Ninewe Wà Mó Lêng Gyop Râ Hkyô
2
Ninewe wà ê, nang lé bàt pyô râ byù jé lé bê nghut ri.Gingtíng jowò lé zúng to aq;
hkyô lé wú zúng aq;
yhûmsing hpyidum má hpyihit hit mù,
wum-o a-tsam lhoqkîng to aq!
2 Haû lhoqhten lhoqhpyoq bang gi, Yakup é awùt ashîn pé lé chamchyuîyuì kut pyám mù,
yhángmòq é tsibyiq nuî akoq pé lé hpyit pyám kôlhang,
haû Yhûmsîng Garai gi, Isira-elaq é hkìkhkâm hkyô lé su,
Yakup é hkìkhkâm hkyô dum taû wó nhâng râ nghut lhê.
3 Gyèzô pê é gòlong gi, ne é nghut mù,
sârhe pê é gyèhking gi, nè noq nòq é nghut ri.
Gyè zan râ rì rì nghut é buìnyì má,
gyèlhêng mâ é jòqtoq gi, dùq wìk ri;
htángmó sik lòq nghut é lhâm gi, tu toq to bê nghut ri.
4 Gyèlhêng pé gi, hkyô pé má dìng eq dàng eq ga din laî myhíng mù,
byù zîng é jowò má ê ê lò lò din lhing wún ri.
Haú pé gi, myidûm su dùq mù,
lhap su hpyat lhing wún bum ri.
5 Ninewe wà mó gi, yhâng é gyè hpúng pé lé ji yù kôlhang,
yhángmòq e ló é hkyô má htûng lèqbàt akô nghut ri.
Gyè pé gi, wàhkûm shut din htîm ê mù,
gòlong nghop pyâm tô akô nghut ri.
6 Wuì hkyô hkum pé gi, htûng hput pyâm é nghut mù,
hkóhkâm yhûm gi, htên gyòp byùq ri.
7 Hkunmó hkyô tô é eq rajung za, Ninewe wà mó gi,
shúm zung é hui mù, shuî ló byùq é hui luî,
yhâng é jùn myiwe myhî pé gi, hpûngkyui su yón ngaû mù,
yhûmsing é wànggàng bàt bùm akô nghut ri.
8 Ninewe wà mó gi, bùt shun pyâm é wuìhtum eq dù mù,
“No keq! No keq!” ga wùt taî ngaù kôlhang,
ó a lhing wú kó nghut ri.
9 Ngùn lé lú yû keq!
Hîng lé lú yû keq!
Hkong tô é zè pé eq hpaudap é sùtzè bànshoq gi,
a ung bàn nhô nghut ri!
10 Wà haû gi, chamchyuîyuì, haî le a jòq byùq,
htên gyòp to bê nghut ri!
Myìt wum pé gyuî byùq luî, hkyîhput pé kòk kòk nán byùq mù,
gùngdu gyùq nán byùq luî, myòqdong hkangmó abósôm mâ é dùt byùq bùm bê nghut ri.
11 Ahkuî, haû hkanghkyi hkup, hkanghkyi zô pé hô zô é jowò,
hkanghkyi lo hkanghkyi zìng eq hkanghkyi râm zô pé,
gyùq nó a râ é jowò su nghut é wà gi, hká má lhú?
12 Hkanghkyi lo gi, yhâng é hkanghkyi zô é matú lùq shoq lâng myha sat pyám mù,
yhâng é hkanghkyi zing é matú sho lé kyaq sat luî,
yhâng é lùqhkyûng pé má, sat é sho lhoqpyíng mù,
yhâng é hkup pé má, màng pé lhoqpyîng tô ri.
13 Haû Wum-o a-tsam dìk shoq bò Sû Yhûmsîng Garai taî pyo é gi,
“Ngò, nang lé htuqhtíng râ nghut lhê.
Ngò gi, náng é gyèlhêng pé lé myihkau dùt shoq myi nyhé râ nghut mù,
náng é hkanghkyi râm zô pé lé sham èq sat htûm pyám râ nghut lhê.
Ngò gi, myìdàm htoq má nang lé hai sho le myhit to byi râ a nghut.
Náng é lagyô pê é htê lé, hkâ-nhám le wó dum gyo râ a nghut lo.” gâ ri.