Hkanghkyi Hkup Mâ É Dani-elaq É Hkyô
6
Dari gi, mîngdán gón lé ùphkâng râ matú, ming zau rasho í xê yùq nyhi tô le ge ri ga myìt hpyit yu ri; 2 ming zau haú bang lé wú gon râ nghut é ming zau mó sum yuq mâ é rayùq gi, Dani-elaq nghut ri. Ming zau haú bang gi, hkóhkam é a-kyû a yom byùq râ matú, ming zau mó haû sum yuq é hí má jihpán shit ra râ nghut lhê. 3 Dani-elaq shí yùq gi, góbâng htoq u-nuq bo é nghut mù, ming zau mó nhik eq gótû ming zau pê é htoq má ze tô é byù nghut luî, hkóhkâm hpó gi, yhang lé, mîngdán gón lé ùp nhâng râ hên bê nghut ri. 4 Haû nghut mù, ming zau mó nhik eq gótû ming zaû pé gi, mîngdán lé ùp é hkyô má, Dani-elaq lé mara hûn râ hkyô hô kôlhang, yhang gi, wó lum é sû nghut mù, kut zô é hkyô eq myìt goí é hkyô a kut é yánmai, yhâng chyáng mara hûn râ hkyô a myàng kó nghut ri. 5 Haû mù, byù haú bang gi, ló htáng má, “Yhâng é Garai Gasâng é târâ eq séng luî za a nghut jáng, Dani-elaq shî lé, ngá-nhúng mara wó hûn râ hkyô hkâ-nhám le myàng râ a nghut.” ga taî lhûm akô nghut ri.6 Haû mù, ming zau mó nhik eq gótû ming zaû pé gi, hkóhkâm hpô chyáng chôm zîng ê mù, “Hkóhkâm Dari ê, nàng chyung hîng xê hing nyì sháng ô! 7 Ahkuî mai sum xê nyí gyoro má, nàng hkóhkâm lé kyûdûng é mai lai luî, hparà lé nghut nghut, xângzo byù lé nghut nghut kyûdûng é sû gi, hkanghkyi hkup má dú hkyô pyâm é hui zo sháng gàq nghû, a kut a ge é hkóhkam é hkunmó hkyó râ matú, hkóhkam é ming zau mó pé, zau wuî, ming zau wuì, hpàqchyî byi bang eq gyèzaû pé bànshoq bang chôm myìt huî to bê nghut lhê. 8 Ahkuî, hkóhkâm ê, a ge htaí lô é Medi eq Perisi byu pê é htûng târâ eq rajung za, hkunmó haû hkyó mù, a ge htaî lhik pyám râ matú laiká ká luî dizìk htûng tap to aq.” ga taî akô nghut ri. 9 Haû mù, Hkóhkâm Dari gi, hkunmó haú lé laiká ká mù dizìk htûng tap to bê nghut ri.
10 Dani-elaq gi, hkunmó haû lhoqhtoq bê nghut é lé sé jáng, yhâng é yhûm má ló mù, Yerusalem wà mó shut hu é hkohot pé hpông tô é, ahtoq pyâm wàp má wang ló ri; yhang gi, yhang lhaq kut nyi é eq rajung za, ra-nyí sum dâm hkyîhput htuq mù, kyûdung luî, yhâng é Garai Gasang lé jeju hkya-on nyi ri. 11 Haû mù, byù haú bang gi, chôm zùp zing kôjáng, Dani-elaq mai Garai Gasang lé kyûdung mù, dûng tôngbán nyi é lé myang akô nghut ri. 12 Haû mù, yhángmòq gi, hkóhkam chyáng ê kômù, “Hkóhkâm ê, jé lô râ sum xê nyí gyoro má, nàng hkóhkâm lé kyûdûng é mai lai luî, hparà lé nghut nghut, xângzo byù lé nghut nghut kyûdûng é sû gi, hkanghkyi hkup má dú hkyô pyâm é hui zo sháng gàq ga, hkunmó hkyô to bê, a nghut lhí?” ga yhâng é hkóhkâm hkunmó eq séng luî taî akô nghut ri.
Hkóhkâm hpó gi, “A ge htaî lô é Medi eq Perisi byu pê é htûng târâ eq rajung za, hkunmó haû gingtîng nyi lhê.” ga tû taî ri. 13 Hau htâng, yhángmòq gi, hkóhkâm lé, “Hkóhkâm hpó ê, Yudaq byu pé mai shúm zûng bang mâ é rayùq nghut sû Dani-elaq gi, nàng lé le, kâ to mù dizìk htûng tap tô é náng é hkunmó lé le, haî su a ngàm kut ri. Yhang gi, ra-nyí má sum dâm dâm kyûdûng nyi ashî nghut ri.” ga taî akô nghut ri. 14 Hkóhkâm hpó gi, haú lé wó gyo jáng, myìt gyai yhang a ngón dùt byùq mù, Dani-elaq lé hkyi xe yù râ matú myìt hpyit luî, buìwàng shoq wó dùt é myhó, yhang lé hkyi yù râ hkyô ho nyì bê nghut ri.
