Poluq É Hí Hpyang Lhê É Nyì Yàp Hkyô
26
Haú hkûn, Agripa gi, Poluq lé, “Nàng, náng matú dang taí râ ahkáng wó bê.” ga taî ri.Haû mù luî, Poluq lòq tu kat mù mara a bo é hkyô taî é gi, 2-3 “Hkóhkâm Agripa ê, nàng gi, Yudaq byu pê é htûnghking bànshoq eq taî htîng lhûm é hkyô hkat hkangmó lé, gyai sê to sû nghut é yánmai, Yudaq byu pé ngo lé hun é mara hkat hkangmó lé, ngò hkû-nyí náng é hí má mara a bo é hkyô myang taî é gi, ngá matú gabú hpo yhang nghut ri nghû myìt yu nyi lhê; haû mù luî, ngá dang lé myìt hing é èq gyô yù byi laq nghû, dûng tôngbán kat lhê.
4 Ngò gi, zoshâng hkûn mai, ngá a-myû má le, Yerusalem wà mó má le, hkâsu kut nyi kô lo é hkyô lé, Yudaq byu pé lhúnglhâng bang gi, sé gû nghut akô. 5 Yhángmòq gi, ngo lé hí hkûn mai sé kô é yánmai, ngò, ngá-mòq é noqkuq htûng mâ é târâ htan dik é hpúng má bo é Hparishe rayùq nghut é hkyô lé, sàksé hkám naû kô é nghut jáng, yhángmòq wó hkâm lhê. 6 Nghut kôlhang, dòqdân é hui zo râ matú, ahkuî ngò shî má yàp tô é gi, Garai Gasang èq ngá-mòq é îchyí îwâ pé lé danghtum htûm tô é lé myìt myòqbyu nyi é yánmai nghut lhê. 7 Ngá-mòq é byù myû raxe í hú gi, danghtum htûm tô é jeju haû lé wó hkam yù shoq ga, Garai Gasang lé nyí myín noqkuq dójaú shi-kùt nyi bum akô; Hkóhkâm hpó ê, myìt myòqbyù hkyô hau é yánmai, ngo lé Yudaq byu pé mara hun bum akô nghut ri. 8 Garai Gasang gi, shî bê bang lé dum lhoqtui lhê gâ é hkyô lé, a wó lûm nghû, haî mù myìt yu akô lhú?
9 Ngò le, Nazaret wà byù Yesuq é myìng eq shai lhûm é dông myo myo wó kut râ nghut lhê nghû, gè gè yhang myìt yu wú bê nghut lhê. 10 Gè gè haú dông le Yerusalem wà mó má kut wú bê nghut lhê; hkyangjong agyi pê chyáng mâ é ahkáng wó yû luî, ngò gi, sân-yúng bang myo myo lé htóng má kat pyâm é eq, yhángmòq sat hui kôjáng le, ngò myìt bo huî wú bê nghut lhê. 11 Ngò gi, târâjong bànshoq má a lhîng lhîng yhángmòq lé dam byi luî, Yesuq lé rhoî dang taí kó shoq shi-kùt wú bê nghut lhê; nhik mó góng yo luî, gó-mau mâ é wà pé lháng jé shoq, yhángmòq lé châng zing-rî wú bê nghut lhê.
Poluq Hpúng Byû Dùt Lo É Hkyô
12 Haú hkûn, radàm lé, ngò gi, hkyangjong agyi pê chyáng mai ahko ahkáng eq hkunmó lé yu chûng mù, Damasikuq wà mó shut e ló nyi le, 13 Hkóhkâm hpó ê, nyígûng tu ló zó lé, buì htoq má je dùq é maubó gi, haú hkyô má, ngò eq ngá é luzúm wui é lhînghkyùq má, mauhkûng mai dùq bó htoq lo é lé myang ri. 14 Haú hkûn, ngá-mòq bànshoq bang myigùng má lêng gòp tô bum le, Hebre myíng dông, ‘Sholuq, Sholuq, nàng, ngo lé haî mù zing-rî nyi lhê lhú? Zuchûn lé pik le gi, náng é matú gyai yhang wuî lhê.’ ga luî, ngo lé taî é danghtê lé ngò wó gyô kat ri.
