Byù Htung É Hkyô Pé Eq Garai Gasang Htung É Hkyô Pé
2
Yhûmsing é yhuphpyang htoq má agè ashop é hkyô haq htûng mù,yubàk mara kut hkyô haq hen é bang gi, dingnyé wó ri!
Yhángmòq gi, haú hkyô kut râ ahkáng ayá wó to kô é nghut mù,
nàpsûn myòq myang lò jáng haú hkyô lé kut htoq akô nghut ri.
2 Yhángmòq gi, yò pé eq yhûm pé lé myòqnòq mù,
lú sing yu pyám byî akô.
Yhángmòq gi, yhûmsîng wuì eq yhûmbyù wuì lé mò zo mù,
yhángmòq é silî wunlî maumyî lé lú yu pyám byî akô nghut ri.
3 Haû mù, Yhûmsîng Garai gi,
“Ngò gi, byù shí bang lé htuqhtíng râ byò dàn byò sho hkyô htung to bê nghut mù,
núngmòq gi, haú mai wó lùt htoq kôrâ a nghut.
Núngmòq gi, nghutbûn é myìt mai hkyô wó so kôrâ a nghut lo;
hkâsu mù gâ le, haû gi, wuîhke jamjau hpuzo râ ahkyíng dùt râ nghut lhê.
4 Haú buìnyì má, byu pé gi, núngmòq lé wuìzuì kut pyám mù,
‘Ngá-mòq gi, htûm byùq bu-nhung;
ngá é byu pé sing é zè pé lé gam yu pyám byi bu-nhung.
Yhang gi, haú pé lé ngá é lòq mai yu pyám byi bu-nhung!
Yhang gi, ngá-mòq lé ung zô é bang lé ngá-mòq é yò gàm byi bu-nhung!’ ga,
yón ngaû kôluî, wùt garu kôrâ nghut lhê.” ga taî ri.
5 Haû mù, hkyîn shosé shê luî maumyî gàm râ matú,
haû Yhûmsîng Garaî é shiwa hpúng má rayùq le nyì râ a nghut lo.
Myìqhtoi Pyoq Pé
6 Yhángmòq gi, myìqhtoî pé lé, “Myìqhtoi hkâhtoi kó;
shí hkyô pé eq séng luî myìqhtoi hkâhtoi kó;
hoq hpu hkyô gi, ngá-mòq chyáng jé râ a nghut.” ga taî akô nghut ri.
7 Yakup é awùt ashín pé núngmòq gi,
“Haû Yhûmsîng Garai gi, myìt a hîng dùt byùq é nghut lhê lhú?
Yhang gi, shí hkyô pé kut é nghut lhê lhú?” nghû taí ra kôrâ lhú?
Haú hkûn, “Ngá é mungdang gi,
i-myìt díng hkyô cháng su é matú ge lhê, a nghut lhí?
8 Ngá é byu pé gi, shí gyoro mai,
gyè hpó su toq bekô nghut ri.
Núngmòq gi, majan mai taû lo é bang su ngón za sô laî ló é bâng chyáng mai,
buhîng eq ahte mèbu pé lé hkyut shang yu pyám byî akô nghut ri.
9 Núngmòq gi, Ngá é byu pê chyáng mâ é myiwe wuì lé,
yhûmsing é nguì ngón é yhûm mai hkat htoq pyám kômù,
yhángmòq é zodù wui chyáng mai,
Ngá é shimân jeju lé ahtum abyùq yu pyám byî akô nghut ri.
10 Toq mù, ló byùq keq!
Hkâsu mù gâ le, a wó dum taû hkyi xe yù loshoq,
htên byòq byùq bê nghut mù, agòt a-û dùt pyám bê nghut é yánmai,
haû gi, núngmòq é bánno jang a nghut.
11 Mhaû é eq mhaú zô é sû gi,
‘Tsibyiq wing eq î agùn agó wó é hkyô eq séng luî,
Ngò, núngmòq é matú myìqhtoi htoi râ nghut lhê.’ ga taî é nghut jáng,
haú yùq gi, byù shí bâng é matú myìqhtoi dùt râ nghut lhê.
Hkyi Xe Yù Râ Matú Htûm Tô É Danghtum
12 Yakup ê, ngò gi, núngmòq bànshoq bang lé,
hkyak yhang, shuî tsîng yù râ nghut lhê;
Ngò gi, Isira-elaq byu pé mâ é nyi myìt tô é bang lé,
hkyak yhang, shuî tsîng to râ nghut lhê.
Ngò gi, sau hkup mâ é sau lé su le,
mhan nú yô mâ é sau hpúng lé su le, rahá zing nhâng râ nghut mù,
núngmòq é maumyî má byù byíng zan to râ nghut lhê.
13 Hkyô htong byî é Sû gi, yhángmòq é hí má dòq ê râ nghut lhê;
yhángmòq gi, hkum lé bàt hput mù, htoq ló kôrâ nghut lhê.
Yhángmòq é hkóhkâm gi, yhángmòq é hí mai laî ló râ nghut mù,
haû Yhûmsîng Garai gi, yhángmòq é ushuq nghut ri.” nghû taî é nghut lhê.