Sitehpan Taî É Dang
7
Haú hkûn, hkyangjong mó gi, “Dang haú pé têng lhê lhú?” ga luî, yhang lé myi jáng, 2 Sitehpan tû taî é gi, “Gu-mang wuì eq îwa wuì ê, gyô wú keq, ngá-nhúng lhúnglhâng bâng é îchyí Abraham gi, Haran wà má a ló nyî shi lé, Mesopotami-aq mau má nyi tô ashî hkûn, hpungwup shingkang bo é Garai Gasang gi, yhâng chyáng lé htoq shit mù, 3 ‘Náng é ming eq náng é a-myû mai htoq ló luî, ngò tûn shit râ nghut é ming shut e ló aq.’a ga luî, yhang lé taî ri.4 Haû mù, yhang gi, Hkalade byu pê é mau mai htoq ló luî, Haran wà má ló nyi nyi ri. Yhâng wa shi byùq é htâng má, Garai Gasang gi, ahkuî, núngmòq nyi nyi é ming shî má yhang lé htòt lô nhâng bê nghut ri. 5 Garai Gasang gi, shí ming má yhang lé silî wunlî nghû râ, hkyî rahkô nang î é myigùng lháng a byî é nghut kôlhang, yhang, zodù lháng a wó shi mai, yhang lé le, yhâng é awùt ashîn pé lé le, maumyî shî byi râ ga danghtum htûm to bê nghut ri. 6 Hau htoq agó, shí hkyô lé Garai Gasang xoq taî é gi, ‘Náng é awùt ashín pé, tûngbaù ming má bíng nyî mù, haú ming bâng èq myi shô zàn jùn zô é eq zing-rî é lé hui kôrâ. 7 Nghut kôlhang, yhángmòq lé lhom jùn zô é a-myû lé le, ngò jéyáng râ nghut lhê.’ gâ ri. ‘Haú hkûn, yhángmòq gi, haú ming mai htoq lô mù, jowò shî má ngo lé noqkuq kôrâ nghut lhê.’b ga le, Garai Gasang taî ri. 8 Hau htâng, yhang lé ahpyo-kuq hpyit byi râ hkyô eq sêng é dangshikaq le, byî ri. Haû mù, Abraham gi, Isak lé hku é htâng shit nyí buìnyì má ahpyo-kuq hpyit byî ri; Isak gi, Yakup lé hkû mù, Yakup gi, îchyí îwa achyûng raxe í yùq lé hku kat bê nghut ri.
9 Haû îchyí îwâ pé gi, Yosep lé manôn kôluî, Egutuq ming shut jùn dông ûng kat akô. Nghut kôlhang, Garai Gasang gi, yhang eq rahá nghut nyì mù luî, 10 wuîhke jamjau bànshoq mai yhang lé lhoqlhut yû mù, Egutuq hkóhkâm Hpara-uq é hí má le myòqdong wó, hpàqchyî byéng-yá le bò nhang é yánmai, hkóhkâm haû gi, Egutuq ming eq, yhâng é hkóhkâm wâng bànshoq lé ùp nhang ri.
11 Haú u lé, Egutuq ming eq Hkanan ming bànshoq má mùtmó gyó lô mù, wuîhke jamjau mó hui bekô. Ngá-nhûng é îchyí îwâ pé le zoshuq a myang hô zo lo dùt byùq bekô nghut ri. 12 Ahkuî, Yakup gi, Egutuq ming má gùqzò jòq é hkyô lé wó gyo jáng, ngá-nhûng é îchyí îwâ pé lé sânghî dàm ê nhang ri. 13 Htang dàm dum e é hkûn, Yosep gi, yhang gu yhang mâng pé lé yhang ó nghut é hkyô taî kyô ri. Hpara-uq le Yosep é yhûmbyù i-kun hkyô lé sê yù byi bê nghut ri. 14 Hau htâng, Yosep gi, yhâng wa Yakup eq yhûmbyù bànshoq nyhit xe ngo yuq lé, yhâng chyáng pying yù bê nghut ri. 15 Yakup le Egutuq ming má jé gyó ló luî, yhang eq ngá-nhûng é îchyí îwâ pé gi, bànshoq haú ming má shî ló byùq bekô nghut ri. 16 Yhángmòq é màng lé gi, Shehkem wà má yu taû ló mù, Shehkem wà mâ é Hamora é yhang zo yhang shû pê chyáng mai, Abraham èq ngùn byi mù wui hpyit tô é lùpdùng má ló myhup tô akô nghut ri.
