Ninewe Wà Mó Dingnyé Wó É Hkyô
3
Sui lhoqshun é wà gi, dingnyé wó ri;wà haû gi, mhaû é hkyô byíng to mù,
lú zo lú shuq hkyô byíng zân luî,
myàq zo myàq shuq é hkyô ayang jòq nyi ri!
2 Nuìchum èq bàt é htê,
lhêngchap mying é htê,
myang pé din gó é htê eq
gyèlhêng din lhing é htê pé jòq nyi ri.
3 Myang ji gyè htîm lhum,
shâm pé làp làp dùq,
lhâm pé wìk wìk dùq dùt nyi ri.
Sat huî é gyai myo mù,
màng bum zang to luî,
màng a ung nghap lo mù,
byu pé gi, màng haú pé má htûng lèqbàt akô nghut ri.
4 Haû gi, bùt hpyit bâng é yhûmsîng myhí nghu é,
shiwa myhî é ô naù gadaú hkyo é yánmai nghut ri;
yhang gi, byù myû wuì lé yhâng é shiwa myhí kut hkyô shut lâng nghoq yû mù,
shiwa byu pé lé yhang mhántán lòklèq kut é hkyo èq jùn kut yu é nghut ri.
5 Haû Wum-o a-tsam dìk shoq bò Sû Yhûmsîng Garai taî pyo é gi,
“Ngò, nang lé htuqhtíng râ nghut lhê.
Ngò gi, náng é hpyî-tsang lé náng é myòqdong má tu nghop pyám byi râ nghut lhê.
Ngò gi, byù myû wuì lé náng é gùngchîn tûn shit mù,
mîngdán pé lé náng é hoq hpu hkyô shit râ nghut lhê.
6 Ngò gi, nang lé achaq achyut hkyô dú gyun mù,
agòt a-û dùt nhâng luî, byu pé wú râ azòng dùt nhâng râ nghut lhê.
7 Haû mù, nang lé myang é bang bànshoq gi, náng chyáng mai hpâng luî,
‘Ninewe wà mó gi, htên gyòp bu-nhung!
Yhâng é matú ó yón ngaû râ lhú?’ ga taí kôrâ nghut lhê.
Nang lé nhiktíng byi râ byù, hká má myang hô râ lhú?” gâ ri.
8 Nàng gi, Nile Wuìlàng nàm, wui èq hkông lhîng tô é,
Htebe wà htoq je ge lhê lhú?
Wuìlàng mó gi, hau é gadùk dùt mù,
wuì pé gi, hau é wàhkûm nghut nyi ri.
9 Hkusha mau eq Egutuq ming gi, yhâng é a dàt htûm é wum-o nghut mù,
Put mau eq Libya mau gi, yhang eq byìn xoq é bang má lom nyi ri.
10 Nghut kôlhang, yhang gi, shúm dông chyup yu é hui mù,
shúm zung é hui bê nghut ri.
Yhâng chyáng mâ é nyheqnú pé gi,
wà hkyôchyûn hkangmó má htûng pyeq sat pyâm é huî akô nghut ri.
Yhâng chyáng mâ é xânghpoq nge wó bâng é matú hkyîn shosé shê byi kômù,
yhâng chyáng mâ é byù mó pé bànshoq gi, kyum hut é huî bum akô nghut ri.
11 Nàng le shuq wùt sû dùt râ nghut lhê;
nàng gi, hpang haq râ nghut mù,
gye pê chyáng mai nghêhkaû jowò hô râ nghut lhê.
12 Náng chyáng mâ é gingtíng jowò pé bànshoq gi,
sânghi ashi myhîng é hkohúm gâm pé eq dù mù,
haú lé nhún kôjáng, hkohúm-shi pé yòq gyó luî,
zo bâng é nhut má wàng râ nghut lhê.
13 Náng é gyè hpúng pé lé wú aq;
yhángmòq bànshoq gi, myiwe wuì su nghut bum ri.
Náng é mau mâ é hkum pé gi, náng é gye pê é matú,
làm shoq tsing hpông tô bum ri;
náng é hkumtáng pé gi, nyé gyó byùq bê nghut ri.
14 Gyè pé lóm hkyuq to râ buìnyi é matú wuì hkam to aq;
náng é gyèwap pé lé wum-o lhoqkîng to aq!
Tso-myî lé nâng nyhoq mù, tso-kyín htung saí luî,
tsohtung hput htoq àq!
15 Nàng gi, haú jowò má nyé gyó byùq râ nghut lhê;
shâm gi, nang lé sat htûm pyám râ nghut lhê;
haû gi, dinggám jûm su nang lé zô myui pyám kôrâ nghut lhê.
Nàng gi, ajùm ayo é dinggám nyuî su myô lò mù,
dinggám nê jùm su jàt lò sháng gàq!
16 Nàng gi, náng é wuìloq kut bang lé,
mauhkûng mâ é kyî pê htoq myo shoq byù du lhoqmyo bê nghut kôlhang,
yhángmòq gi, dinggám jûm su mîngdán lé zô shang pyám kômù,
dâng ló byùq kôrâ nghut lhê.
17 Nang lé zúng é bang gi, dinggám su nghut mù,
náng é zaugun wuì gi, dinggám jûm su nghut nyi ri;
haú bang gi, gyòq é ahkyíng u lé wàhkûm má tsuq bûm kôlhang,
buì htân jáng dâng ló byùq mù,
hká má nyi é lé ó a châng sé nghut ri.
18 Asuri hkóhkâm ê, náng é sau zúng bang gi, yhupmui nyi bum ri;
náng é xânghpoq nge wó bang gi, nô lèq bum ri.
Náng é byu pé gi, bùm pé má byo myín bum é nghut mù,
yhángmòq lé shuî tsîng é byù a nyì nghut ri.
19 Náng é dàm lé hai èq le wó lhoqgê râ a nghut;
náng é dàm gi, lûm kô byùq bê nghut ri.
Náng é hkyô eq sêng é lùdang lé wó gyô é bang bànshoq gi,
lòqpyuq bàt kôrâ nghut lhê;
hkâsu mù gâ le, náng é agè ashop hkyô lé a htûng hui zô é byù,
ó yùq wá nyi lhê lhú?