Isira-elaq Lé Yhûmsîng Garai Târâ Jéyáng Râ Hkyô
6
Haû Yhûmsîng Garai taî é dang lé gyo aq; Yhang gi,“Toq àq; bùm pê é hí má Ngá é hkyô lé dangnyhin nyhin aq;
nàng taî é hkyô, kong pé lé wó gyo nhâng àq.
2 Bùm pé ê, haû Yhûmsîng Garai mara taî hun é lé gyô yù àq;
rû gingtîng nyi é, myìdàm htoq é a-pûn awang ê, gyo aq.
Hkâsu mù gâ le, haû Yhûmsîng Garai gi, Yhâng é byu pé lé mara taî hûn râ hkyô jòq ri;
Yhang gi, Isira-elaq byù myû lé mara taî hûn râ nghut lhê.
3 Ngá é byù myû ê, Ngò gi, nang lé haî kut bê nghut lhê lhú?
Ngò gi, nang lé hkâsû é wòlai byi bê nghut lhê lhú? Ngo lé tû taî wú aq.
4 Ngò gi, nang lé Egutuq ming mai shuî htoq lô mù,
jùn mau mai hkyi yù bê nghut lhê mhaî.
Ngò gi, nang lé shuî-u râ matú,
Mosheq, Arun eq Miri-am pé lé nhang kat é nghut lhê.
5 Ngá é a-myû ê, Moba hkóhkâm Balak hpàqchyî htoq mù,
Be-ori é yhang zo Balam mai yhang lé tû taî é dang lé, myìtbun aq.
Haû Yhûmsîng Garai kut é díngmán hkyô lé nàng wó sé râ matú,
Shitim jowò mai Giligala jowò gyoro mâ é hkyôwuì lé myìtbun aq.” ga taî ri.
6 Ngò gi, haû Yhûmsîng Garaî é hí má hai chyûnghuq eq lé luî,
hkya-on wàq toq huî é Garai Gasang lé noqkuq râ lhú?
Myi nyhé hkungga pé eq razàn bò bê é no zo pé lé chûng mù,
Yhâng é hí má ngò lé râ lhú?
7 Haû Yhûmsîng Garai gi, saulo hkyîng mun eq
tsanlun xû wuìlàng ra-mun lé myìt nguì râ lhú?
Ngò gi, ngò târâ lu lai hkyo é matú, ngá é zo-mún lé nhông byi mù,
ngá é i-myìt nhiklhum mâ é marâ é matú, ngá é ûng gyó zo lé nhông byi râ lhú?
8 Waxâng zo ê, Yhang gi, nang lé
ge é hkyô tûn shit bê nghut ri.
Târâ ràp-rá é dông kut mù, shogyo nhikmyin hkyô lé chyitdàp luî,
i-myìt lhoqnyhûm mù náng é Garai Gasang eq rahá so râ mai lai luî,
haû Yhûmsîng Garai gi, nang lé haî dûng ashî lhú?
Isira-elaq Mara Kut Shut É Eq Mara Dam Byî É Hkyô
9 Gyo keq! Haû Yhûmsîng Garai gi, wà haúa lé wùt nyi ri;
Náng é myìng lé gyùq hkúnggâ é hkyô gi, hpàqchyî byéng-yá nghut ri. Yhang wùt taî é gi,
“Mhoqshit é dumbáng eq haú lé hen tô é Sû lé gyo aq.
10 Agè ashop su é yhûm má târâ a wang é sùtzè eq
a mán é bùng jòq ashî, a nghut lhí?
11 Ngò gi, a mán é jàng eq
htûng má a mán é joíshi chung é sû lé, gyo byi râ lhú?
12 Náng chyáng mâ é wó bang gi,
lú lhum bàt zìk é bang nghut bum akô;
náng chyáng mâ é mingbyû wuì gi, mhaû é bang nghut kômù,
yhángmòq é nhutshô gi, mhaú zo dang taî bum akô nghut ri.
13 Haû mù, ngò gi, nang lé lhoqhtên ló é nghut mù,
náng é yubàk marâ é yánmai, nang lé byòq yèq nhang é nghut lhê.
14 Nàng gi, zo kôlhang, gyi râ a nghut;
náng é wam gi, lháng lháng ru dut nyî shirâ nghut lhê.
Nàng gi, ho tsing kôlhang, wó to râ a nghut;
hkâsu mù gâ le, nàng hkong tô é lé lú yu pyám byi nhâng râ nghut lhê.
15 Nàng gi, kyô hkyó kôlhang, myang shû yù râ a nghut;
nàng gi, tsanlun shi lé pyik kôlhang, xû myang bùt râ a nghut;
nàng gi, tsibyiq shi lé nâng pyeq kôlhang,
tsibyiq wing myàng shuq râ a nghut.
16 Hkâsu mù gâ le, nàng gi, Omri é sângdang pé eq
Ahap é yhûm bang kut é bànshoq lé châng kut luî,
yhángmòq é htûngli bànshoq pé lé cháng bê nghut ri.
Haû mù, ngò gi, nang lé chamchyuîyuì dùt pyám nhâng mù,
náng é byu pé lé lùmù gànsang é hui zo nhâng râ nghut lhê;
nàng gi, byù myû wui èq wú tiq pyâm é hui zo râ nghut lhê.” ga taî ri.