Dani-elaq Yhupmòq Myang É Tân Jung Yòsô Zè Myî Du
7
Babelon hkóhkâm Belishaza ùp é sânghî zàn má, Dani-elaq gi, yhupmòq myàng mù, yhâng é yhuphpyang htoq má shing-rán myang ri; haú hkûn, yhang gi, yhupmòq hau é hkyô lé kâ to mù, dang i-kyí pé lé taî htoq kyô ri.2 Dani-elaq gi, “Myín lé ngò myang é shing-rán má wú kat le, mauhkûng mâ é laì myi laî gi, wuìshuq lung-aû má mùt toq lo é lé myang ri. 3 Radu eq radu a du lhûm é tân jung yòsô zè mó myî du gi, wuìshuq lung-aû haú mai htoq lo bum ri.
4 Sânghî du gi, hkanghkyi eq dù mù, zun é dùng dàp tô ri; ngò wú nyi le, haû gi, xângzo byù su í hkyi èq wó yàp to râ matú, dùng nùt pyám byî é hui mù, myigùng mai lhoqtoq yu é hui luî, byu myìt kat byî é huî é lé myang ri.
5 Dum, ngá é hí má, wàm eq du é, í du nghû râ tân jung yòsô zè mó radu nyi tô ri. Haû gi, rahkyam shut yhâng é gùng tu toq mù, nàmcham showui sum hkat lé yhâng é nhut má ngàt kyâng tô ri. Yhang lé, ‘Toq aq, sho myo myo ngàt zo aq!’ ga taî akô nghut ri.
6 Hau htâng, ngò wú kat le, lo-ká mó eq du é, gótû tân jung yòsô zè mó radu ngá é hí má nyi tô ri. Hau é nùnghkûng má gi, nghoq dûng sû é dùng myi dûng dàp tô ri. Yòsô zè hau gi, ulhum myî lhum dàp é htoq agó, ùp é ahko ahkáng le wó yu tô é nghut ri.
7 Hau htâng, myin lé ngò myang é shing-rán má wú kat le, ngá é hí má, wú gyùq wú dân nhô zâ é eq wum-o a-tsam gyaí bo é, myî du nghû râ tân jung yòsô zè nyi tô é lé myang ri. Yòsô zè haû gi, gyai kô é jòqtoq zuî yùq tô ri; haû gi, wó yu é sho zê pé lé ngàt hkyop mhun pyám mù, myìt gyó tô é haî lé le hkyi èq nâng pyeq pyâm ri. Haû gi, hí lhê é tân jung yòsô zè sûm du eq a pung é nghut mù, hkyuî raxê hkyuî yùq ri.
8 Hkyuî haú pé eq séng luî ngò myìt wú nyi é hkûn, ngá é hí má, hkyuî haú pê é agyo mai hkyuî zo rahkat yùq htoq lo ri; haû hí lé yùq tô é hkyuî pé mâ é sum hkyuî gi, a-pûn eq roq nùt htoq pyâm é hui bê nghut ri. Hkyuî zo haú má gi, xângzo byu é myòqjí eq du é myòqjí pé dàp luî, gyáng dang taî é nhut dàp tô ri.
9 Ngò wú nyi le,
tángmyhâng pé lé to mù,
A-nham mai nyì Sû zùng jowò yu é lé myang ri.
Yhâng é mèbu gi, gyo su hpyu zan ri;
Yhâng é ulhum mâ é xâm gi, da-û su hpyu ri.
Yhâng é tángmyhâng má gi, myishâm dùq nyì mù,
hau é lhêngchap pé bànshoq gi, myi gyúng tô ri.
10 Yhâng é hí mai,
myi gyúng é wuìlàng yui htoq lo ri.
Yhang lé dójaú é byù gi, ahkyîng hkyîng nghut mù,
Yhâng é hí má yàp tô é byù gi, a-mun mun nghut ri.
Târâ jéyáng hkyô hen to mù,
laiká bùk pé lé hpông tô ri.
11 Hau htâng, ngò gi, hkyuî zo haû gyáng dang pé taî é yánmai, tân jung yòsô zè haû sat pyâm é hui mù, gùngsho lé lhoqhtên pyâm é hui luî, dùq nyi é myi má dú kat pyâm é huî é hkûn jé shoq, xoq luî wú nyi é nghut lhê. 12 Gótû tân jung yòsô zè pé gi, ùp é ahkáng lhoqhkyô pyám byî é hui kôlhang, rayòq rabun zo kângsoq duì râ ahkáng wó bum ashi kô nghut ri.
13 Dum, myín lé ngò myang é shing-rán má wú kat le, ngá é hí má, byu yhang zo sû é rayùq mhut mai gyó lé lo é lé myang ri. Yhang gi, A-nham mai nyì Su shut chyâng lé lo é nghut mù, yhang lé, haú yùq é hí má shuî wang akô nghut ri. 14 Yhang lé, ahko ahkáng, hpungwup shingkang eq ùp é hpungwup a-tsam mó byî to bê nghut mù, byù myû chângjup eq myíng hkangmó mâ é byu pé gi, yhang lé noqkuq akô. Yhang ùphkang é hkyô gi, ahtum abyùq é ùphkâng hkyô nghut mù, byùq byùq râ a nghut; yhâng é mîngdán gi, hkâ-nhám le lhoqhten lhoqhpyoq pyâm é hui râ a nghut.
