Petiruq Eq Yohan Nhik Chyup Huî É Hkyô
4
Hkyangjông pé, noqkuq yhûm zúng é sûwún hpó eq Saduke pé gi, Petiruq eq Yohan shiwa byu pé lé dáng nyo nyi é hkûn, htoq lé lô kômù, 2 yhángnhik, shiwa byu pé lé mhoqshit é eq, Yesuq é yánmai shi byùq bê bang Yesuq má dum dui toq lô râ gâ é hkyô lé taî nyì kô é yánmai, yhángmòq gyai yhang myìt myô nyi bum akô. 3 Haû mù, yhángmòq gi, yhángnhik lé chyup yû luî, myínhtâng mauchut lô bê nghut é yánmai, htang nàpkyó jé shoq htóng má lhûng tô akô. 4 Nghut kôlhang, mungdang lé wó gyô yu é bang myo myo gi, lùmjíng kômù luî, yùqgè ngo hkyîng kô jé shoq myô jàt lò bekô nghut ri.Yudaq Byìn Tú Wàpdòq Má, Yhángnhik Lé Myî Jep Wú É Hkyô
5 Htang nyí, yhángmòq é zau wuî, sûwún wuî eq târâ sará pé gi, Yerusalem wà mó má chôm huî zùp akô. 6 Hkyangjong mó Anna, Kayahpaq, Yohan, Alesanderi pé eq hkyangjong mó é a-myû pé bànshoq le, haú má bo tô akô. 7 Haû mù, yhángmòq gi, Petiruq eq Yohan lé gung gûng má nyhi to luî, “Núngnhik gi, haî a-tsam, ó yùq é myìng mai mû shî lé kut akô lhú?” ga myî akô.
8 Haú hkûn, Petiruq gi, Chyoiyúng Sô byíng tô é nghut mù luî, yhángmòq lé taî é gi, “Mingbyû wui é zaugun sûwún wuî ê, 9 hkyî hten sû shí yùq lé lhoqgê byî é jeju yánmai, yhang hkâsu kut lhoqge yù huî é hkyô lé, hkû-nyí núngmòq ngá-nhik lé myî gôn wú naû kô é nghut le gi, 10 núngmòq lhúnglhâng bang eq Isira-elaq byu pé bànshoq lé sé nhâng kôlé, núngmòq èq tapzîng má jén sat pyám mù, Garai Gasâng èq shi é mai lhoqdui toq yu é, Nazaret wà byù Yesuq Hkrisidùq é myìng mai, shî yùq gi, núngmòq é hí má îsu wáng wáng zán zán yàp tô é nghut ri.
11 ‘Yhûm saí bang núngmòq hkyin htoq pyâm é lùqgòk gi, htúngchyûn mâ é ahkyàk dik é lùqgòk dùt bê.’a
gâ é gi, Yesuq lé taî é dông nghut ri. 12 Hkyi yù hkyô gi, Yhang mai lai luî gótû a nyì lo, hkâsu mù gâ le, ngá-nhúng hkyi yu é hui râ matú, mauhkûng a‑ô má, Yhâng é myìng mai lai luî, xângzo byu pé lé byî tô é myìng gótû a jòq lô é yánmai nghut ri.” gâ ri.
13 Yhángmòq kúm gi, Petiruq eq Yohan nhik a gyùq a kyûm taî é lé myàng kôjáng, yhángnhik, jong a dòq wú é, mâyû byù za nghut é hkyô lé sé to kô é yánmai, maú nyi bum akô; nghut kôlhang, hí hpyang Yesuq eq zum wún wú su nhik nghut é lé, yhángmòq bûn kat akô nghut ri. 14 Hau htoq agó, lhoqgê byî é hui sû le, yhángnhik eq rahá yàp tô é lé, yhángmòq myàng kô é nghut mù luî, taí râ hkyô haî le a jòq lo kó nghut ri. 15 Haû mù, yhángnhik lé, haû Yudaq byìn tú wàpdòqb mai lhoqhtoq to mù, yhángmòq rayùq eq rayùq hpyê lhum kô é gi, 16 “Shí nhik lé hkâsu kut le gè râ lhú? Yhángnhik kut shit é làklaí alhô agàn gi, Yerusalem wà mó má nyi é lhúnglhâng bâng é hí má de za dùt bê nghut é yánmai, ngá-nhúng haú lé a wó hê lo nghut ri. 17 Nghut kôlhang, mingbyû wuì má shí hkyô je riyhang a byo myín ló sháng gàq, ahkuî mai myìng haû lé lang mù ó lé le a taî kyo lo râ matú, yhángnhik lé kyuq hkûm pyám sháng.” gâ bum akô.