15 Nghut kôlhang, byù haú bang gi, rahpúng za kut luî, Hkóhkâm Dari chyáng ê mù, yhang lé, “Hkóhkâm ê, Medi eq Perisi byu pê é htûng târâ dông ga jáng, hkóhkâm mai radàm lhoqhtoq to bê é hkunmó lé gi, a ge htaî lhik pyám lo nghut é hkyô lé bun aq.” ga taî akô nghut ri.
16 Haû mù, hkóhkâm hpó ahkáng byi bê nghut mù, yhángmòq gi, Dani-elaq lé shuî yù luî, hkanghkyi hkup má dú hkyô kat bekô nghut ri. Hkóhkâm hpó kúm gi, “Dani-elaq ê, nàng ayang noqkuq dójaú nyi é, náng é Garai Gasang gi, nang lé hkyi xe yù sháng gàq!” ga châng taî kat ri.
17 Yhángmòq gi, lùqlong mó lé wàq yù mù, donghkun lé xaû pyám luî, Dani-elaq é mú eq séng luî a wó htaî lhik pyám loshoq, hkóhkam é lòqtsung dizìk èq le, ming zau wui é dizìk èq le, htûng tap to bekô nghut ri. 18 Hau htâng, hkóhkâm hpó gi, yhâng é hkóhkâm wâng má taû ló mù, ra-myin mau zang a zô é htoq agó, myìt lhoqngón jung haî lé le, yhâng chyáng a yu wàng nhâng nghut ri. Yhang gi, yhup gying gyîng byùq bê nghut ri.
19 Hkóhkâm hpó gi, maubó lô eq toq mù, hkanghkyi hkup má hân ê bê nghut ri. 20 Yhang gi, hkanghkyi hkup eq chyâng lò jáng, ngaùhkyûng ngaùyang htê mai, “Rû dui nyi é Garai Gasâng é duìnhâng zoshâng Dani-elaq ê, nàng ayang noqkuq dójaú nyi é, náng é Garai Gasang gi, nang lé, hkanghkyî pé chyáng mai wó hkyi xe yù bê lhú?” ga Dani-elaq lé wùt taî kat ri.
21 Haú hkûn, Dani-elaq gi, “Hkóhkâm gi, chyung hîng xê hing nyì sháng gàq ô! 22 Ngá é Garai Gasang gi, Yhâng é maumang lagyo lé nhang kat byî é nghut mù, yhang gi, hkanghkyî pê é nhut lé xaû pyám byi bê nghut luî, ngò gi, hai dàm le a dàp nghut ri; hkâsu mù gâ le, ngò gi, yhâng é myòq hí má mara a bo é sû nghut lhê. Hkóhkâm ê, ngò gi, náng é hí má le haî a shut wú é nghut lhê.” ga tû taî kat ri.
23 Haú hkûn, hkóhkâm hpó gi, gabú dik luî, Dani-elaq lé hkup mai lâng toq yû râ matú, hkunmó hkyó bê nghut ri. Haû mù, Dani-elaq lé hkup mai lâng toq yu é hkûn, yhâng chyáng hai dàm le a dàp é lé myang ri; hkâsu mù gâ le, yhang gi, yhâng é Garai Gasang lé lùmhkau nyi é yánmai nghut ri.
24 Hau htâng, hkóhkâm hkunmó hkyô é nghut mù, Dani-elaq lé mara mhaû hun é bang lé shuî yù luî, yhángmòq é yhûmsîng myhî pé eq zodù wuì le mù, hkanghkyi hkup má du hkyô kat akô nghut luî, haú bang gi, hkup chuq má lháng a jé shi-má, hkanghkyi pê èq ngàt myha pyám mù, showui pé bànshoq ngàt hkyop pyám byî é hui bekô nghut ri.
25 Hau htâng, hkóhkâm hpó gi, myìdàm htoq mâ é byù myû bànshoq eq gótû tû myíng mu é byu pé lé laiká kâ hun ri; haû gi,
“Núngmòq gyai yhang nyì ngón yùqyo kó sháng gàq!
26 Ngò gi, ngá é mîngdán gón mâ é byù bànshoq, Dani-elaq é Garai Gasang lé gyùq hkúngga ra râ nghut lhê nghu é hkunmó hkyô kat lhê.
Hkâsu mù gâ le, Yhang gi, rû dui nyi é Garai Gasang nghut mù,
ahtum abyùq gîng nyì Sû nghut ri;
Yhâng é mîngdán gi, wó htên byòq byùq râ a nghut;
Yhang ùp é hkyô gi, hkâ-nhám le htum râ a nghut.
27 Yhang gi, hkyi xê hkyi htoq yu ri;
Yhang gi, mauhkûng eq myigùng htoq má,
làklaí alhô agàn pé eq maúhpo múzó pé kut ri.
Yhang gi, Dani-elaq lé,
hkanghkyî pê é nhut mai hkyi xe yù bê nghut ri.” gâ ri.
28 Haû mù, Dani-elaq gi, Dari ùp é i-pyàt eq Perisi byù Kuru ùp é i-pyàt má kô myhâng bê nghut ri.