Xêwâm Má Laiká Kâ É Hkyô
5
Hkóhkâm Belishaza gi, yhâng é zaugun wuì rahkyîng yùq é matú poî mó kut byi mù, yhángmòq eq rahá tsibyiq wing shuq nyi bum akô. 2 Belishaza gi, yhâng é tsibyiq wing lé shuq nyi é hkûn, yhang eq yhâng é zaugun wuì le, yhâng é myi mó pé eq myi-ngê wuì lé, Yerusalem wà mó mâ é noqkuq yhûm mai yhâng waa Nebuhkatneza yu lo é hîng gòm ngùn gòm mai wó shuq kôrâ matú, gòm haú pé lé yu wang lò râ hkunmó hkyô ri. 3 Haû mù, yhángmòq gi, Yerusalem wà mó mâ é Garai Gasâng é noqkuq yhûm mai lú yu lo é hîng gòm pé lé yu wang lò kô é nghut mù, hkóhkâm hpó eq yhâng é zaugun wuì le, yhâng é myi mó pé eq myi-ngê wuì le, haú mai shuq bekô nghut ri. 4 Yhángmòq gi, tsibyiq wing lé shuq uchyang, hîng, ngùn, gyi, jòqtoq, sik eq lùqgòk lé kyûng tô é hparà pé lé hkya-ôn kúngton bum akô nghut ri.5 Haú hkûn, byò dàn htik, byu é lòqnyhui htoq lô mù, hkóhkâm wang má, myi-kok tsûngjang nàm mâ é, tso-kyín shup tô é xêwâm má laiká kâ ri. Hkóhkâm hpó gi, laiká kâ nyi é lòq lé myang ri. 6 Haû mù, hkóhkam é myòqdong gi, abósôm mâ é dùt byùq mù, lûm gyùq luî, yhâng é hkyî wum nyhôm byùq mù, hkyîhput hkyîxik nán nyî bê nghut ri.
7 Hkóhkâm hpó gi, lòng kat bang, mauhkûng hkyô sê wú bang eq bùt hpyit é bang lé ji yu ri. Hau htâng, yhang gi, Babelon mâ é hpàqchyî bo é byù haú bang lé, “Shî kâ tô é hkyô eq hau é lichyúm lé, ngo lé wó taî kyô é sû ó yùq le, ne yúng é mèbu myang wùt mù, lìngzing má hîng tuijâng myang wùt luî, mîngdán shî má sûm lhum ko sû zau dùt râ nghut lhê.” ga taî ri.
8 Haû mù, hkóhkam é hpàqchyî bò bang bànshoq wang lé kôlhang, yhángmòq gi, haû kâ tô é lé le a wó nghap, hau é lichyúm lé le a wó taî kyo kó nghut ri. 9 Haû mù, Hkóhkâm Belishaza gi, je riyhang gyùq dan byùq mù, yhâng é myòqdong gi, je riyhang abósôm mâ é dùt ló byùq bê nghut ri. Yhâng é zaugun wuì gi, myìt nhúngnhâng byùq bùm bekô nghut ri.
10 Haû hkóhkâm myhí mó gi, hkóhkâm eq yhâng é zaugun wuì taî é dang htê lé wó gyo jáng, poî wàp má wang lé mù, “Hkóhkâm gi, chyung hîng xê hing nyì sháng gàq! Hkâgyùq nán! Abósôm mâ é le hkâdùt! 11 Náng é mîngdán má, chyoiyúng hparà pê é sô byíng é byù rayùq nyi ri. Náng wâ é i-pyàt má, haú yùq chyáng, hparà pê é hpàqchyî eq du é, nìk nìk sê é myìt, sê gyô é u-nuq eq hpàqchyî byéng-yá pé bo é lé myang ri. Náng wa, Hkóhkâm Nebuhkatneza le, yhang lé, myòqnghop hpàqchyî kut bang, lòng kat bang, mauhkûng hkyô sê wú bang eq bùt hpyit é bâng é zau kut nhang é nghut lhê. 12 Hkâsu mù gâ le, yhang haû su kut é gi, Beliteshaza ga myhîng é Dani-elaq chyáng, làklaí é myìt sô, kûng é hpàqchyî, sê gyô é u-nuq, yhupmòq é lichyúm ge hpuq é a-tsam, danglhîng lé ge taî sân kyô é a-tsam eq wuîhke hkyô lé wó hpyi pyâm é a-tsam bo é lé myang é yánmai nghut ri. Dani-elaq lé jì nhâng àq; yhang gi, nang lé, haû haî kâ tô é lichyúm lé hpuq kyo râ nghut lhê.” ga taî ri.
