2
Ngò gi, mâchya má yàp mù,gingtíng wàhkûm mó pê htoq má jowò yù luî,
haû Yhûmsîng Garai mai ngo lé haî taí râ eq
ngò pùt é dang taî é lé hkâsu ga tû taî lò râ lé, láng wú râ nghut lhê.
Haû Yhûmsîng Garai Gyo Byî É Hkyô
2 Haú hkûn, Yhûmsîng Garai tû taî é gi,
“Shing-rán dang lé kâ to aq;
dìn mù nghap pyô sû wó nghap sháng gàq,
haú lé lùqlong pé má de de kâ tap to aq.
3 Hkâsu mù gâ le, shing-rán haû gi,
hkyin htoq tô é ahkyíng eq sêng é nghut mù,
ló htâng é hkyô lé taî é nghut luî, shut râ hkyô a jòq é nghut lhê.
Myáng nyî kôlhang, láng to aq;
haû gi, hkyak dùt lò râ nghut mù,
htâng gyó râ a nghut.
4 Wú aq, gyè hpó gi, myìt myhâng nghutbûn ri;
yhang myìt ô nau é hkyô gi, a díngmán nghut ri;
nghut kôlhang, díngmán sû kúm gi,
lùmjíng myìt mai chyungxe duì râ nghut lhê.
5 Hau htoq agó, yhang gi, tsibyiq wîng é yánmai, ashop é hkyô kut mù,
myìt myhâng nghutbûn é htoq agó, hkâ-nhám le a nô nyì nghut ri.
Hkâsu mù gâ le, yhang gi, moming su myòqnòq mù,
shî nò hkyô su hkâ-nhám le nhik a dìk nghut ri;
yhang gi, byù myû wuì bànshoq bang lé zing nhâng mù,
byù bànshoq bang lé shúm byû kut yu ri.
6 Nghut kôlhang, haú bang lhúnglháng gi, yhâng é hkyô lé wuìzuì tú mù, danglhîng mai rhoî dang taí kô é gi,
‘Haû hkaû yu é sùtzè lé hkong bum to mù,
zìk yù luî yhûmsing matú sùtzè wó nhang é sû gi, dingnyé wó ri!
Haú su hkâ-myháng jé shoq dùt nyì ra râ lhú?’ gâ akô.
7 Nang lé chyîn but bang gi, hân toq kômù,
bûn gyîng lò luî, nang lé kyuq nhán kôrâ a nghut lhú?
Haú hkûn, nàng gi, yhángmòq lú sing yu é zè dùt byùq râ nghut lhê.
8 Nàng gi, byù myû myo myo lé lú zo lú shuq kut bê nghut mù,
nyi myìt gyó tô é byu pé gi, nang lé lú zo lú shuq kôrâ nghut lhê.
Hkâsu mù gâ le, nàng gi, byu sui lhoqshun pyám byî é htoq agó,
mîngdán pé lé le, haú mâ é wà pé lé le,
haú pé má nyi é yùq hkangmó lé le, lhoqhtên pyám bê nghut ri.
9 Htên byòq hkyô mai wó lùt râ matú, myhang é jowò má sut saí mù,
a târa é sùtzè èq yhûmsing é yhûm saî é sû gi, dingnyé wó ri!
10 Nàng gi, byù myo myo htûm byùq râ matú hpàqchyî haq da bê nghut é yánmai,
náng é yhûmbyù wuì lé hoq hpu hkyô she háng byi mù,
yhûmsing é chyungxe lé lhoqshut pyám bê nghut ri.
11 Hkâsu mù gâ le, xêwâm mâ é lùqgòk pé wùt garû ngaù kôrâ nghut mù,
yhûm mâ é hkûng eq hkyâng pé tu byi râ nghut lhê.
12 Kângsoq sui lhoqshûn mù wà mó xuq é sû eq
târâ a chung é za wà xuq é sû gi, dingnyé wó ri!
13 Wú keq, byu pé zuî shi-kùt é gi, myi má nyé gyó pyám râ nghut é eq,
byù myû wuì zuî hkyik pyâm é gi, akôm za nghut é hkyô lé,
haû Wum-o a-tsam dìk shoq bò Sû Yhûmsîng Garai myìt hpyit tô é, a nghut lhí?
14 Hkâsu mù gâ le, wuì gi, wuìshuq lung-aû má byíng zan tô é su,
haû Yhûmsîng Garaî é hpungwup shingkang lé sê gyô é hkyô gi,
myìdàm htoq má byíng zan to râ nghut lhê.
15 Yhûmsing é yhûmkyochang pê é gùngchîn lé wó myâng râ matú,
yhang shuq wùt shoq yhûmsing é tsibyiq wing sho-kuq htûng mai,
yhûmkyochang lé tsibyiq wing hut huq é sû gi, dingnyé wó ri!
16 Nàng gi, xânghpoq nge wó râ a nghut é za, hoq hpû é shèq hui zo râ nghut lhê.
Ahkuî gi, nàng yhang shuq mù, gùngchîn dùt byùq sháng gàq!
Haû Yhûmsîng Garaî é lòqyo lòq mâ é gòm gi, náng é lhînghkyùq má jé bê nghut mù,
náng é xânghpoq nge wó hkyô gi, hoq hpu hkyô dùt byùq râ nghut lhê.
17 Lebanon bùm lé nàng zìk zo zìk shuq é hkyô gi, nang lé dum taû hup râ nghut mù,
nàng shigu gaunyhaú lé lhoqhtûm pyâm é hkyô gi, nang lé kyuq ngha pyám râ nghut lhê.
Hkâsu mù gâ le, nàng gi, byù sui lhoqshun pyám byî é htoq agó,
mîngdán pé lé le, haú mâ é wà pé lé le, haú pé má nyi é yùq hkangmó lé le,
lhoqhtên pyám bê nghut ri.
18 Lòqmú zui saí kung sû kyûng é hparà hpôlhô eq,
mhaû é hkyô mhoq shit é hparà hpôlhô gi, hai a-kyû bo ri lhú?
Hkâsu mù gâ le, haú lé saí sû gi, yhûmsîng saî é zè lé lùmhkau ri;
yhang gi, dang a ge nyo é hparà hpôlhô pé lé saî é nghut ri.
19 Sik túm lé, ‘Chyungxe duì aq!’ ga, a nghut jáng,
chyungxe a bo é lùqgòk lé, ‘Toq àq!’ ga taî é sû gi, dingnyé wó ri.
Haû gi, hkyô wó shuî shit râ lhú?
Haû gi, hîng eq ngùn za shup tô é nghut mù,
haú má chyungxe a bò nghut ri.” gâ ri.
20 Haû Yhûmsîng Garai gi, Yhâng é chyoiyúng noqkuq yhûm má nyi ri;
myìdàm htoq mâ é lhúnglhâng bang gi, Yhâng é hí má zîm byùq sháng gàq.