Hparà Lhô Lé Tîng Byî É Zoshuq
8
Ahkuî, hparà lhô pé lé tîng byî é zoshuq hkyô: ngá-nhúng bànshoq bang gi, haú hkyô eq séng luî sê lhê. Sê é hkyô gi, nghutbun sê lhê; nghut kôlhang, chyitdàp myìt gi, lhoqkô myhang lhê. 2 Byù rayùq yùq gi, rajung jung lé sé bûn é nghut le, yhang sé âng é lé lháng a sé shi nghut ri. 3 Nghut kôlhang, Garai Gasang lé chyitdàp é sû gi, Garai Gasâng èq sê é sû nghut ri.4 Haû mù luî, hparà lhô pé lé tîng byî é zoshuq lé zô é eq séng luî ga jáng, hparà lhô gi, mingkan má haî lháng a nghut é hkyô lé le, Garai Gasang gi, Yhang rayùq mai lai luî gótû a nyi é lé le, ngá-nhúng sê lhê. 5 Hkâsu mù gâ le, mauhkûng htoq má nghut nghut, myigùng htoq má nghut nghut, byù ra-am mai hparà pé ga bang nyì mù, “hparà pé” myo myo eq “yhûmsing pé” myo myo nyì kôlhang 6 ngá-nhûng é matú gi, Îwa nghut é Garai Gasang rayùq za nyi é nghut mù, lhúnglháng gi, Yhang mai hpan é nghut luî, ngá-nhúng gi, Yhâng é matú chyungxe dui nyi é nghut lhê. Yesuq Hkrisidùq nghu é Yhûmsîng rayùq za nyi é nghut mù, lhúnglháng gi, Yhang dông mai hpan é nghut luî, ngá-nhúng gi, Yhang dông mai chyungxe dui nyi é nghut lhê.
7 Nghut kôlhang, yùq hkangmó gi, haú hkyô lé sê gam hkoq yu é a nghut. Ra-am gi, ahkuî jé shoq hparà lhô pé má mán byùq kô é yánmai, haû sû é zoshuq lé yhángmòq zô é hkûn, hparà lhô lé tîng byî é zoshuq dông myìt sôn yu akô. Yhángmòq myìt sôn sê é hkyô wum nyhôm é yánmai, mara wó bûn akô nghut ri. 8 Nghut kôlhang, zoshuq gi, ngá-nhúng lé, Garai Gasâng shut shuî chyâng e é a nghut. Ngá-nhúng a zô é nghut le gi, je sûm byùq ló é a nghut, zô é nghut le gi, je ge lo é a nghut.
9 Haû su ga kôlhang, núngmòq a htung a htê zô é hkyô gi, lùmjíng myìt wum nyhóm bâng é matú myìt lèqbàt jowò a dùt shoq sidìq keq. 10 Hkâsu mù gâ le, sumsé hpàqchyî wó é bang núngmòq gi, hparà lho é noqkuq yhûm má zô nyì kô é lé, haû myìt sôn sê é hkyô má wum nyhôm é sû rayùq yùq myang é nghut jáng, hparà lhô pé lé tîng byî é zoshuq lé, yhang wám zo râ lé wum byî é a dùt kôrâ lhú? 11 Haû mù, Hkrisidùq shî hkám byi bê nghut é, wum nyhôm é gu-mang hpó haú yùq gi, núngmòq é sumsé hpàqchyî èq lhoqhtên pyâm é hui berâ nghut lhê. 12 Núngmòq gi, haú hkyô dông mai, núngmòq é gu-mang wuì lé mara kut shut é eq, yhángmòq é myìt sôn sê é hkyô wum nyhôm é lé nò nhang é hkûn, Hkrisidùq lé mara kut shut é nghut bekô. 13 Haû mù luî, ngò zô é gi, ngá é gu-mang hpó lé mara kut shut nhang é nghut jáng, yhang lé myìt a lèqbàt nhâng sháng gàq, ngò, hkâ-nhám le, sho lé a zo lo râ nghut lhê.