HABAKUK
Laiká
(Habakkuk)
1
Myìqhtoi Habakuk myang é shing-rán gi, a-ô mâ é eq rajung za nghut ri.Habakuk Pùt É Dang Taî É Hkyô
2 Yhûmsîng Garai ê, ngò garúm wùt dûng nyi le,
hkâ-myháng jé shoq Nàng a gyo byi kut nyî râ lhú?
“Lú lhum bàt zìk hkyô baú ô!” nghû ngò Nang lé wùt dûng ngaù kôlhang,
Nàng a hkyi yù nghut ri.
3 Nàng gi, haî mù, ngo lé târâ a ràp-rá é hkyô myàng nhang lhê lhú?
Nàng gi, haî mù, myìt goí é hkyô kut nhang nyi lhê lhú?
Htên byòq hkyô eq lú lhum bàt zìk hkyô gi, ngá é hí má jòq to mù,
bàt lhum bàt cheq hkyô eq mabyòq jishûm hkyô byíng zan tô ri.
4 Haû mù, târâ gi, a dui byùq lo nghut mù,
târâ ràp-rá hkyô gi, hkâ-nhám le a htoq lo nghut ri.
Haû agè ashop sû gi, díngmán sû lé lóm to bê nghut é yánmai,
târâ ràp-rá hkyô gi, lhoqbyòk pyâm é hui bê nghut ri.
Yhûmsîng Garai Tû Taî É Dang
5 Haû Yhûmsîng Garai taî é gi, “Gótû byù myû wuì lé tu wú mù, rago wú tsuq luî,
hkyak yhang wú maú dàn keq.
Hkâsu mù gâ le, núngmòq lé taî kyo kôlhang,
núngmòq a jíng râ nghut é múzó lé,
núngmòq é i-pyàt má Ngò kut htoq râ nghut lhê.
6 Wú aq; haû shogyo myìt a bo é eq hân so hân dùn dùt mù,
yhûmsing é nyì jowò a nghut é lé sing yù râ matú,
myìdàm htoq gón má yông han lhing wún é Babelon byu pé lé,
Ngò lhoqtoq kat râ nghut lhê.
7 Yhángmòq gi, wú gyùq wú dân nhô zâ é byu pé nghut akô.
Yhángmòq é târâ gi, yhûmsing gùng yhang nghut bekô nghut mù,
yhûmsing matú xânghpoq nge wó nhang bum akô nghut ri.
8 Yhángmòq é myang pé gi, lo-ká pê htoq yang é nghut mù,
myín lhê é wàmhkuî htoq ashop bûm kó nghut ri.
Myang jî é bang gi, mau we mai lé lô kômù,
yhángmòq é gyè myang pé gi, byam gó bum akô nghut ri.
Yhángmòq gi, zoshuq lé zùn htîm é su,
gyaí yang akô nghut ri.
9 Yhángmòq bànshoq gi, zè lú zìk yù râ matú jé bum akô;
yhángmòq ajùm ayò gi, yòsô laì su htîm wàng kômù,
se-muî su myo shoq shúm byu pé lé shuî tsîng yu akô nghut ri.
10 Yhángmòq gi, hkóhkam pé lé taî hpoi mù,
zau wuî lé rhoî jihkyoî kut bum akô nghut ri.
Yhángmòq gi, gingtíng wà pé bànshoq lé wuìhô hkyô pyám byi mù,
gadùk pé du luî, haú pé lé zân yu bum akô nghut ri.
11 Hau htâng, yhángmòq gi, laì su laî ló mù, byùq byùq râ nghut lhê;
yhûmsing é wum-o lé, yhûmsing é hparà kut yu é byù gi, mara bò sû nghut ri.” gâ ri.
Habakuk Pùt É Dang Dum Taî É Hkyô
12 Yhûmsîng Garai ê, Nàng gi, ahtum abyùq mâ é Sû nghut lhê, a nghut lhí?
Ngá é Garai Gasang, ngá é Chyoiyúng Sû ê, Nàng gi, hkâ-nhám le shî râ a nghut.
Yhûmsîng Garai ê, Nàng gi, târâ jéyáng râ matú yhángmòq lé hkyin to bê nghut ri;
ngá Lungmó Zîng ê, Nàng gi, mara dam byi râ matú yhángmòq lé hkyin masàt to bê nghut ri.
13 Náng é myòqjí gi, agè ashop hkyô lé a ge wú loshoq, sansêng dik é nghut ri;
Nàng gi, kut shut râ lé a gyo Sû nghut ri.
Haû sû é wá, haî mù luî, Nàng, mhaú zo mhaú shuq hkyô kut nhang lhê lhú?
Nàng gi, haî mù luî, agè ashop sû mai,
yhâng htoq je díngmán sû lé myui pyâm nyi é hkûn, zîm byùq lhê lhú?
14 Nàng gi, byu pé lé, wuìshuq lung-aû mâ é ngozô pé su le,
zau a bo é dô yê jung su le, kut pyám bê nghut ri.
15 Babelon byù gi, yhángmòq lé ngo-nhê èq nhê yu nyi ri;
yhang gi, gun èq dú nghop mù, ngo-nhê èq lâng tsing yu nyi ri;
haû mù, yhang gi, gabú byam chyu luî, myìt ngón nyi ri.
16 Haû mù, yhang gi, yhâng é gùn lé hkungga nhông byi mù,
yhâng é ngo-nhe lé namngón shôm nyhê nhông byî ri;
hkâsu mù gâ le, yhang gi, yhâng é gun é yánmai sùtzè wó luî,
gyi gyi dau dau myàng zô nyi é nghut ri.
17 Yhang gi, yhâng é gùn mâ é ngozô pé lé gòt htoq pyâm nyì mù,
shogyo myìt a bo é za, gótû byù myû wuì lé lhoqhtûm pyâm nyì râ lhú?