NAHUM
Laiká
(Nahum)
1
Ninewe wà mó eq sêng é myìqhtoi dang. Elikosha byù Nahum é shing-rán laiká bùk.Ninewe Wà Mó Lé Yhûmsîng Garai Nhikjum Yô É Hkyô
2 Haû Yhûmsîng Garai gi, manôn sê é eq lató hpuq sê é Garai Gasang nghut ri;
haû Yhûmsîng Garai gi, nhikmó-yô é mai lató hpuq é nghut ri.
Haû Yhûmsîng Garai gi, Yhang lé htuqhtíng bang lé lató hpuq mù,
Yhâng é gye pé lé Yhâng é nhikmó-yo hkyô shit bê nghut ri.
3 Haû Yhûmsîng Garai gi, luì za nhikjum a yô é nghut kôlhang, hpungwup a-tsam mó bo lhê;
haû Yhûmsîng Garai gi, mara bo é sû lé dàm a byî é tô to râ a nghut.
Yhang gi, laìlhíng eq laìdun mai sô é nghut mù,
mhut pé gi, Yhâng é hkyî mâ é hpuílhup pé nghut ri.
4 Yhang gi, wuìshuq lung-aû lé tan mù, lhoqkân pyâm ri;
Yhang gi, wuìlàng pé bànshoq kân byùq nhang ri.
Bashan mau eq Hkarimela bùm gi, nyhuî kyuq byùq mù,
Lebanon bùm mâ é abó pé gi, shum byùq bê nghut ri.
5 Yhâng é yánmai, bùm pé gi, dui nún byùq luî,
kong pé gi, nyé yui byùq nyì bê nghut ri.
Myìdàm htoq, gè gè yhang, mingkan eq haú má nyi é lhúnglháng gi,
Yhâng é hí má gyùq nán ri.
6 Yhang nhikmó-yo jáng, ó yùq wó yàp to râ lhú?
Yhang nhikjum mó yo jáng, ó yùq wó jan râ lhú?
Yhâng é nhikmó-yo hkyô lé, myi su hut hkyô kat nyî mù,
lùqmó cham pé gi, Yhâng é hí mai gyòp byùq bùm bê nghut ri.
7 Haû Yhûmsîng Garai gi, gè Sû nghut mù,
wuîhke jamjau huî é hkûn nghêhkaû jowò nghut ri.
Yhang gi, Yhang lé lùmhkaû bang lé wú gon byî ri;
8 nghut kôlhang, Yhang gi, Ninewe wà mó lé,
wuìwúm mó èq lhoqhtûm pyám râ nghut mù,
Yhang lé gyè kut é bang lé, mauchut é mau má hkat hâng kat râ nghut lhê.
9 Haû Yhûmsîng Garai lé, Ninewe byù núngmòq htuqhtîng é hkyô haî lé nghut kôle,
Yhang lhoqhtûm pyám râ nghut lhê;
wuîhke jamjau hkyô dum htoq lô râ a nghut.
10 Núngmòq gi, zugyóm má tsing wé byùq mù,
yhûmsing é tsibyiq wing shuq wùt bùm luî,
kyuq huî é hkówá su nyé gyó pyám râ nghut lhê.
11 Ninewe wà ê, náng chyáng mai,
haû Yhûmsîng Garai lé agè ashop é dông htuqhtíng râ haq htung é eq
ashop é hpàqchyî htung é byù rayùq htoq lo ri.
12 Haû Yhûmsîng Garai shî su ga taî ri;
“Yhángmòq gi, wum htân mù, byù du myo kôlhang,
lhoqhtên pyâm é hui zo luî, byùq ló byùq kôrâ nghut lhê.
Ngá é byu pé ê, Ngò gi, núngmòq lé zing-ri bê nghut kôle,
htâng má zing-ri râ a nghut lo.
13 Ahkuî, Ngò gi, núngmòq é lìngzing mâ é yhâng é kyaú lé lhoqhkyop pyám byi mù,
núngmòq é hkyî-kyum tuijâng lé lâng hpyit pyám byi râ nghut lhê.” gâ ri.
14 Ninewe wà ê, nàng eq séng luî haû Yhûmsîng Garai shî su ga hkunmó hkyô tô ri;
“Nàng gi, náng é myìng wùn râ matú awùt ashín pé wó râ a nghut.
Ngò gi, náng é hparà hpôlhô pê é hparà yhûm má jòq é,
alhô zòng pé eq hparà hpôlhô pé lé lhoqhtên pyám râ nghut lhê.
Nàng gi, ashop é yánmai, Ngò gi,
náng é lùp hen to byi râ nghut lhê.” gâ ri.
15 Wú aq, nguì ngón hkyô taî pyô mù,
gabú danglù wun lé su é hkyî gi,
bùm pê é ahtoq má nâng tô ri!
Yudaq ê, náng é poî pé lé kut mù,
nàng dâkam tô é dang lé lhoqdìk aq.
Agè ashop é bang gi, náng chyáng lé chyîn wàng râ a nghut lo;
yhángmòq gi, chyut yhang lhoqhtûm pyâm é hui kôrâ nghut lhê.