YONAQ
Laiká
(Jonah)
Yhûmsîng Garaî É Jì-no A Gyô É Yonaq
1
Amitai é yhang zo Yonaq chyáng, Yhûmsîng Garaî é mungdang jé é gi, 2 “Toq mù, haû hkìk é Ninewe wà mó shut hân ê luî, ê taî hkúm aq; hkâsu mù gâ le, yhángmòq é agè ashop hkyô gi, ngá chyáng jé hkyâng bê nghut ri.” gâ ri.3 Nghut kôlhang, Yonaq gi, Yhûmsîng Garaî chyáng mai hpâng luî, Tarishi wà shut htoq e ló ri. Yhang gi, Yopa wà má jé gyó ló le, Tarishi wà shut ló râ wuìsanghpo lé ê myang ri. Hau htâng, Yhang gi, ji hpau byi luî, wuìsanghpo má wàng mù, Yhûmsîng Garaî chyáng mai hpâng râ matú, Tarishi wà shut bo jî e ló bê nghut ri.
4 Nghut kôlhang, Yhûmsîng Garai gi, wuimau má laìdun mó nhang kat ri. Wuimau má laìdun mó lûm htan é yánmai, wuìsanghpo lháng htên byòq byùq râ su dùt bê nghut ri. 5 Haû mù, wuìsanghpo kon bang gi, gyai yhang gyùq bum kôluî, ó le ô é hparà lé wùt dûng bum akô. Hau htâng, yhángmòq gi, wuìsanghpo sóm sháng gàq ga, zè pé lé wuì hkaû shut wàq hkyô pyâm akô nghut ri.
Haú u lé, Yonaq gi, wuìsanghpo ahtê wàp má ló wang yhup ngón tô ri. 6 Haû mù, wuìsanghpo hkâng zau gi, yhâng chyáng ê luî, “Hkâsu mù, yhup ngón nyi lhê lhú? Toq àq, náng é Garai Gasang lé wùt dung aq! Ngá-nhúng a myùp shi byùq râ matú, Yhang, ngá-nhúng lé myìt byi âbe.” ga taî ri.
7 Hau htâng, wuìsanghpo kon bang gi, “Lé lô keq, ó yùq é yubàk yánmai, ngá-nhúng îsû é wuîhke jamjau hpuzô nyi é wó sé râ matú, hkyîn shosé she wú sháng.” ga rayùq eq rayùq taî lûm bum akô. Haû mù, yhángmòq hkyîn shosé she wú le, Yonaq chyáng ló âng ri. 8 Haû mù luî, yhángmòq gi, Yonaq lé, “Ó yùq é yánmai wuîhke jamjau shí lé ngá-mòq hpuzô nyi lhê lhú? Nàng gi, hai mú zui sû nghut lhê lhú? Nàng gi, hká mai lé lo é lhú? Nàng gi, hká mau mâ é nghut lhê lhú? Nàng gi, hai byù myû nghut lhê lhú? Ahkuî, ngá-mòq lé taî kyô wú aq.” ga myî bum akô nghut ri.
9 Yonaq gi, “Ngò gi, Hebre byù myû nghut lhê. Ngò gi, wuimau eq myigùng lé hpan to Sû, maúhkung é Garai, haû Yhûmsîng Garai lé noqkuq sû nghut lhê.” ga, yhángmòq lé tû taî ri.
10 Haû mù luî, yhángmòq gi, gyai yhang gyô gyùq bùm kômù, “Nàng haî mù îsu kut lhê lhú?” ga taî akô nghut ri. Hkâsu mù gâ le, yhángmòq gi, Yonaq taî kyo bê nghut é yánmai, Yhûmsîng Garaî chyáng mai yhang hpang wún é hkyô lé sê bùm kômù nghut ri.
11 Haû wuimau má laìdun mó je riyhang htan lo nyi é yánmai, yhángmòq gi, “Wuimau shî zîm ló byùq râ matú, nang lé ngá-mòq haî kut ra râ lhú?” ga yhang lé myî akô nghut ri.
12 Haú hkûn, yhang gi, “Ngo lé wàq toq yû mù, wuimau shut dú hkyô kat keq. Haû jáng, wuimau gi, núngmòq é matú zîm ló byùq râ nghut lhê. Laìdun mó shî gi, ngá é marâ é yánmai núngmòq chyáng jé tô é hkyô lé, ngò sê lhê.” ga tû taî ri.
13 Wuìsanghpo kon bang kúm gi, gin-gau yàm jé shoq ga, wó dùt é í kôn shi-kùt wú kôlhang, haû wuimau má laìdun hí lhê htoq je riyhang htan lo é yánmai, a wó kôn dàp ló kó nghut ri. 14 Haû mù luî, yhángmòq gi, “Yhûmsîng Garai ê, shí yùq é chyungxê é yánmai, ngá-mòq a shî sháng gàq; mara a bò su é sui yuichyîn gi, ngá-mòq chyáng a dàp sháng gàq ô; Yhûmsîng Garai ê, Nàng kúm gi, Nàng ô nau é eq rajung za, kut bê nghut ri.” ga haû Yhûmsîng Garai lé wùt dûng akô nghut ri. 15 Hau htâng, yhángmòq gi, Yonaq lé, wuimau shut wàq dang hkyô pyám bekô nghut ri. Haú hkûn, laìdun mó htan nyi é wuìmau gi, zîm ló byùq bê nghut ri. 16 Haû mù luî, byù haú bang gi, Yhûmsîng Garai lé gyai yhang gyùq hkúngga kôluî, Yhang lé hkungga nhông byi mù, danghtum htûm tô akô nghut ri.
17 Yhûmsîng Garai kúm gi, Yonaq lé lhom myhuî râ matú, ngo mó radu lé nhang kat ri. Yonaq gi, haû ngo mó wamdau hkaû má, sum nyí sum myîn yhang lúng to bê nghut ri.