Sau Lo Eq Bainám Lo Lé Dani-elaq Shing-rán Myang É Hkyô
8
Hkóhkâm Belishaza ùp é sum zan zàn má, ngò, Dani-elaq gi, hí lhê é shing-rán myang é htâng má, shing-rán dum myang ri. 2 Ngò myang é shing-rán má, Elam mau Susa wà mó mâ é gingtíng jowò má ngò nyi tô é lé myang ri; shing-rán má, ngò gi, Ulai wuìlàng yàm má yàp tô ri. 3 Haú hkûn, ngò tu wú kat le, ngá é hí má, hkyuî í hkyuî yùq é saulo radu wuìlàng yàm haú má yàp tô ri; hkyuî haû í hkyuî hîng kôlhang, rahkyuî gi, je hing é nghut mù, haû gi, htâng má yùq htoq é hkyuî nghut ri. 4 Saulo haû gi, buìwàng shut, mautsûng shut eq maupyî shut hkat htûng wún é lé, ngò myang ri. Hai gaunyhaú le, yhang lé lhom wó htuqhtîng é a nyì; yhâng é wum-o a-tsam mai wó hkyi xe htoq yu é le ó a nyì; yhang gi, kut nau é dông kut mù, kô hkìk byùq bê nghut ri.5 Haú hkyô eq séng luî ngò myìt tû wú nyi é u, byò dàn htik, bainám lo radu buìwàng hkyam mai htoq lô mù, myigùng má a nâng é za, myìdàm htáng shoq din ri; bainám lo haû gi, yhâng é myòqjí gyoro má de de yhang myang é hkyuî te rahkat yùq tô ri. 6 Bainám lo haû gi, ngò myang é, hkyuî í hkyuî yùq mù, wuì yàm má yàp tô é sau lô chyáng lé jé luî, nhikmó-yô é mai wum kat htîm ri. 7 Haú dông, yhang gi, saulo haú lé nhikmó-yô é mai htim luî, bàt mù, hkyuî í hkyuî lé bàt hkyop pyám byî é lé, ngò myang ri. Saulo haû gi, yhang lé lhom htuqhtíng râ wum a bò byùq é nghut mù, bainám lo gi, saulo haú lé myigùng má chyûn lhêng pyám luî, nâng pyeq bê nghut ri; ó yùq le, yhâng é wum-o a-tsam mai saulo haú lé a wó hkyi xe htoq yû nghut ri. 8 Bainám lo haû gi, gyai yhang kô hkìk byùq bê nghut kôlhang, yhang wum-o bo kûng tô é u, hkyuî mó haû gyuî byùq bê nghut mù, hau é jowò má, mauhkûng myi chyûn shut yùq ló é, de de yhang myang é hkyuî myi hkyuî yùq htoq lo ri.
9 Hkyuî haû myi hkyuî mâ é rahkyuî mai hkyuî zo rahkyuî yùq htoq lô mù, maupyî shut le, buìhtoq shut le, yúng é maumyî shut le, gyai yhang yùq kô myhang ló ri. 10 Haû gi, mauhkûng mâ é ajùm ayò pé jé shoq yùq hkyang ló mù, haû ajùm ayò mâ é ra-am eq kyî pé ra-am lé myìdàm htoq má lhoqhkyô kat luî nâng pyeq pyâm ri. 11 Hau htoq agó, hkyuî haû gi, yhûmsing gùng yhûmsîng, haû Yhûmsîng Garaî é gyèzau í lhoqkô hkìk yù mù, haû Yhûmsîng Garaî chyáng mâ é nyí wui é myi nyhé hkungga lé yu pyám byi luî, Yhâng é sân-yúng jowò lé hpyoq hpyi pyám byî ri. 12 Târâ lu laî pyâm é yánmai, haû Yhûmsîng Garaî é gyèzô pé eq nyí wui é myi nyhé hkungga lé, yhâng é lòq má àp byi bê nghut ri. yhang gi, haû tengmán hkyô lé myigùng má dú hkyô pyâm é nghut mù, yhang kut é jung hkangmó má kô lam ri.
13 Haú hkûn, chyoiyúng sû rayùq dáng nyo nyi é lé ngò wó gyô ri; hau htâng, chyoiyúng sû góyùq gi, yhang lé, “Haû nyí wuî myi nyhé hkungga nhong é hkyô, chamchyuîyuì dùt nhang é gumlau toq hkyô, sân-yúng jowò lé lhoqhten lhoqhpyoq é hkyô eq mauhkûng gye pé lé nâng pyeq pyâm é hkyô eq sêng é shing-rán lé lhoqdìk râ gi, hkâ-myháng myháng nyî shirâ lhú?” ga taî ri.