15 Haû mù, ngò gi, ‘Yhûmsîng ê, nàng gi, ó yùq nghut lhê lhú?’ nghû luî, myi jáng, haû Yhûmsîng tû taî é gi, ‘Nàng zing-rî nyi é Yesuq nghut lhê. 16 Ahkuî toq yàp àq, hkâsu mù gâ le, ahkuî, nàng, ngo lé myàng bê hkyô eq, ngò, nang lé tûn shit shirâ nghut é hkyô pê é matú, ngá é mû wùn râ byù eq sàksé dùt nhâng râ dông nang lé hkyin to râ nghû, ngò náng chyáng lé htoq shit é nghut lhê. 17 Náng é a-myû pê é lòq mai le, tûngbaù pê é lòq mai le, ngò, nang lé hkyi yù râ nghut lhê. 18 Yhángmòq, yubàk hkyut pyám byî é jeju wó yû râ eq, ngo lé lùmjíng é yánmai, lhoq sân-yúng huî é bang eq rahá silî wunlî wó hkam yù kó sháng gàq nghû, yhángmòq é myòq lhoqhpóng byi mù, mauchut hkaû mai maubó shut, Tsádán é a-tsam hkaû mai Garai Gasâng shut yhángmòq lhing ló râ matú, ngò, nang lé yhángmòq chyáng nhang kat râ nghut lhê.’ gâ ri.
Poluq Kut É Múzó Hkyô
19 Haû mù luî, hkóhkâm Agripa ê, ngò gi, mauhkûng mâ é myòqwùp shing-rán haû lé a gyô é a wó nyî nghut lhê. 20 Ngò gi, yhángmòq myìt lhîng luî, Garai Gasâng shut lhing taû lò mù, myìt lhîng bê hkyô lé, hkyîzó lòqzó dông mai tûn shit kó sháng gàq nghû, sânghi má Damasikuq wà mó má nyi é bâng chyáng mai hî luî, Yerusalem wà mó mâ é bâng chyáng má le, Yuda mau gón mâ é bâng chyáng má le, tûngbaù pê chyáng má le, hkô kyo bê nghut lhê. 21 Hau é yánmai, Yudaq byu pé gi, ngo lé noqkuq yhûm má chyup yû luî, sat pyám râ da kô é nghut lhê. 22 Nghut kôlhang, ngò gi, hkû-nyí jé shoq Garai Gasâng èq garúm é lé wó yû luî, ahkuî shî má yàp to mù, tiq ko bànshoq bang lé sàksé wó hkâm kyô é nghut lhê. 23 Ngò taî é má, Hkrisidùq gi, hpuzo luî, shî bê bang mai sânghi dui toq lô mù, Yhâng é a-myû eq tûngbaù a-myû pé lé maubó é hkyô lé wó taî kyo râ nghut lhê ga luî, dùt lò râ hkyô lé, myìqhtoî pé eq Mosheq taî tô é hkyô mai lai luî, ngò gótû haî le a taî é nghut lhê.” gâ ri.
24 Yhang haû su ga mara a bo é hkyô taî é lé, Hpesitu gi, “Poluq ê, nàng na bê! Lûm mhoq myô yu é yánmai na bê nghut ri.” ga luî, htê mó eq danglat taî hpyit kat ri.
25 Poluq kúm gi, “Aróng wó dik é Hpesitu ê, ngò gi, nâ é a nghut, ngò taî é dang gi, tengmán é dang eq dang gyíng nghut lhê. 26 Shí hkyô lé hkóhkâm hpó yhang le sê to gù nghut lhê mù, yhâng é hí má ngò a gyùq a kyûm taî é nghut lhê. Hkâsu mù gâ le, shí hkyô gi, nùngwò má kut é a nghut é yánmai, hkóhkâm hpó yhang a bo sê é gi, haî le a jòq râ nghut lhê nghû, ngò myìt lum nyi lhê. 27 Hkóhkâm Agripa ê, nàng gi, myìqhtoî pê é dang lé lùmjíng lhê lhú? Nàng lùmjíng é hkyô lé ngò sê lhê.” ga tû taî ri.
28 Haú hkûn, Agripa gi, Poluq lé, “Razùp za má, nàng, ngo lé Hkrisitan rayùq wó dùt nhâng nhô ngam ri lhú?” ga taî ri.
29 Dum Poluq gi, “Razùp za má nghut nghut, myáng myáng má nghut nghut, shî shâmtoq tui pé mai lai luî, nàng za a nghut, hkû-nyí ngò taî é dang lé gyô nyi é lhúnglhâng bang, ngò su dùt râ matú, ngò gi, Garai Gasang lé kyûdûng nyi lhê.” ga tû taî ri.
30 Haú hkûn, hkóhkâm hpó gi, ginwáng zau hpó eq Berinike le mù, haú má zung tô é bang eq rahá toq yàp ri. 31 Yhángmòq htoq ló kô é hkûn, “Shí yùq gi, sat gíng é mara eq htóng lhúng gíng é mara haî le a kut shut nghut ri.” ga, rayùq eq rayùq taî lhûm bum akô nghut ri.
32 Agripa gi, Hpesitu lé, “Shí yùq gi, yhang mai Kehtaq chyáng jé râ ga a taî tô é nghut le gi, yhang lé wó nhang pyám berâ nghut lhê.” ga taî ri.