17 Abraham lé Garai Gasang danghtum htûm tô é hkyô dìk râ ahkyíng jé lo nyi é u lé, 18 ngá-nhûng é a-myû gi, Egutuq ming má Yosep lé a sê é hkóhkâm nyi htoq é pyàt jé shoq, myoluq jebe lò bekô nghut ri. 19 Hkóhkâm hpó haû gi, ngá-nhûng é a-myû htoq má a ge é hpàqchyî haq htûng luî, nyheqnú pé lé shi byùq sháng gàq ga, dú pyám nhang é dông mai ngá-nhûng é îchyí îwâ pé lé zing-ri bê nghut lhê.
20 Haû u má, Mosheq lé hku to bê. Yhang gi, Garai Gasâng é hí má gyai yúnglhô é sû nghut ri; yhang gi, yhâng wâ é yhûm má lha-mó sum hkyap baú tô é hui mù, 21 htòt tô tô é hui jáng, yhang lé Hpara-uq é byìzô èq xe yù mù, zo sîng kut yû luî, hku kô ri. 22 Mosheq gi, Egutuq ming mâ é hpàqchyî byéng-yá bànshoq lé mhoq yû luî, nhut shô a-tsam eq hkyî lòq a-tsam gyai bò sû nghut ri.
23 Yhang chyungxe zànwut myi xê zàn jé lò jáng, yhâng é gu-mang Isira-elaq byu pê chyáng ê kûm wú râ matú wó myìt htoq kat ri. 24 Ê jé jáng, zing-ri huî nyi é sû rayùq lé ê myâng luî, haú yùq lé búng mù, zing-rî nyi é Egutuq byù lé, lòqchoq hpuq é dông sat pyâm ri. 25 Mosheq gi, yhâng é byu pé lé yhâng é lòq dông Garai Gasang hkyi yù hkyô byî nyi é lé, yhâng é a-myû pé sê gyo byi nhô ngàm kôlhang, yhángmòq a sê gyo byi kó nghut ri. 26 Htang nyí lé, Isira-elaq byù yhangchang mabyòq htoq nyi é má, e ang mù, yhángnhik lé pyîn naù luî, ‘Ahkaû nhik ê, gu-mang yhangchang shèq ru nghut lhê nhîng, haî mù rayùq eq rayùq byòq lhûm nyi akô lhú?’ ga taî ngón wú ri.
27 Luzúm hpó lé zing-rî nyì sû yùq gi, ‘Ngá-mòq é ahtoq má zau eq târâ agyì kut râ matú, nang lé ó yùq hkyin tô é lhú? 28 Anyí-nàp Egutuq byù lé sat pyâm é su, ngo lé le sat pyám nau ri lhú?’c ga luî, tû taí uchyang yhang lé dûn chyûn pyâm ri. 29 Mosheq gi, dang hau é yánmai, hpâng luî Midi-an ming má ê nyi byùq ri. Haú má yùqzo í yùq ê wó ri.
