Poluq, Kehtaq Chyáng Jé Râ Matú Dûng É Hkyô
25
Hpesitu gi, haú mau má jé é sum nyí lai jáng, Kesare wà mó mai Yerusalem wà mó shut dòq ló ri. 2 Haú hkûn, hkyangjong agyi pé eq Yudaq byù hkyô-u shê bang gi, yhang lé Poluq é hkyô lé hkyang lhom shit kômù, 3 yhángmòq gi, Poluq lé hkyôlat má lhom haq sat pyám râ haq htung to kômù luî, jeju ralhum kut byî é dông Poluq lé Yerusalem wà mó shut dé kat byi râ matú, Hpesitu lé lhom dûng akô. 4 Nghut kôlhang, Hpesitu gi, “Poluq lé Kesare wà mó má shèq ru lhûng tô lhê, hkâ-myháng a myáng má, ngò yhang le haú má dum taû ló râ nghut lhê. 5 Haû mù, núngmòq mâ é hkyô-u shê bang ra-am, ngò eq rahá gyó ló mù, haú yùq kut shut é hkyô bo é nghut jáng gi, yhang lé mara lé hûn kó sháng gàq.” ga tû taî ri.6 Hau htâng, yhang gi, shit nyi, raxê nyí kô yhángmòq chyáng nyi yù luî, Kesare wà mó má taû ló mù, htang nyí gi, târâ tánghkuq má zùng luî, Poluq lé yhâng hí má shuî wang lò râ matú hkunmó hkyô kat ri. 7 Poluq jé jáng, Yerusalem wà mó mai gyó lo é Yudaq byu pé gi, yhâng é lhînghkyùq má yàp to kôluî, sàksé a wó tûn shit é mara mó myo myo lé, yhâng é ahtoq má chôm taî hun akô nghut ri.
8 Haú hkûn, Poluq gi, “Yudaq byu pê é jep é târâ eq shai é dông le, noqkuq yhûm lé shut é dông le, Kehtaqa lé shut é dông le, ngò a kut wú.” ga luî, mara a bo é hkyô taî ri.
9 Nghut kôlhang, Hpesitu gi, Yudaq byu pê é hí má myòqdong wó naû mù, Poluq lé, “Nàng, Yerusalem wà mó má dòq ló luî, shí hkyô pé lé ngò haú má dòqdan byi râ matú, nàng dóng lhê lhú?” ga myî ri.
10 Poluq kúm gi, “Ngò gi, dòqdan hui râ nghut jáng, shî dòqdân é jowò, Kehtaq é târâ hpyit wàp má ahkuî yàp to bê nghut lhê. Nàng sê é eq rajung za, ngò gi, Yudaq byu pé lé haî lháng a shut wú é sû nghut lhê. 11 Hkâsu hkâwo mù, shî gíng é mara lé, ngò kut shut pyâm é nghut le gi, shî hkám râ hkyô lé ngò a he pyám; nghut kôlhang, shî Yudaq byu pé mai ngo lé mara hun é hkyô a têng é nghut jáng gi, ó yùq lháng ngo lé yhángmòq é lòq má àp byi râ ahkáng wó râ a nghut, ngò gi, Kehtaq chyáng wang taí râ nghut lhê.” ga tû taî ri.
12 Haú hkûn, Hpesitu gi, yhâng é byìn tú wàp bang eq ban hpyê lhum jáng, “Nàng Kehtaq chyáng wang taí râ ga bê nghut lhê, Kehtaq chyáng wang ló àq hkoi!” ga taî kat ri.
Poluq Lé, Hkóhkâm Agripa Hí Má Shuî Hâng Yu É Hkyô
13 Hau htâng, buìnyì hkâ-myháng a myáng má, Hkóhkâm Agripa eq yhang gu myiwe zo Berinike gi, Kesare wà mó má jé lé mù, Hpesitu lé lé huî nyo akô nghut ri. 14 Haû mù, yhángnhik tâng gi, buìnyì tsómra myáng nyi nyi é htâng má shèq, Hpesitu gi, haû Poluq é hkyô lé hkóhkâm wá eq taî kyô lhûm é gi, “Hpilik, lhûng to láng é htóng byû rayùq nyi ri. 15 Ngò Yerusalem wà mó má nyi tô é hkûn, hkyangjong agyi pé eq Yudaq byu pê é sûwún wuî gi, haú yùq é hkyô lé taî kyo kôluî, haú yùq lé mara byi râ matú ngo lé chôm dûng akô.
