ZEHPANI-A
Laiká
(Zephaniah)
1
Yudaq hkóhkâm, Amon é yhang zo Yosi-a ùp é u lé, Hezeki-a é shuké tsáng, Amari-a é shuké, Gedali-a é gashu, Hkushi é yhang zo Zehpani-a chyáng haû Yhûmsîng Garaî é mungdang jé é gi, a-ô mâ é eq rajung za nghut ri.Yhûmsîng Garaî É Buìnyì Má Myìdàm Htoq Lé Târâ Jéyáng Râ Hkyô
2 “Ngò gi, myìdàm htoq mâ é nyì mî-nyî,
jòq mîjòq lé chyut lhoqhtûm pyám râ nghut lhê.” ga,
haû Yhûmsîng Garai taî pyo ri.
3 “Ngò gi, byù eq gaunyhaú lé chyut lhoqhtûm pyám râ nghut lhê;
Ngò gi, maulat mâ é nghoqzô pé lé le,
wuìshuq lung-aû mâ é ngozô pé lé le,
myìt lèqbàt nhâng hkyô eq agè ashop bang lé le,
chyut lhoqhtûm pyám râ nghut lhê.” ga,
haû Yhûmsîng Garai taî pyo ri.
Haû Yhûmsîng Garai taî pyo é gi,
“Myìdàm htoq mâ é waxâng zo wuî lhúnglháng lé, Ngò lhoqhtûm pyâm é hkûn,
4 Ngò gi, Yudaq ming eq Yerusalem wà mó má nyi é bànshoq bang lé,
Ngá é lòq èq htuqhtíng râ nghut lhê.
Ngò gi, jowò haú má nyi myìt tô é Balaq hparà lé noq é yùq hkangmó eq
hparà noq é hkyangjông pê é myìng pé lé le, lhoqhtên pyám râ nghut lhê.
5 Mauhkûng mâ é ajùm ayò pé lé,
yhûmsing é yhûmhkûng htoq mai paî gòp é bang lé le,
haû Yhûmsîng Garai eq Molek hparà lé paî gòp mù,
Yhûmsîng Garaî é myìng mai le, Molek hpara é myìng mai le, dâkam é bang lé le,
6 haû Yhûmsîng Garaî chyáng mai lhing taû ló byùq mù,
Yhûmsîng Garai lé a ho é htoq agó, Yhang lé a myî é bang lé le,
lhoqhtûm pyám râ nghut lhê.” gâ ri.
7 Haû Yhûmsîng Garaî é buìnyì gi, chyáng bê nghut é yánmai,
Ahko Ahkáng lhúnglháng wó Sû Yhûmsîng Garaî é hí má zim za nyì keq.
Haû Yhûmsîng Garai gi, shigu hkungga nhông poî hen to bê nghut mù,
haú má lòm bang lé lhoq sân-yúng bê nghut ri.
8 “Haû Yhûmsîng Garaî é hkungga nhong é buìnyì má,
Ngò gi, zaugun wuì eq hkóhkam é yhang zô pé lé le,
gó-ming bâng é mèbu wùt é bànshoq bang lé le,
mara dam byi râ nghut lhê.
9 Haú buìnyì má, Ngò gi,
góbâng é hkumtáng lé hkyaq laî wang é bànshoq bang lé le,
lú lhum bàt zìk hkyô eq mhaú zo mhaú shuq hkyô mai,
yhángmòq lé sîng su é yhûm má zè lhoqpyîng é bang lé le,
mara dam byi râ nghut lhê.
10 Haú buìnyì má, Ngozo Hkum mai ngaù htê htoq râ nghut lhê;
Wà Sik túm mai yón ngau garu htê htoq mù,
kong pé mai myìbyoq byòq é htê mó htoq râ nghut lhê.” ga,
haû Yhûmsîng Garai taî pyo ri.
11 Hau htoq agó, “Wuìloq kut jang má nyi é bang ê,
ngaùhkyûng ngaùyang kut keq;
hkâsu mù gâ le, núngmòq é wuìloq kut bang bànshoq gi,
lhoqhtûm pyâm é hui râ nghut luî,
ngùnhtung hpagá gá bang bànshoq gi,
lhoqhten lhoqhpyoq hpyi pyâm é hui kôrâ nghut lhê.
12 Haú ahkyíng má, Ngò gi,
myibung chûng mù Yerusalem wà mó má châng hô luî,
‘Haû Yhûmsîng Garai gi, ge é le, a ge é le, kut râ a nghut.’ ga myìt yu é,
tsibyiq wing tsan yu é htâng má ding tô é a-pyâng su nghut é,
yhûmsing gùng yhûmsîng nhik dìk bun bang lé mara dam byi râ nghut lhê.
13 Yhángmòq é sùtzè pé gi, lú yu pyám byî é hui mù,
yhángmòq é yhûm pé gi, chamchyuîyuì dùt byùq râ nghut lhê.
Yhángmòq gi, yhûm pé saí kôlhang,
haú pé má myang nyì kôrâ a nghut;
yhángmòq gi, tsibyiq yô pé saí kôlhang,
tsibyiq wing pé myàng shuq kôrâ a nghut.” le gâ ri.
14 Haû Yhûmsîng Garaî é buìnyì mó gi, chyáng bê nghut ri;
haû gi, chyáng luî, hân za jé râ nghut bê.
Haû Yhûmsîng Garaî é buìnyì mâ é ngaùhkyûng ngaùyang htê htoq nyi ri;
haú nyí má, Sarhê Mó lháng majan htê mó garu râ nghut lhê.
15 Buìnyì haû gi, nhikmó-yô é buìnyì,
myìt myo ûng wôm é eq dìk shoq hpu zô é buìnyì,
wuîhkê é eq htên byòq é buìnyì,
mauchut é eq tîng tîng nòq é buìnyì,
mhut htup é eq nòq byùq é buìnyì,
16 gingtîng é wà pé lé htim mù,
htúngchyûn mâ é mâchya pé lé htim luî,
tut mùt é eq majan htê garû é buìnyì, dùt ra râ nghut lhê.
17 “Byu pé gi, haû Yhûmsîng Garai lé mara shut pyám bekô nghut é yánmai,
Ngò gi, yhángmòq bànshoq bâng é ahtoq má,
haú sû é myìt myo ûng wom hkyô hut hkyô kat râ nghut mù,
yhángmòq gi, myòqjìt bang su sop sô wún kôrâ nghut lhê.
Yhángmòq é sui gi, hpuílhup su,
yhángmòq é gùngsho gi, hkyi su, hut lhuî pyâm é hui zo kôrâ nghut lhê.
18 Haû Yhûmsîng Garai nhikmó-yô é buìnyì má,
yhángmòq é ngùn hîng gi, yhángmòq lé wó hkyi yù râ a nghut.” ga,
haû Yhûmsîng Garai taî ri.
Myìdàm htoq gón gi, Yhâng é nhikmó-yô é myi má,
nyé jôm byùq râ nghut lhê;
hkâsu mù gâ gi, Yhang gi, myìdàm htoq má nyi é lhúnglhâng bang lé,
razùp má za lhoqhtûm pyám râ nghut lhê.