13 Haû mù, Dani-elaq lé hkóhkam é hí má shuî jé kôjáng, hkóhkâm gi, yhang lé, “Nàng gi, Yudaq mau mai ngá wa hkóhkam èq shuî lo é shúm byû má lom é Dani-elaq nghut lhê, a nghut lhí? 14 Náng chyáng, hparà pê é sô byíng é hkyô lé le, nìk nìk sê é myìt, sê gyô é u-nuq eq làklaí é hpàqchyî byéng-yá bo é hkyô lé le, ngò wó gyô ri. 15 Shî kâ tô é hkyô eq hau é lichyúm lé taî kyo hpuq kyo râ matú, hpàqchyî bò bang eq lòng kat bang lé, ngá é hí má shuî lé nhang kôlhang, yhángmòq a wó taî sân kyo kó nghut ri. 16 Nàng gi, lichyúm pé lé wó hpuq kyô é eq wuîhkê é hkyô pé lé wó hpyi ri gâ é lé, ahkuî, ngò wó gyo bê nghut lhê. Nàng gi, laiká shî lé wó nghap mù, hau é lichyúm ngo lé wó hpuq kyô é nghut jáng, ne yúng é mèbu myang wùt luî, lìngzing má hîng tuijâng myang wùt mù, mîngdán shî má sûm lhum ko sû zau dùt râ nghut lhê.” ga taî ri.
17 Haú hkûn, Dani-elaq gi, hkóhkâm lé, “Hkóhkâm ê, náng é chyûnghuq gi, náng é matú nghut sháng gàq; náng é shigyaú chyûnghuq góyùq lé byî pyám aq. Nghut kôlhang, ngò gi, náng é matú, shî kâ tô é hkyô lé nghap kyo mù, hau é lichyúm hpuq kyo râ nghut lhê.
18 Nàng, hkóhkâm ê, Myhang Htâng é Garai Gasang gi, náng wa Nebuhkatneza lé, myhang htâng é ahko ahkáng, kô làm hkyô, hpungwup shingkang eq hkìkhkâm hkyô byî to bê nghut ri. 19 Yhang lé byî tô é myhang é ahko ahkáng é yánmai, byù myû wuì bànshoq eq myíng gótû tû mu é byu pé gi, yhâng é hí má gyùq nán bum akô nghut ri. Hkóhkâm hpó gi, yhang sat pyám nau é sû lé sat pyám mù, lhoqlhut tó nau é sû lé lhoqlhut tô ri; yhang wàq toq naû sû lé wàq toq mù, lhoqhkyó naû sû lé lhoqhkyô pyâm ri. 20 Nghut kôlhang, yhâng é myìt myhang lò mù, nghutbûn é myìt mai i-myìt htan tô é hkûn, yhang gi, yhâng é hkóhkâm tángmyhâng mai lhoqhkyô pyâm é hui mù, yhâng é hpungwup shingkang hpoî byùq bê nghut ri. 21 Yhang gi, byu pê chyáng mai lhoqhtoq pyâm é hui mù, gaunyhaû é myìt bo byùq é eq, yòsô loze pé eq rahá nyì mù, nohtó su mhan zo bê nghut ri; Myhang Htáng Sû Garai Gasang gi, myìdàm htoq mâ é mîngdán bànshoq lé ùp mù, Yhang byí nau é sû lé byî é hkyô lé, yhang wó sê é hkûn jé shoq, yhâng é gùngdu gi, mauhkûng mâ é nghân teq nyi é nghut ri.
22 Nghut kôlhang, yhang zo nghut sû Belishaza ê, nàng gi, haú hkyô pé bànshoq lé sé to kôlhang, náng gûng nàng i-myìt a lhoqnyhûm nghut ri. 23 Gè gè yhang, nàng gi, maúhkung é Yhûmsîng lé toq htuqhtíng mù, Yhâng é noqkuq yhûm mâ é góm pé lé náng chyáng yu háng luî, nàng eq náng é zaugun wuì, náng é myi mó pé eq myi-ngê wuì gi, góm haú pé mai tsibyiq wing shuq bekô nghut ri. Hau htoq agó, nàng gi, myòq le a myàng, nohkyap le a wó gyô é eq haî le a sê gyô é, ngùn, hîng, gyi, jòqtoq, sik eq lùqgòk lé kyûng tô é hparà pé lé hkya-on kúngton ri. Nghut kôlhang, náng é chyungxe eq náng é hkyô pé bànshoq lé, Yhâng é lòq má kat tô é Garai Gasang lé gi, nàng a hkúngga nghut ri. 24 Haû mù, Yhâng chyáng mai lòqnyhui haû htoq lô mù, laiká shî kâ é nghut ri.
25 Haú má kâ tap tô é laiká gi,
MENE, MENE, TEKELA, PARISIN gâ ri.
26 Dang haú pê é lichyúm gi, shí dông nghut ri; Mene gâ é gi, nàng ùp é buìnyì pé lé Garai Gasang nghap mù lhoqhtûm pyám bê gâ é nghut ri. 27 Tekela gâ é gi, nang lé jàng mai chîn wú le, nàng yom byùq bê gâ é nghut ri. 28 Peresa gâ é gi, náng é mîngdán lé gam hkoq mù, Medi byu pé eq Perisi byu pé lé àp byî pyám bê gâ é nghut ri.” ga taî kyô ri.
29 Haú hkûn, Belishaza hkyô é hkunmó eq rajung za, Dani-elaq lé, ne yúng é mèbu hut byi mù, lìngzing má hîng tuijâng hut byi bekô nghut mù, yhang gi, mîngdán mâ é sûm lhum ko sû zau ga taî pyo é hui bê nghut ri.