Isira-elaq É Wuîhke Jamjau Mó
7
Ngò gi, dingnyé wó ri!Hkâsu mù gâ le, ngò gi, myhîng é shi hpyoq yu pyâm é eq
tsibyiq shigyó gùq yu pyâm é htâng má, shi châng ho é sû eq du ri;
zo râ tsibyiq shipaû le a jòq,
ngò myìt tuî nyi é sânghi myhîng é hkohúm-shi le a jòq nghut ri.
2 Jujúm sû gi, myìdàm htoq mai htûm byùq bê nghut ri;
i-myìt díng sû gi, rayùq lháng a nyi myìt to lo nghut ri.
Yùq hkangmó gi, sui lhoqshûn râ matú gyám nyi akô nghut ri;
yhángmòq rayùq eq rayùq gi, gun èq châng hkat gyám lhûm akô nghut ri.
3 Yhángmòq é lòq gi, agè ashop hkyô kut râ má kûng bum akô nghut ri;
zau hpó gi, chyûnghuq dûng ri;
târâ agyì gi, lòqhkaû lang zê yu ri;
ahkáng ayá wó sû gi, yhang myìt goí é hkyô lhoqhtoq shit ri;
haû mù, yhángmòq bànshoq bang gi,
hpàqchyî haq htung bum akô nghut ri.
4 Yhángmòq chyáng mâ é je ge é sû gi, zu myòq gàm eq du mù,
i-myìt je díng sû gi, zu hkyâm kyâm tô é htoq je wuî ri.
Nang lé zúng bâng èq sidìq byî é buìnyì nghu é,
Garai Gasang dàm byi râ buìnyì jé bê nghut ri.
Ahkuî gi, nàng nhúngnhâng byùq râ ahkyíng nghut bê nghut ri.
5 Náng é yhûmkyochang lé hkâ lùmhkaû;
luzúm hpó lé hkâ-myìt lum zing to.
Náng é tanghkoí má lèq tô é myiwe myhí lé lháng,
nàng taî é dang lé sidìq aq.
6 Hkâsu mù gâ le, yùqzo gi, yhâng wa lé a hkúngga kut mù,
byìzo gi, yhâng nu lé,
yhâng dùmó gi, yhâng mhoí lé, htuqhtíng râ nghut lhê;
yhûmsîng lé gyè kut é bang gi, yhûmsing é yhûmbyù wuî nghut ri.
7 Nghut kôlhang, ngò gi, haû Yhûmsîng Garai lé myìt myòqbyu nyi lhê;
ngò gi, ngá é Hkyi yù Sû Garai Gasang lé láng nyi é nghut lhê.
Ngá é Garai Gasang gi, ngo lé gyo byi râ nghut lhê.
Isira-elaq Dum Wó Toq Lô Râ Hkyô
8 Ngá é gyè hpó ê, ngá é hkyô lé hkâwú gabú!
Ngò gi, lêng gyòp kôle, dum toq râ nghut lhê.
Ngò gi, mauchut hkaû má zung to kôle,
haû Yhûmsîng Garai gi, ngá é maubó dùt râ nghut lhê.
9 Ngò gi, haû Yhûmsîng Garai lé mara kut shut bê nghut é yánmai,
Yhang, ngá é mú lé taí mù,
ngo lé târâ hpyit é buìnyì jé shoq,
Yhâng é nhikmó-yo hkyô lé hkâm zô nyì râ nghut lhê.
Yhang gi, ngo lé maubó má shuî wàng râ nghut mù,
ngò gi, Yhâng é díngmán hkyô lé myàng râ nghut lhê.
10 Haú hkûn, ngo lé gyè kut é sû gi, haú hkyô lé myàng râ nghut mù,
“Náng é Garai Gasang nghut é, haû Yhûmsîng Garai gi, hká má lhú?” ga,
ngo lé taî é myiwe myhí gi, hoq hpû é hui râ nghut lhê.
Ngá é myòq gi, yhang gyòp gyó é lé myàng râ nghut lhê;
yhang gi, ahkuî lháng, wà hkyô mâ é hkabap su,
nâng pyeq pyâm é hui zo râ nghut lhê.
11 Náng é wàhkûm saî é buìnyì jé râ nghut lhê;
haú buìnyì má, náng é maukyo pé wó lhoqlâm râ nghut lhê.
12 Haú buìnyì má, byu pé gi, Asuri mau eq Egutuq wà pé mai le,
Egutuq ming mai Uhprat Wuìlàng jé shoq mai le,
wuimau mai wuimau jé shoq mai le, bùm mai bùm jé shoq mai le,
náng chyáng lé jé bûm kôrâ nghut lhê.
13 Myìdàm htoq gi, haú má nyì bâng é yánmai le,
yhángmòq kut é hkyîzó lòqzó é yánmai le,
chamchyuîyuì dùt byùq râ nghut lhê.
Kyûdung Dang Eq Hkya-on Kúngtôn Dang
14 Myìhpún bo é mhan nú yô nghut é,
yòso mó má yhang baú baú nyi é,
náng é byu pé nghut é silî wunlî sau hpúng lé,
náng é dumbáng èq zúng aq.
Góhkun lhê su, Bashan mau eq Gile-at mau má
yhángmòq zo kó sháng gàq.
15 “Egutuq ming mai nàng htoq lo é buìnyì pé má su,
Ngò gi, yhángmòq lé maúhpo múzó pé tûn shit râ nghut lhê.” ga, haû Yhûmsîng Garai taî ri.
16 Gótû byù myû wuì gi, haú hkyô lé myàng mù,
yhángmòq é hpungwup a-tsam haî a nghut byùq é hkyô lé wó sé luî,
hoq hpû bùm kôrâ nghut lhê.
Yhángmòq gi, lòq èq yhûmsing é nhut lé nghop pyám râ nghut lhê;
yhángmòq é nohkyap gi, jìt byùq râ nghut lhê.
17 Yhángmòq gi, lhângmuì su le, myigùng htoq má dô yê é jung pé su le,
hpuílhup lé yòq kôrâ nghut lhê;
yhángmòq gi, yhûmsing é hkyûng mai
gyùq nán é èq htoq lô kôrâ nghut lhê;
yhángmòq gi, ngá-nhûng é Garai Gasang nghut é, haû Yhûmsîng Garai chyáng gyùq nán é èq lé kômù,
Náng é yánmai gyùq chiq bûm kôrâ nghut lhê.
18 Nàng eq du é Garai Gasang gi, ó nghut lhê lhú?
Nàng gi, Náng é silî wunlî pé mâ é nyi myìt gyó to bang lé,
yubàk mara lé hkyut pyám byi mù, yhángmòq târâ lu laî é hkyô lé lhut pyám byî ri;
Nàng gi, shogyo nhikmyin hkyô lé myìt nguì ô nau é nghut mù,
ahtum abyùq nhikjum yô nyi é a nghut.
19 Nàng gi, ngá-mòq lé dum shogyo nhikmyîn yù râ nghut lhê;
Nàng gi, ngá-mòq é yubàk mara lé nâng pyeq pyám mù,
ngá-mòq kut shut é mara pé lé, wuìshuq lung-aû mâ é nìk é jang má dú kat pyám râ nghut lhê.
20 Nàng gi, góhkûn mai ngá-mòq é îchyí îwâ pé lé dâkam to bê eq rajung za,
Yakup lé jujúm byi mù, Abraham lé chyitdàp myìt shit râ nghut lhê.