14 Haú hkûn, yhang gi, ngo lé, “Myín eq nàp pé 2300 lai shoq nghut râ nghut lhê; haú hkûn, sân-yúng jowò gi, lhoq sân-yúng é dum hui râ nghut lhê.” ga taî ri.
Shing-rán É Lichyúm Hpuq Kyô É Hkyô
15 Ngò, Dani-elaq gi, shing-rán lé wú nyî mù, hau é lichyúm lé sê gyo râ matú shi-kùt nyi é u, byù su dùt é rayùq, ngá é hí má yàp tô ri. 16 Hau htoq agó, ngò gi, Ulai wuìlàng mai, “Gabri-elaq ê, byù shí yùq lé, shing-rán hau é lichyúm hpuq kyo aq.” ga byù rayùq wùt taî é htê lé wó gyô ri.
17 Haû mù, ngò yàp tô é jang má, Gabri-elaq chyâng htèp lé lo é hkûn, Ngò gi, gyùq dàn luî, myòqdong ngóm gòp é nghut lhê. Haú hkûn, yhang gi, ngo lé, “Byù zo ê, shing-rán shî gi, ló htâng é buìnyì eq sêng é hkyô nghut é lé sê gyo aq.” ga taî ri.
18 Yhang, ngo lé dáng nyo nyi é u, ngò gi, myigùng má myòqdong ngóm gòp luî, yhup mó myí byùq ri. Haú hkûn, yhang gi, ngo lé lé htau mù, nyâng za tu shap kat ri.
19 Yhang gi, “Wú aq; htângnùng lé, nhikmó-yô é buìnyì má dùt lò râ nghut é hkyô lé, ngò, nang lé taî kyo râ nghut lhê; hkâsu mù gâ le, haû gi, tû ge tô é ló htâng é ahkyíng eq sêng é shing-rán nghut lhê. 20 Nàng myang é, hkyuî í hkyuî yùq é saulo gi, Medi hkóhkâm eq Perisi hkóhkâm lé taî é nghut ri. 21 Haû sho-maú zèp zèp yùq é bainám lo gi, Grik hkóhkâm nghut mù, yhâng é myòqjí gyoro mâ é hkyuî mó gi, sânghî yùq hkóhkâm nghut ri. 22 Haû gyuî byùq bê hkyuî jowò má yùq htoq lo é myi hkyuî gi, yhâng é mîngdán mai jòq htoq lo é myi mîngdán lé taí nau é nghut ri; nghut kôlhang, yhâng é wum-o a-tsam bò kôrâ a nghut.
23 Mîngdán haú pé ló htâng é ahkyíng má, gumlau toq é bang, agè ashop dik dùt byùq é hkûn, byù jum myòqdong dàp luî, mhaú zo mò zô é hkyô châng é hkóhkâm htoq lô râ nghut lhê. 24 Haú yùq gi, ahko ahkáng mó wó râ nghut lhê; nghut kôlhang, yhâng é wum-o a-tsam mai wó é a nghut. Yhang gi, lhoqhten lhoqhpyoq hkyô gyai sê kut râ nghut mù, yhang kut é haî lé le wó ûngmyuq râ nghut lhê. Yhang gi, wum-o a-tsam bò bang eq chyoiyúng é byu pé lé lhoqhtên pyám râ nghut lhê. 25 Yhang gi, a ge é shut u-nuq nyaù mù, kô làm râ matú mhaû lhik zo râ nghut mù, yhânggùng yhang gyai hkìk é dông sôn yù râ nghut lhê; yhang gi, byu pé abun aso nyi bùm kô é hkûn, byù myo myo lé sat pyám mù, zaú wui é Zau lé le toq htuqhtíng râ nghut lhê. Nghut kôlhang, yhang gi, byu pê é wum-o a-tsâm èq a nghut é za, lhoqhtên pyâm é hui zo râ nghut lhê.
26 Haû nang lé tûn shit bê nghut é myín eq nàp pê é shing-rán gi, têng lhê; nghut kôlhang, shing-rán haú lé zaú to aq; hkâsu mù gâ le, haû gi, buìnyì myáng ashî nghut é hkyô eq sêng é nghut ri.” ga taî ri.
27 Ngò, Dani-elaq gi, mòq byùq mù, buìnyì tsómra myáng no byùq é nghut lhê; hau htâng, ngò gi, toq mù, hkóhkam é múzó lé wun wàq bê nghut lhê. Nghut kôlhang, ngò gi, shing-rán hau é yánmai, gyùq ngha to bê nghut mù, haú lé a ung sê gyo nghut ri.