30 Haú ming má myi xê zàn lai jáng, Sinaq Bùm yàm, yòso hkaû mâ é myi gyúng tô é mhanpúng mai, maumang lagyo rayùq gi, Mosheq lé htoq shit ri. 31 Mosheq gi, haû lé myàng jáng, hau é yánmai maú luî, wú wú râ ga huî e ló le, Yhûmsing é htê htoq lo é gi, 32 ‘Ngò gi, náng îchyí îwâ pê é Garai Gasang, Abraham, Isak, Yakup é Garai Gasang nghut nyi lhê.’d gâ ri. Mosheq kúm gi, gyùq nán luî, a wám tu wú nghut ri.
33 Haû Yhûmsîng gi, ‘Náng é hkyî-tsung hkyut pyám aq, nàng yàp tô é jowò gi, chyoiyúng é myigùng nghut lhê. 34 Egutuq ming má ngá é a-myû pé zìk zo huî nyi é hkyô lé, ngò gè gè yhang myàng bê; yhángmòq é ngaù nhik ngaù htê lé ngò wó gyo bê; yhángmòq lé hkyi yù râ matú ngò gyó lé é nghut lhê; ahkuî, lé aq, ngò, nang lé Egutuq ming shut nhang taû kat râ.’e ga luî, yhang lé dum taî ri.
35 Yhángmòq èq, ‘Zau eq târâ agyì kut râ matú, nang lé ó yùq hkyin tô é lhú?’ ga luî he-ngìk pyâm é Mosheq lé yhang, mhanpúng má htoq shit é maumang lagyo dông mai, Garai Gasang gi, yhángmòq é zau eq hkyi yù sû kut nhâng luî, taû nhang kat é nghut ri. 36 Haû Mosheq yhang, Egutuq ming má le, Nhông Nè má le, yòso hkaû pé má le, myi xê zàn gyoro má maúhpo múzó pé eq maúhpo alhô agàn pé tûn shit uchyang, yhâng é byù myû pé lé Egutuq ming mai shuî htoq ló ri.
37 Isira-elaq byu pé lé, ‘Garai Gasang gi, núngmòq é matú, ngò eq du é myìqhtoi rayùq, nunggu nungmâng pê chyáng mai nyi htoq lô nhâng râ nghut lhê.’f ga luî, taî tô é sû le Mosheq yhang nghut ri. 38 Yòso hkaû má nghut nyi ashî hkûn lé, shiwa byù hpúng má, Sinaq Bùm má yhang lé dang taî é maumang lagyo eq le, ngá-nhûng é îchyí îwâ pé eq le rahá nghut sû gi, yhang yhang nghut nyi ri; ngá-nhúng lé àp byi râ chyungxe dui é mungdang lé lhom yu é sû le, yhang nghut nyi ri.
39 Nghut kôlhang, ngá-nhûng é îchyí îwâ pé kúm gi, yhâng é dang lé a kâm gyo kômù, yhang lé he pyám luî, Egutuq ming shut taú nau é myìt bo bum akô. 40 Haû mù, Arun lé, ‘Egutuq ming mai ngá-nhúng lé shuî htoq lo é Mosheq gi, haî dùt byùq bê làq ngá-mòq a sé; haû mù, ngá-nhûng hí má bo so byi râ hparà saí byi aq.’g ga taî akô. 41 Haú buìnyì pé má, yhángmòq gi, nojûng zo lhô saí mù, alhô haû lé hkungga nhông byi uchyang, yhángmòq é lòq èq saî tô é múzó jizó má gabú nhik dìk nyi akô. 42 Haû mù luî, myìqhtoî pê é laiká má kâ tô é gi,
‘Isira-elaq byu pé ê, myi xê zàn yhang yòso má chung é shigu eq hkungga gi, ngo lé nhông byî é nghut akô lhú?
43 Núngmòq gi, núngmòq noq râ matú saî yu é alhô, Molek é zúm eq Rehpan hpara é kyî lé shèq, wàq lhing wún kô é yánmai,
Babelon lai shoq ngò núngmòq lé lhoqlhâm pyám râ nghut lhê.’h
ga luî, bo tô é eq rajung za, Garai Gasang gi, yhángmòq chyáng mai myòqdong lhing pyám mù, mauhkûng htoq mâ é buì, kyî, lha-mó pé lé noqkuq râ matú àp pyám bê nghut ri.