Yhupmòq É Lichyúm Hpuq Kyô É Hkyô
15 Ngò, Dani-elaq gi, ngá é i-myìt sô má myìt myo ûng wôm nyì mù, ngò myang é shing-rán é yánmai gyùq dan nyi ri. 16 Haû mù, ngò gi, haû ayàm má yàp to bang mâ é rayùq chyáng huî ê mù, hau é lichyúm bànshoq lé myî é nghut lhê.
Haú hkûn, yhang gi, ngo lé, haú pê é lichyúm lé shî su ga taî ri; 17 ‘Tân jung yòsô zè mó haû myî du gi, myìdàm htoq má jòq htoq lô râ nghut é mîngdán myî lhum nghut ri. 18 Nghut kôlhang, Myhang Htáng Su é chyoiyúng bang gi, mîngdán lé myang hàp yù mù, pyàt dedu ahtum abyùq myang sîng kôrâ nghut lhê.’ gâ ri.
19 Hau htâng, ngò gi, gótû sûm du eq a pûng luî, wú gyùq dik nhô za dùt é, jòqtoq zuì yùq mù, gyi hkôdòq dàp luî, zè pé lé ngàt hkyop mhun pyám mù, myìt gyó tô é haî lé le hkyi èq nâng pyeq pyâm é, myî du nghû râ tân jung yòsô ze é hkyô lé le, 20 hau é ulhum má yùq é hkyuî raxê hkyuî lé le, htâng má yùq htoq mù, hí lhê é hkyuî sum hkyuî lé lhoqhkyô pyám luî, byu myòqjí dàp mù, gyáng dang taî é nhut dàp luî, gótû hkyui htoq je riyhang wú gyùq nhô za dùt é hkyuî zô é hkyô lé le, sé nau é nghut lhê. 21-22 Hkâsu mù gâ le, ngò wú nyi é hkûn, hkyuî zo haû gi, A-nham mai nyì Sû jé lé mù, Myhang Htáng Su é chyoiyúng bang a-kyû bo é târâ jéyáng hkyô lé taî pyô luî, mîngdán lé yhángmòq wó sing yu é ahkyíng jé shoq, chyoiyúng bang lé majan zan mù, ung nyi ri.
23 Haú yùq gi, ngo lé shi su ga taî sân kyo ri; ‘Myî du nghû râ tân jung yòsô zè gi, myìdàm htoq má jòq htoq lô râ nghut é myî lhum nghû râ mîngdán nghut lhê. Mîngdán haû gi, gótû mîngdán bànshoq eq a pûng mù, myìdàm gón lé myui pyám luî, nàng pyeq nàng hkyop pyám râ nghut lhê. 24 Hkyuî raxê hkyuî haû gi, mîngdán hau mai nyi htoq lô râ nghut é hkóhkâm raxê yùq nghut ri. Haú bâng é htâng má, gótû hkóhkam pé eq shai é hkóhkâm rayùq nyi htoq lô râ nghut lhê; yhang gi, hkóhkâm sum yuq lé ung pyám râ nghut lhê. 25 Yhang gi, Myhang Htáng Sû lé taî htuqhtíng mù, Myhang Htáng Su é chyoiyúng byu pé lé zìk zo râ nghut lhê; yhang gi, ahkyíng yàm-yòq pé hen tô é eq târâ pé lé htaî pyám kut luî, haû chyoiyúng é byu pé gi, ahkyíng ralhum, ahkyíng í lhum, ahkyíng rawuí gû,a yhâng é lòq má àp byî pyâm é hui kôrâ nghut lhê.
26 Nghut kôlhang, târâ jéyáng râ ahkyíng jé râ nghut mù, yhâng é ahko ahkáng lé wùp yu pyám byî é huî luî, ahtum abyùq lhoqhtên pyâm é hui râ nghut lhê. 27 Haú hkûn, ùp é ahko ahkáng mó, hpungwup a-tsam eq mauhkûng ô mâ é mîngdán bànshoq é kô làm hkyô lé, Myhang Htáng Su é chyoiyúng é byu pê é lòq má byî pyâm é hui râ nghut lhê. Myhang Htáng Su é mîngdán haû gi, ahtum abyùq é mîngdán dùt râ nghut mù, ùp é ahkáng wó é bànshoq bang gi, Yhang lé noqkuq luî, Yhâng é jì-no gyo kôrâ nghut lhê.’ gâ ri.
28 Haú hkyô gi, shî má htáng bê nghut ri. Ngò, Dani-elaq gi, myìt má gyai yhang wuîhkê byùq mù, myòqdong bósom byùq bê nghut lhê; nghut kôlhang, ngò gi, haú hkyô lé ngá é myìt má za kat to bê nghut lhê.” ga taî ri.