Anani Eq Sahpira Nhik É Hkyô
5
Nghut kôlhang, Anani ga sû gi, yhang myi Sahpira eq rahá, yháng nhâm wó é maumyî ratóng lé ûng pyám luî, 2 yhang myi le bo sê é dông, ngùn haû ra-am lé gi, haq myhit yu to mù, ra-am lé za lagyô pê é hkyîwang má lé to byî akô.3 Haû mù luî, Petiruq gi, “Anani ê, Chyoiyúng Sô lé mhaû pyám râ matú eq, maumyî hpau mâ é ra-am lé haq yu to râ matú, haî mù luî, náng é myìt má Tsádán lé byíng nhang tô lhê lhú? 4 Maumyî haû jòq tô le, náng é zè nghut lhê a nghut lhú? Wó ûng é ngùn le náng é zè nghut ashî, a nghut lhú? Haî mù luî, nàng haú dông haq htung lhê lhú? Byù lé mhaû é a nghut, Garai Gasang lé mhaû pyám bê nghut ri.” ga taî ri.
5 Anani gi, dang haû lé wó gyo jáng, leng mù, shi byùq bê nghut ri. Haú hkyô lé wó gyô é bang bànshoq le, gyai yhang gyùq bùm bekô nghut ri. 6 Haú hkûn, zorâm wuì gi, toq mù, yhâng é màng lé htup luî, ê wàq myhup pyâm akô. 7 Hau htâng, sum hkyíng kô myáng jáng, yhang myi le, wang lé lo ri. Haû su dùt é hkyô lé gi, yhang a sé nghut ri.
8 Haú hkûn, Petiruq gi, “Ngo lé taî kyô wú aq. Núngnhik ûng é maumyî hpau gi, shí gû za nghut lhê lhú?” ga myi jáng, yhang gi, “Nghut lhê, haú gû za nghut bê.” ga tû taî ri.
9 Petiruq gi, “Núngnhik gi, haû Yhûmsing é Sô lé îsu kut chyam wú râ matú, hkâsu mù chôm myìt huî akô lhú? Wú aq, náng é yhûmsîng hpó lé ê myhup pyám bang gi, haû hkúmdong má jé bê; yhángmòq gi, nang lé le wàq htoq pyám kôrâ nghut lhê.” ga taî ri.
10 Radá dâm, yhang le lagyo hpô é hkyîwang má lêng shi byùq bê. Zorâm wuì le wang lo wú le, myiwe haû shi to láng é lé myàng kôluî, wàq ê mù, yháng lang é nàm má, ê myhup pyám bekô. 11 Hau é yánmai, haú hkun lhê é hpúng byû bànshoq bang eq, haû su dùt é hkyô lé wó gyo má wó gyô é bang gi, gyai yhang gyùq bùm bekô nghut ri.
Byù Myo Myo Lé, Lagyô Pé Lhoqgê Byî É Hkyô
12 Ahkuî, lagyô pé gi, mingbyû wui é hí má maúhpo alhô agàn eq maúhpo múzó myo myo lé, kut shit nyi akô. Haû lùmjíng bang gi, i‑myìt rahkat zâ èq, Sholumon jiròp má chôm hui hui kut bum akô. 13 Shiwa byu pé gi, yhángmòq lé hkúnggâ nyi bùm kôlhang, yhángmòq lé a wám ê zum bùm kó. 14 Nghut kôlhang, haû Yhûmsîng lé lùmjíng é myiwe yùqgè wuì gi, myo shèq myô jàt lò kômù, yhángmòq chyáng je myô jàt lò bê nghut ri. 15 Haû mù luî, byu pé gi, Petiruq laî lo é hkûn, yhâng é wùpzo za lháng rayùq yùq é ahtoq má záng sháng gàq ga, nòhpyo huî é bang lé, wà mâ é hkyô yàm má wàq htoq ê mù, yhuphpú pé eq taphkang pé má lheq tô akô. 16 Hau htoq agó, Yerusalem wá mó awui ayàm mâ é wà pé mai le, byù ajùm ayò gi, no é bang eq agè ashop é nàt wang zing-ri huî é bang lé shuî jé lé bum akô; haú bang lhúnglháng gi, lhoqgê lhoqyô byî é huî bum akô nghut ri.
Lagyô Pé Zing-ri Huî É Hkyô
17 Hkyangjong mó eq yhâng é luzúm wuî, Saduke hpúng mâ é byu pé kúm gi, gyai yhang wú mânon bùm kôluî, toq mù, 18 lagyô pé lé chyup yû luî, wà mâ é htóng má lhûng tô akô. 19 Nghut kôlhang, haú myîn lé, Yhûmsing é maumang lagyo rayùq gi, htóng hkum pé lé hpông pyám mù, yhángmòq lé shuî htoq yû uchyang, 20 “Núngmòq htoq ló mù, noqkuq yhûm má ê yàp to luî, chyungxe duì hkyô asik eq sêng é danglù bànshoq, shiwa byu pé lé taî kyo keq.” ga taî ri.
21 Nàpsûn myòqmyàng zó lé, yhángmòq gi, noqkuq yhûm má wàng mù yhángmòq wó gyô yu é eq rajung za, shiwa byu pé lé, mhoqshit hi ló akô.