44 Mosheq lé, nàng myang é azòng eq rajung za saí aq ga, Garai Gasang taî é dông saî tô é sàksé zúm lé, haû yòso má ngá-nhûng é îchyí îwâ pé wó yû bekô nghut ri. 45 Haû mù, ngá-nhûng é îchyí îwâ pé gi, yhángmòq é myòq hí mai Garai Gasâng èq hkat htoq pyám byî é byù myû pê é mau má, Yoshuq eq rahá wang nyi ló kô é hkûn, sàksé zúm haû lé yu wang ló akô. Haû gi, Dawiq é pyàt jé shoq jòq to bê nghut ri. 46 Dawiq kúm gi, Garai Gasâng hí má myòqdong wó sû nghut mù luî, Yakup é Garai Gasâng matú nyì jowò saí râ ahkáng dung kôlhang, 47 Sholumon èq shèq saí bê nghut ri.
48 Nghut kôlhang, Myhang htáng htum Sû gi, byu é lòq èq za saî é yhûm má nyi é a nghut, haú hkyô eq séng luî myìqhtoi hpó taî tô é gi,
49 ‘Mauhkûng gi, ngá é zùng tánghkuq, myigùng gi, ngá é hkyî nang jang nghut nyi lhê;
ngá é matú hkâsû é yhûm saí byi shi kôrâ lhú? Ngò nô yù râ jang gi, hká má nghut kôrâ lhú?
50 Haû bànshoq lé ngá é lòq èq baú saî tô é a nghut kó lhú? ga luî, haû Yhûmsîng taî ri.’i
gâ ri.
51 Myìt htân mù, i‑myìt eq nohkyap má ahpyo-kuq a hpyit é bangj ê, núngmòq gi, núngmòq é îchyí îwâ pé su, Chyoiyúng Sô lé hkâ-nhám le lhom he-ngìk pyâm nyi akô; 52 Núngmòq é îchyí îwa pê èq a zing-rî wú é myìqhtoi, ó yùq wá nyi lhê lhú? Haû Díngmán Sû nyi htoq râ hkyô lé hko kyô é bang lé, yhángmòq sat pyâm é chyat nghut akô; ahkuî, núngmòq le, haû Díngmán Sû lé àp pyâm é bang eq sat pyâm é bang nghut nyi akô. 53 Maumang lagyô èq shit kyo byî é târâ lé núngmòq wó yû kôlhang, haû lé a cháng kó nghut ri.” gâ ri.
Sitehpan Lé Lùqgòk Èq Dú Sat É Hkyô
54 Haú hkyô lé yhángmòq wó gyo kôjáng, yhángmòq é nhiklhum má lûm htaû záng kô é yánmai, Sitehpan lé, zuì wang ngàt kyáng shoq wú nhik-yô nyi akô. 55 Sitehpan kúm gi, Chyoiyúng Sô byíng mù, mauhkûng shut tu wú kat le, Garai Gasâng é hpungwup shingkang lé le, Garai Gasâng é lòqyo hkyam shut Yesuq yàp tô é lé le, myang ri. 56 Haû mù, yhang gi, “Wú keq, mauhkûng hpông tô é lé le, Garai Gasâng é lòqyo hkyam shut haû Byu Yhangzo yàp tô é lé le, ngò myang ri.” ga taî kat ri.
57 Haú hkûn, yhángmòq gi, htê mó o mó garu uchyang, yhûmsing é nohkyap xaû pyám mù, radá dâm yhang lé chôm htim kômù, 58 yhang lé wà mai she htoq ló kôluî, lùqgòk èq chôm dú ló bekô nghut ri; sàksé kut é bang gi, Sholuq gâ é zôram é hkyîwang má yhángmòq é buhîng pé lé hkyut bum tô akô.