16 Haú hkûn, ngò gi, mara hun é hui sû, mara hun é bang eq chyung chyoq yòq kut luî, yhángmòq hun é mara lé yhûmsing matú mara a bo é hkyô a wó taí shi lé, ó yùq lé àp byî pyám râ le, Romaq htûng a jòq nghû luî yhángmòq lé taî kyo bê nghut lhê. 17 Yhángmòq ngá htâng châng gyó lô kô é hkûn, ngò gi, a nô yu é za, htang nyí jáng târâ tánghkuq má zùng luî, haú yùq lé shuî wang lò râ matú hkunmó hkyô kat é nghut lhê. 18 Haú hkûn, haú yùq lé yhángmòq mara chôm hun bùm kôle, ngò myìt ngàm tô é su mara ralhum le a hun htoq lô kó nghut ri. 19 Yhángmòq é noqkuq htûng hkyô eq, haû dui nyi ri ga Poluq èq taî é, shi byùq bê Yesuq é hkyô lé za dang jet jèt lhûm bum akô. 20 Haû mù, ngò gi, haú hkyô lé hká dông gôn yù râ le a sé lô é yánmai, haú hkyô lé Yerusalem wà mó má dòqdân é ló hkam yù râ matú, yhang dóng a dóng é hkyô lé myî wú le, 21 Poluq yhang shèq, Hkóséng mó chyáng jé râ ga taî é yánmai, Kehtaq chyáng a dé kat shî é u lé, yhang lé zúng nyî shirâ matú, ngò hkunmó hkyô kat é nghut lhê.” gâ ri.
22 Haú hkûn, Agripa gi, “Ngò le haú yùq é dang gyô wú nau ri.” ga, Hpesitu lé taí jáng, yhang gi, “Nàpmá, nàng wó myang gyo râ nghut lhê.” ga tû taî ri.
23 Htang nyí, Agripa eq Berinike nhiktâng gi, shingkang bò bò za lé lô mù, dàp ùp zau wuî eq wà mâ é agyì sûwún wuî eq rahá, rûng wàp mó má wang zung tô bùm kô é hkûn, Hpesitu hkunmó hkyô kat jáng, Poluq lé shuî hâng tô akô. 24 Haú hkûn, Hpesitu taî é gi, “Hkóhkâm Agripa eq ahkuî shî má zùp zîng tô é lhúnglhâng bang ê, Yerusalem wà mó eq shí wà mâ é Yudaq byu pé bànshoq bang, ngá chyáng lé taí kôluî, shí yùq lé chyungxe a wó duì nhang to lo ga garû bum é gi, ahkuî núngmòq myang é shí yùq yhang nghut bê. 25 Nghut kôlhang, shí yùq zui saî é má shî gíng é mara haî lé lháng ngò a myàng nghut ri. Yhang gi, Hkósêng chyáng wâng râ ga taî é yánmai, yhang lé Romaq wà mó shut dé kat râ matú ngò myìt hpyit to bê. 26 Dé kat bá nghû jáng le, ngá é yhûmsîng Hkósêng chyáng yhâng é hkyô jíhkúm nùqgùq kâ hun kat râ haî le a bò nghut ri. Haû mù luî, yhang lé ban myî gôn wú jáng shèq, ká râ hkyô rajung jung hkâlháng ngò myàng âbe nghû, núngmòq bànshoq bâng é hí má le, je riyhang nàng Hkóhkâm Agripa é hí má le, yhang lé ngò lhoqhtoq shit é nghut lhê. 27 Hkâsu mù gâ le, htóng byû rayùq yùq lé dé kat é hkûn, yhang lé hun é mara a wó tûn shit lé gi, a htuk nghû luî, ngò myìt lhê.” gâ ri.