18 Haû mù, yhángnhik lé dum wùt hâng yù luî, Yesuq é myìng lé lang mù, haî le hkâtaí, hkâ mhoqshit kó ga chôm hkûm akô. 19 Petiruq eq Yohan kúm gi, “Garai Gasâng é mungdang lé gyo râ htoq má, núngmòq é dang gyô le gi, Garai Gasâng é hí má gè râ, a gè râ lé, núngmòq yhang dòqdân yù keq. 20 Ngá-nhik kúm gi, myang yù, wó gyô yù bê é hkyô pé lé, a taî é, a wó nyî nghut lhê.” ga luî, yhángmòq lé dum tû taî akô.
21 Haú hkûn, yhángmòq gi, dùt laî lò bê hkyo é yánmai, shiwa byu pé Garai Gasang lé hkya-on kúngton nyi bùm kôluî, yhángnhik lé dàm byi râ hkyô a myàng kô é nghut mù luî, yhángnhik lé dum tân kyuq luî nhang pyám bekô nghut ri. 22 Hkâsu mù gâ le, haû làklaí alhô agàn dông lhoqgê byi huî é sû gi, chyungxe zànwut myi xê zàn chyân bê sû nghut é yánmai nghut ri.
Lùmjíng Bâng É Kyûdung Dang
23 Yhángnhik gi, nhang kat pyâm é hui kôjáng, yhángnhik é luzúm wui chyáng taû ló kômù, hkyangjong agyi pé eq sûwún wui èq yhángnhik lé hkyîm é dang bànshoq lé, ló taî kyô akô nghut ri. 24 Haú hkyô lé wó gyo kôjáng, yhángmòq gi, myìt rahkat zâ èq yhûmsing é htê lhoqko mù, Garai Gasang lé kyûdung kô é gi, “Mauhkûng eq myigùng, wuìshuq lung-aû eq, haú pé má nyì mî-nyî, jòq mîjòq lé hpan tô é, Ahko Ahkáng lhúnglháng wó Sû Yhûmsîng ê, 25 Nàng, náng é duìnhâng zoshâng, ngá-mòq é îchyí îké Dawiq é nhut mai, Chyoiyúng So èq taî tô é gi,
‘Tûngbaù a-myû pé gi, haî mù luî nhikjum yô nyi bum akô làq? Byu pé gi, haî mù luî akôm haq htung nyi bum akô làq?
26 Haû Yhûmsîng eq Yhâng é Hkrisidùq lé gumlau toq râ matú, mingkan hkóhkâm pé gi, toq mù, zau sûwún wuî eq rahá zùp zîng bum akô.’c
gâ ri. 27 Gè gè yhang, Herot eq Pontu Pilat nhik gi, tûngbaù pé eq Isira-elaq byu pé le mù, wà mó shî má chôm zîng to kôluî, nàng xû bùt byî é sû,d náng é Chyoiyúng duìnhâng zoshâng Yesuq lé gumlau toq râ haq htung nyi akô. 28 Náng é wum-o a-tsam eq nàng ô nau é dông dùt râ matú, hí hkûn mai nàng myìt hpyit dòqdân tô é hkyô lé, yhángmòq gi, kut pyám bekô nghut ri. 29 Yhûmsîng ê, ahkuî yhángmòq taî kyuq nyi é dang lé myàng byi laq ô! Náng é duìnhâng zoshâng wuì, a gyùq a kyum é myìt èq náng é dang lé taí râ matú wum-o byi laq! 30 Náng é wum-o bo é lòq lhâm kat luî, nòlì nòjàng lé lhoqgê byi mù, náng é Chyoiyúng duìnhâng zoshâng Yesuq é myìng mai, maúhpo alhô agàn eq maúhpo múzó pé lé kut shit làq ô!” gâ akô.
31 Haû su, kyû ban dung kôjáng, yhángmòq zîng tô é jowò gi, dui nún lô mù, yhángmòq lhúnglhâng bang gi, Chyoiyúng Sô byíng lô luî, Garai Gasâng é mungdang lé a gyùq a kyum é za taî bùm bekô nghut ri.
Azíng Zê Lé Chôm Gam Chûng Kô É Hkyô
32 Haû lùmjíng é lhúnglhâng bang gi, i-myìt rahkat za nghut nyi akô; ó yùq le, yhûmsîng wó é zè lé ngá é a gâ é za, bànshoq eq chôm gam chung nyi akô. 33 Lagyô pé le, haû Yhûmsîng Yesuq dum dui toq é hkyô lé a-tsam mó èq sàksé hkâm nyì kô é nghut mù luî, yhángmòq bànshoq bâng é ahtoq má jeju myo myo jòq nyi ri. 34 Yhángmòq chyáng a wó a lom é byù rayùq le a nyì kó. Hkâsu mù gâ le, maumyî ratóng wó é, a nghut jáng, yhûm wó é bang ó yùq nghut kôlhang, haú pé lé adàm dàm ûng pyám luî wó yu é ngùn lé gi, 35 lagyô pê é hkyîwang má lé to byî akô. Haû mù luî, a wó a lòm sû ó yùq lé le râ tô é eq rajung za gàm byî akô nghut ri.