núngmòq ra-am taí kôrâ nghut lhê. Nghut kôlhang, Garai Gasang gi, haû í jûng é lé lhoqhtên pyám râ nghut lhê. Gùngdu gi, ashop é dông gùngsho zùm yàp hkyo é matú a nghut é za, haû Yhûmsing é matú nghut mù, haû Yhûmsîng gi, gùngdû é matú nghut ri. 14 Garai Gasang gi, Yhâng é a-tsâm èq, haû Yhûmsîng lé, shi é mai lhoqdui toq yû bê nghut mù, ngá-nhúng lé le lhoqdui toq yû râ nghut lhê. 15 Núngmòq é gùngdu pé gi, Hkrisidùq é gùngsho showui showang pé yhang nghut é lé, núngmòq a sé kô lhú? Haû nghut le nhîng, Hkrisidùq é gùngsho showui showang pé lé yù mù, shiwa myhî pé eq rading ralhum za kut pyám nhâng kôrâ lhú? Hkâ-nhám le a ge dùt nhâng! 16 Shiwa myhí eq gùngsho zum é sû gi, yhang eq gùngsho ralhum za dùt bê hkyô lé, núngmòq a sé kô lhú? Hkâsu mù gâ le, “Yhángnhik gi, gùngsho ralhum za dùt byùq kôrâ nghut lhê.”a ga taî tô ri. 17 Nghut kôlhang, haû Yhûmsîng eq rading ralhum za dùt é sû gi, sô má Yhang eq ralhum za dùt bekô nghut ri.
18 Ashop é dông gùngsho zùm yàp é hkyô lé koi pyám keq. Byù rayùq kut shut é gótû mara pé bànshoq gi, yhâng é gùngdu shinggan má nghut lhê; nghut kôlhang, ashop é dông gùngsho zùm yàp é hkyô kut shut é sû gi, yhûmsing gùng lé mara shut é sû nghut ri. 19 Núngmòq é gùngdu gi, Garai Gasâng chyáng mai núngmòq wó yû bê nghut é, núngmòq má lúng nyi é Chyoiyúng So é noqkuq yhûm nghut é lé, núngmòq a sé kô lhú? Núngmòq gi, yhûmsing gùng lé sing é bang a nghut. 20 Hkâsu mù gâ le, núngmòq gi, ahpau ralhum byi mù wui hpyit tô é hui bê bang nghut akô. Haû mù luî, núngmòq é gùngdû èq, Garai Gasang lé, hkúnggâ é hkyô shit nyî keq.