Haú u lé, hkyangjong mó eq yhâng é luzúm wuî gi, Isira-elaq byu pê é sûwún wuî lhúnglhâng bang lé ji yù mù, Yudaq byìn tú wàpdòq chôm zung yù luî, lagyô pé lé ê shuî yù râ matú htóng shut byù nhang kat akô. 22 Haú bang kúm gi, htong má jé é hkûn, lagyô pé lé a myàng kôjáng, dum taû lò mù lo taî kyo kô é gi, 23 “Htóng hkum le ging ging myhî to láng ri, htóng zúng bang le hkum yâm má yàp tô akô. Nghut kôlhang, hpông wú le, ahkaû má ó le a nyi to lo nghut ri.” gâ ri. 24 Noqkuq yhûm zúng é zau hpó eq hkyangjong agyì wuì gi, dang haû lé wó gyo kôjáng, “Shí hkyô haî dùt lô râ lhú?” ga, gyai gyùq maú bum akô.
25 Haú hkûn, byù rayùq wang lé lô mù, “Wú keq, núngmòq èq htóng má lhûng tô é bang gi, noqkuq yhûm má yàp to mù byu pé lé mhoqshit nyi bum akô.” ga luî, yhángmòq lé taî kyô ri. 26 Haû mù luî, zau hpó haû gi, yhâng é a‑ô mâ é bang eq ê mù, lagyô pé lé ê shuî yu akô. Nghut kôlhang, shiwa byu pé lùqgòk èq dú lô kôrâ lé gyùq kô é yánmai, htân htân a wám kut kó nghut ri.
27 Lagyô pé lé shuî jé lô kôjáng, Yudaq byìn tú wàpdòq hí má yhángmòq lé nyhi tô akô. Haú hkûn, hkyangjong mó gi, 28 “Yesuq é myìng lé lang luî a mhoqshit râ matú, núngmòq lé, htan é hkunmó hkyô to bê nghut lhê. Nghut kôle, núngmòq mhoqshit é hkyô gi, Yerusalem wà mó jàm shoq, núngmòq kut bekô nghut luî, Yesuq é sui lé, ngá-mòq é ahtoq má ke byi râ haq htung nyi akô.” ga luî, yhángmòq lé taî akô.
29 Haú hkûn, Petiruq eq gótû lagyô pé tû taí kô é gi, “Ngá-mòq gi, byù dang lé gyo râ htoq má Garai Gasâng é mungdang lé je luî gyo râ dùt lhê. 30 Ngá-nhûng é îchyí îwâ pê é Garai Gasang gi, núngmòq èq tapzîng má lhâng sat pyâm é Yesuq lé, shi é mai lhoqdui toq kat bê nghut ri. 31 Isira-elaq a-myû lé, myìt lhîng hkyô eq mara hkyut byi hkyô hpóng byi râ matú, ùp é ahkáng wó Sû eq hkyi yù Sû kut nhâng râ ga, Garai Gasang gi, Yhang lé, Yhâng é lòqyo lòqa má wàq toq to bê nghut ri. 32 Ngá-mòq le shí hkyo é sàksé pé nghut nyi lhê; mungdang lé gyô yù luî châng é bang lé Garai Gasang byî tô é Chyoiyúng Sô le, shí pê é sàksé nghut lhê.” gâ akô.
Gamalela Hpàqchyî Byî É Hkyô
33 Yhángmòq gi, dang haú lé wó gyo kôjáng, lûm gyô nhik-yo naû kômù, lagyô pé lé sat pyám râ lháng myìt akô. 34 Nghut kôlhang, mingbyû bànshoq bâng é hí má xânghpoq nge wó é târâ sará Gamalela gâ é Hparishe rayùq, haû Yudaq byìn tú wàpdòq má toq yàp mù, lagyô pé lé razùp zo lhoqhtoq to nhâng luî, 35 yhang taî é gi, “Isira-elaq byu pé ê, shí bang lé hkâsu kut râ hkyô, rago za hí myìt wú keq. 36 Hkâsu mù gâ le, hí hpyang Htudaq gâ é byù rayùq nyi htoq lô mù, yhânggùng yhang byù mó rayùq yùq nghut lhê ga taí jáng, byù myi shô kô yhâng chyáng châng wú bekô. Yhang sat pyâm é hui luî, yhang htâng châng é lhúnglhâng bang le byo myín byùq kômù, haî le a wó kut dùt byùq akô nghut ri. 37 Hau htâng, myìng jihpán gùq yu é buìnyì má, Yudaq gâ é Galile byù rayùq nyi htoq mù, mingbyû wuì lé yhâng hkyam shut mhoq hpyoq yu ri. Yhang le sat pyâm é hui mù, yhâng htâng châng é lhúnglhâng bang le, byo myín byùq bekô nghut ri. 38 Ahkuî le, shí bang lé haî le hkâgon kó, yhángmòq kâm é dông nghut nyî kó sháng gàq; yhángmòq kut nyi é hkyô eq haq htung nyi é hkyô pé gi, byù myìt dông kut é nghut jáng, htên byòq byùq râ za nghut lhê. 39 Nghut kôlhang, Garai Gasâng chyáng mâ é nghut le gi, núngmòq wó lhoqhkyîng pyám kôrâ a nghut. Garai Gasâng é gyè shèq dùt lò kôrâ nghut lhê.” gâ ri.
40 Dang haû lé yhángmòq gyô htuk bum akô. Haû mù, lagyô pé lé wùt yù mù luî, nhuq bàt yù kômù, Yesuq é myìng lé lang luî mhoqshit é hkyô a ge kut râ nghut lhê ga taí kômù, nhang pyâm akô nghut ri.
41 Lagyô pé kúm gi, Yesuq é mying é yánmai ru hpuzô é hkyô gi, gíngdán nyi ri, ga myìt yù kômù, Yudaq byìn tú wàpdòq haû mai gabú myìt èq htoq ló bekô. 42 Hau htâng, yhángmòq gi, nyí wuî làng noqkuq yhûm má le, rayhûm htâng rayhûm má le, Yesuq gi, Hkrisidùq nghut é hkyô gabú danglù lé mhoqshit hkô kyô nyi akô nghut ri.