Yonaq 4

Yhûmsîng Garaî É Chyitdàp Shogyo Myìt Lé Nhikjum Yô É Yonaq

Nghut kôlhang, Yonaq gi, gyai yhang myìt a wú ngón mù, nhikjum yô nyi ri. 2 Haû mù luî, yhang gi, Yhûmsîng Garai lé, “Yhûmsîng Garai ê, ngò yhum mau mai a htoq lô shi má, Nàng îsu kut âbe nghû ngo taî bê a nghut lhí? Hau é yánmai, ngò gi, hân hân yhang Tarishi wà shut hpang e ló é nghut lhê mhaî! Nàng gi, jeju byi é eq shogyo nhikmyîn é Garai, luì za nhikjum a yô é eq chyitdàp myìt byíng é Sû nghut luî, ihkyùp byi râ mai myìt lhing é Garai nghut é hkyô lé ngo sê lhê. 3 Ahkuî, Yhûmsîng Garai ê, ngá é chyungxe lé wùp yù lo aq; kângsoq dui nyi é htoq má shi byùq é gi, ngá matú je riyhang ge ri.” ga kyûdûng ri.

4 Haú hkûn, Yhûmsîng Garai gi, “Nàng nhik-yo râ hkyô haî jòq lhê lhú?” ga taî ri.

5 Yonaq gi, haû wà mó mai buìhtoq hkyam jowò rawò shut htoq ê mù, ê zung tô ri. Haú jowò má yhâng é matú zúm saí mù, buìshûm hkau zung to uchyang, haú wâ má haî dùt lò râ laq ga láng wú nyi ri. 6 Haú hkûn, haû Yhûmsîng Garai Gasang gi, Yonaq é ulhum má buìshûm wó mù, yhang myìt hpêbu é hkyô zîm ló byùq râ matú, ûmchui gàm ragàm lé yùq kô lò nhang ri. Yonaq gi, agàm hau é yánmai gyai yhang gabú nyi ri.

7 Nghut kôlhang, htang nàpkyó myòqmyàng maubó zó má, Garai Gasang gi, bau radu lé nhang kat mù, haû ûmchui gàm lé nyhuî hkyuq byùq râ matú hkê hkyop nhang ri. 8 Buì htoq lô jáng, Garai Gasang gi, buìhtoq hkyam mâ é hkyíng hkyíng nyé é laì lé nhang kat mù, buì gi, Yonaq é ulhum htoq má lhap é yánmai, yhang gi, chut mòq byùq ri. Yhang gi, shî naù luî, “Chyungxe dui nyi é htoq má, shi le gi, ngá matú je riyhang ge ri.” ga taî ri.

9 Nghut kôlhang, Garai Gasang gi, Yonaq lé, “Agàm eq séng luî nàng haî nhik-yo râ jòq lhê lhú?” ga taí jáng, Yonaq gi, “Jòq lhê. Shi byùq râ su ga shoq nhik-yo nau ri.” ga tû taî ri.

10 Haú hkûn, Yhûmsîng Garai gi, “Ho le nàng a ho, yùq le nàng a yùq nhâng, ra-myìn má za yùq mù, ra-myìn má za dum shi nyhuî byùq é agàm lé, nàng ha bûn nyi ri. 11 Haû nghut le nhîng, yhûmsing é lòqyò lòqpai lháng a sê gam hkoq é byù rasên í mun nyi é htoq agó, shigu gaunyhaú pé le myo myo nyi é hkìk é wà mó shî eq séng luî, Ngò je riyhang ha bun gíng lhê a nghut lhú?” ga taî ri.