MIHKA
Laiká
(Micah)
1
Yudaq hkóhkam pé, Yohtam, Ahaza eq Hezeki-a pé ùp é u lé, Samariq eq Yerusalem eq séng luî Moreshet wà byù Mihka myang é shing-rán má, haû Yhûmsîng Garaî é mungdang yhâng chyáng jé é gi, a-ô mâ é eq rajung za nghut ri.2 Byù myû wuì bànshoq bang ê, gyô yù keq;
myìdàm htoq eq haú má nyì mî-nyî ê, gyo keq;
haû Ahko ahkáng lhúnglháng wó Sû Yhûmsîng Garai nghut é, Yhûmsîng gi,
Yhâng é chyoiyúng noqkuq yhûm mai,
núngmòq lé htuqhtîng é sàksé hkám byi sháng gàq.
Samariq Eq Yerusalem Lé Târâ Jéyáng Râ Hkyô
3 Wú keq; haû Yhûmsîng Garai gi, Yhâng é nyì jowò mai htoq mù,
gyó lé lô luî, myìdàm htoq mâ é myhang é bùm pé má sô nang râ nghut lhê.
4 Bùm pé gi, Yhâng é a-ô má nyé yui byùq mù,
langhkaû pé gi, myi yâm mâ é byoshung su le,
gampyoq mai gun chyûn gyó é wuì su le,
gòq gâng byùq bùm râ nghut lhê.
5 Haú pé bànshoq gi, Yakup târâ lu laî é eq
Isira-elaq byu pê é yubàk marâ é yánmai dùt é nghut ri.
Yakup lu laî é târâ gi, haí jung lhú?
Haû gi, Samariq wà kut é hkyô nghut lhê, a nghut lhí?
Yudaq é myhang é jowò pé gi, haí jung lhú?
Haû gi, Yerusalem wà mó nghut lhê, a nghut lhí?
6 Haû Yhûmsîng Garai gi, “Haû mù, Ngò gi, Samariq wà lé a-pyâng bùm kut pyám mù,
tsibyiq hkyâm saî é jowò kut pyám râ nghut lhê;
Ngò gi, yhâng chyáng mâ é lùqgòk pé lé langhkaû má hut bum pyám mù,
yhâng é a-pûn awang lé de de lhoqhtoq shit to râ nghut lhê.
7 Yhâng é hparà hpôlhô pé bànshoq gi, ajàp azo dùt shoq gyòp myha byùq râ nghut lhê;
yhâng é hparà yhûm mâ é chyûnghuq bànshoq gi, nyé gyó byùq râ nghut lhê;
Ngò gi, yhâng é hparà lhô azòng bànshoq lé lhoqhtên pyám râ nghut lhê.
Yhang gi, haú pé lé, shiwa myhí ahpau mai hkong tô é nghut mù,
shiwa myhí ahpau dông yhángmòq dum chûng kôrâ nghut lhê.” ga taî ri.
Ngau É Eq Iyon Yôn É Hkyô
8 Shí hkyo é yánmai, ngò gi, ngaùhkyûng ngaùyang kut mù, wùt garû ngaù râ nghut lhê;
ngò gi, hkyîchîn gùngchîn sô lhing wún râ nghut lhê;
ngò gi, dànghkui su û ngaù râ nghut mù,
hkungbup su yón ngau myhíng râ nghut lhê.
9 Hkâsu mù gâ le, Samariq hui zô é wúm gi,
wó lhoqge é jung a nghut;
haû gi, Yudaq mau má lháng byo myín ló luî,
ngá é byu pê é hkum nghut é, Yerusalem wà mó má lháng jé bê nghut ri.
10 Haú hkyô lé, Gahta wà má hkâtaî kyo kó;
hkâ-ngaû kó.
Bet Ohpra wà mâ é hpuílhup yô má goleng leng keq.
11 Shahpira wà má nyi é bang ê, gùngchîn dùt é eq hoq hpû é mai sô lai keq.
Zanan wà má nyi é bang gi, htoq lô kôrâ a nghut.
Bet Ezela wà gi, yón ngau nyi é yánmai,
nang lé a wó magûm lo râ nghut lhê.
12 Haû Yhûmsîng Garaî chyáng mâ é byò dàn byò sho hkyô gi,
Yerusalem wà mó mâ é hkum lháng jé bê nghut é yánmai,
Marot wà má nyi é bang gi, nyì ngón yùqyò râ matú,
myìt nò mù láng tô bum ri.
13 Lahkisha wà má nyi é bang ê,
yàng shoq wó din é myang lé myanglhêng hut keq.
Núngmòq gi, Zi-un Byìzô pê é yubàk mara hi é a-pûn awang nghut mù,
Isira-elaq byu pé târâ lu laî é hkyô gi, núngmòq chyáng byu myang é nghut ri.
14 Haû mù, núngmòq gi, Moreshet Gat lé,
gâng ló chyûnghuq byi kôrâ nghut lhê.
Akzip wà gi, Isira-elaq é hkóhkam pé lé,
mhaú zô é hkyô lhoqhtoq shit râ nghut lhê.
15 Ngò gi, Maresha wà má nyì bang núngmòq lé,
ùp sîng râ byù jé lé nhâng râ nghut lhê.
Isira-elaq mâ é hkúngga gíng é bang gi,
Adulam jowò shut hpang ê kôrâ nghut lhê.
16 Núngmòq myìt ngui é zodù wui é matú,
yón ngau é mai uxâm nyhâm pyám keq;
yhángmòq gi, shúm zung é huî byùq kôrâ nghut mù,
zùn su, yhûmsing gùng yhûmsîng uchyuí chyuí keq.