Poluq, Mara Hûn Huî É Hkyô
24
Hau htâng, ngo nyí lai jáng, hkyangjong mó Anani gi, sûwún wuî ra-am eq târâ sé sû Teritulu lé shuî gyó ló mù, mau zau hpô hí má Poluq lé mara lé taî hun bum akô. 2 Haú hkûn, Poluq lé hí má ji hâng tô é nghut mù, Teritulu, yhang lé mara hûn dang taî hi é gi, “Aróng wó dik é Hpilik ê, ngá-mòq gi, nyì ngón yùqyo é hkyô lé náng é yánmai gyai myáng shoq wó hkam yu bum é nghut lhê. Nàng sê ùp sê hkang é jeju lé, byù myû shî wó hkâm zô nyi é yánmai, 3 ngá-mòq gi, haû lé hkyô hkat hkangmó eq jowò hkangmó má jeju bûn é myìt eq hkam yu nyì bê nghut lhê. 4 Nghut kôlhang, ngò nang lé lhoqhkyik é dông a dùt sháng gàq, taí râ dang ratot zo lé, myìt hîng hîng to mù gyo byi laq nghû dûng tôngbán lhê ô!5 Shí yùq gi, byù lé gunjang sû, mingkan gón mâ é Yudaq byu pé lhúnglháng lé shuî gabyong sû eq, haû Nazaret hpúng mâ é hkyô-u shê sû nghut é lé, ngá-mòq myang ri. 6 Hau htoq agó, yhang gi, noqkuq yhûm lé achaq achyut kut râ haq htung nyì luî, yhang lé ngá-mòq chyup yû mù, ngá-mòq é târâ dông jéyáng râ hen nyi é hkûn, 7 dàp ùp zau Lusi gi, lé lô mù, ngá-mòq é lòq mai yhang lé, lé lú shuî yù luî, yhang lé mara hûn bang lé, náng chyáng jé keq ga hkunmó hkyô tô é nghut lhê. 8 Haû mù, nàng, yhang lé myî wú jáng, ngá-mòq yhang lé hun é mara bànshoq têng é hkyô lé, nàng wó sé râ nghut lhê.” gâ ri.
9 Yudaq byu pé le, haú pé gi, têng lhê ga bo chôm taî akô nghut ri.
Poluq, Mara A Bo É Lé Taî Hung É Hkyô
10 Ming zau hpó gi, Poluq lé dang taí râ dông lòq lìk kat jáng, Poluq taî é gi, “Zau ê, shí mau bâng é ahtoq má, nàng zànwut myo myo jéyáng byî nyi é hkyô lé, ngò sê é yánmai, ngò gabú myìt èq yhûmsing matú, mara a bo é hkyô taí bá. 11 Ngò, Yerusalem wà mó má noqkuq râ matú dòq e é buìnyì raxe í nyí lháng a chyân shî é gi, nàng luì za wó sé râ nghut lhê. 12 Noqkuq yhûm má ngò ó yùq eq taî htîng lhûm é lé lhang, târâjong, a nghut jáng, wà hkaû hká jowò má le byu pé lé shuî gabyông é lé lhang, ngo lé mara hun é bang gi, a myàng kó. 13 Ahkuî, ngo lé yhángmòq hun é mara pé lé, náng hí má yhángmòq sàksé lháng a wó tûn shit kó nghut ri. 14 Nghut kôlhang, náng hí má ngò yín yû râ hkyô rahkat gi, yhángmòq èq shut shaî hkyô ga myhîng tô é Hkyô lé cháng luî, ngá-mòq é îchyí îwâ pê é Garai Gasang lé noqkuq nyi lhê. Jep é târâ eq myìqhtoi laiká pé má kâ tô é lhúnglháng lé le lùmjíng lhê. 15 Ngò gi, díngmán é bang eq a díngmán bâng é dum dui toq lô râ hkyô jòq é lé, yhángmòq eq rajung za Garai Gasang má myìt myòqbyu nyi é sû nghut lhê. 16 Haû mù luî, Garai Gasang eq byu é hí má, ngò gi, râ é hkyô a bo é za, myìt é hkyô san za wó dùt nyì shoq, shi-kùt nyi lhê.
17 Zànwut tsómra laî é htâng má, ngò gi, ngá é byù myû mâ é myùng bang lé chyûnghuq byi râ eq alû kat râ matú, Yerusalem wà mó shut ló jé bê nghut lhê. 18 Haû su kut nyi é hkûn, ngò eq rahá hai byù mòqmó le a nyì, haí jung gabyông é hkyô le a htoq, ngò noqkuq yhûm má lhoqsan lhoqyúng yû bê hkyô lé za, yhángmòq myang akô. 19 Nghut kôlhang, Asi-a mau mâ é Yudaq byù ra-am gi, haú má nyi tô é nghut lhê; yhángmòq mai ngo lé mara hûn râ hkyô jòq kô é nghut le gi, shî náng é hí má yhángmòq lé jé kôrâ nghut lhê. 20-21 Haû a nghut jáng, shî má nyi tô é bang gi, ngò Yudaq byìn tú wàpdòq hí má yàp to mù, ‘Shi byùq bâng é dum dui toq râ hkyo é yánmai, hkû-nyí núngmòq ngo lé jéyáng nyi akô.’ nghû luî, garû é dang hkun mai lai luî, ngò má gótû mara myàng shi kô é nghut le gi, yhángmòq yhang taî kyo kó sháng gàq.” gâ ri.
22 Hpilik gi, Hkyô haû lé rago sê lhê nghut mù, “Gyèdap ùp zau Lusi jé jáng shèq, ngò, núngmòq é mû lé dòqdan byi râ nghut lhê.” ga luî, yhángmòq lé ahkyíng htòt kat byî ri. 23 Poluq lé le, zúng za zúng to mù, yhâng é buìnùm ji-myi wuì mai yhang ra châ é hkyô lajang byi naû kô é bang nyi le gi, ahkáng byi keq ga luî, shô ùp gyèzau lé hkunmó hkyô kat ri.
24 Buìnyì rayòq zo laî é htâng má, Hpilik gi, Yudaq myiwe myhí nghut é sû yhang myi Dirusila eq jé lé mù, Poluq lé ji lò nhâng luî, yhang, Hkrisidùq Yesuq lé lùmjíng hkyô taî kyô é le gyô yu ri. 25 Poluq gi, díngmán hkyô, yhûmsing gùng lé hkang é hkyô eq, jé lô râ târâ dara hkyô lé mhoqshit jáng, Hpilik gi, gyô gyùq mù, “Nàng ahkuî wó ló bê, ngò jìn jáng shèq nang lé dum ji yù râ nghut lhê.” ga taî ri. 26 Hpilik kúm gi, Poluq èq ngùn haq byi râ lé myìt myòqbyù mù, yhang lé a-num num ji yù luî, yhang eq nyo lhum lhum kut ri.
27 Zànwut í zân lai jáng, Hpilik é mau zau ayá má Poriku Hpesitu lé htaî kat pyâm akô. Nghut kôlhang, Hpilik gi, Yudaq byu pê é hí má myòqdong wó nau é yánmai, Poluq lé htóng má jâng lhûng pyâm to bê nghut ri.