Garúm Râ Byù Nyhit Yùq Lé Hkyin Yu É Hkyô
6
Ahkuî, chángzô pé myô jàt lo nyi é buìnyì pé má, Grik dang nyo é Yudaq byu pé gi, yhángmòq é chuimó myhî pé lé, nyí wui lhê é gàm tso gàm huq é hkyô má rago a wó kut kô é yánmai, Hebre myíng mu é Yudaq byu pé lé mara hûn dang taî bum akô. 2 Haú hkûn, lagyo raxe í yùq gi, chángzô pé lhúnglhâng bang lé wùt yù mù, “Ngá-mòq, Îwa Garai Gasâng é mungdang hko kyô é múzó lé rap pyâm to mù, zangbó amû lé za lajâng nyi é nghut le gi, a htuk râ nghut lhê. 3 Haû mù luî, gu-mang wuì ê, Chyoiyúng Sô byíng é eq hpàqchyî byéng-yá bo é nhik bô byù nyhit yùq lé núngmòq chyáng mâ é hkyin to keq. Haú bang lé múzó shí lhum hun to râ nghut lhê. 4 Ngá-mòq kúm gi, kyûdûng é hkyô eq mungdang hko é hkyô lé za, nòqzùq tung kut nyî râ nghut lhê.” ga taî akô.5 Dang haû lé shiwa byù lhúnglhâng bang gyô htuk kômù luî, lùmjíng myìt kô é, Chyoiyúng Sô byíng é Sitehpan ga sû eq, Hpilip, Prokoru, Nikanora, Timun, Parimena, Yudaq noqkuq htûng má lhing wang lò bê sû Anti-oku wà mó mâ é Nikolaq pé lé hkyin yù mù, 6 lagyô pê chyáng shuî ló akô; lagyô pé gi, kyûdung byi kômù, yhángmòq lé lòq ke byî akô nghut ri.
7 Garai Gasâng é mungdang gi, je myô jam lò luî, Yerusalem wà mó má chángzô pé gyai myô jàt lawán lo é htoq agó, hkyangjông pé myo myo le, haû lùmjíng hkyô má châng nyi bum akô.
Sitehpan Chyup Yû Huî É Hkyô
8 Ahkuî, Sitehpan gi, Garai Gasâng é jeju chyûnghuq eq wum-o a-tsam byíng nyi é nghut mù, byu pê é hí má maúhpo múzó pé eq maúhpo alhô agàn mó pé tûn shit ri. 9 Haú hkûn, lùthkyô ga bâng é târâjong eq sêng é Kuruni, Alesandri-a eq Kiliki, Asi-a mau mâ é bang ra-am gi, toq mù, Sitehpan eq dang chyin chyîn lhûm akô. 10 Nghut kôlhang, Sitehpan é dang gi, Chyoiyúng Sô lom é hpàqchyî dang nghut é yánmai, yhángmòq a ûng kó nghut ri.
11 Haû mù, yhángmòq gi, “Shí yùq, Mosheq eq Garai Gasang lé rhoî dang taî nyi é lé, ngá-mòq wó gyô ri.” ga luî, mhaû taí nhâng râ byù haq lung tô akô.
12 Haû mù, yhángmòq gi, mingbyû wuì eq nhik bô sûwún wuî, târâ sará pé lé, chun htau mù, Sitehpan lé chyup yû nhâng luî, Yudaq byìn tú wàpdòq má shuî nyhi tô akô. 13 Mhaû é sàksé byu pé lé le lhoqhâng kat luî, haú bang gi, “Shí yùq, shî chyoiyúng jowòa eq jep é târâ lé shut shai é dang ru taî nyi ri. 14 Nazaret wà byù Yesuq ga sû gi, jowò shî lé hpyoq pyám mù, ngá-nhúng lé Mosheq èq byî tô é htûnghking lé htaî pyám râ nghut lhê ga luî, yhang taî é dang lé ngá-mòq wó gyô é nghut lhê.” ga taî akô.
15 Haû Yudaq byìn tú wàpdòq má zung to bang bànshoq, yhang lé chôm wú tsuq nyî kô é hkûn, yhâng é myòqdong gi, maumang lagyô é myòqdong su dùt é lé, yhángmòq myang akô nghut ri.