Hkyangjông Pê É Matú Yhûm Pé
42
Hau htâng, yhang gi, ngo lé, mautsûng hkyam shut mai sânghî pyâm wânghkaû má shuî wàng mù, mân tô é jowò eq le, mautsûng hkyam mâ é sânghî pyâm wânghkaû xêwâm eq le díng za nghut tô é wàp pé má shuî jé e ri. 2 Mautsûng shut hkum hu tô é yhûm gi, hîng hpyang rashô dúng bò mù, làm hpyang ngo xê dúng bo ri. 3 Haû gi, ahtê pyâm wânghkaû shut í xê dúng kyo to mù, sânghî pyâm wânghkaû mâ é lùqgòk hkâng tô é jang shut hu tô ri; haû gi, sum tsáng nghut mù, wàp wàng hkyô zo hé hpoq shí hpoq má saî tô é nghut ri. 4 Gòkhkun má, raxê dúng làm mù, rashô dúng hing é lai hkyô jòq tô ri; haú pê é hkum pé gi, mautsûng shut chyat hu tô ri. 5 Ahtoq mâ é wàp pé gi, je chyap ri; hkâsu mù gâ le, haú mâ é wàp wàng hkyô gi, a-o tsáng eq gyorô tsáng mâ é wàp pê htoq jowò je yu é yánmai nghut ri. 6 Je ló myhang é tsáng mâ é wàp pé gi, wânghkaû pé su, zìng a bò nghut ri; haû mù, haú tsáng gi, a-o tsáng eq gyorô tsáng htoq má jowò je ló chyap é nghut ri. 7 Sânghî pyâm wâng shut hû mù, wàp pê é hí má wam tô é xêwâm gi, ngo xê dúng hing ri. 8 Sânghî pyâm wânghkaû eq chyâng é wàp pé gi, ngo xê dúng hîng mù, sân-yúng jowò eq je chyâng é wàp pé gi, rashô dúng hing ri. 9 A-ô mâ é wàp pé má, sânghî pyâm wânghkaû mai wó wang lé râ matú, buìhtoq hkyam shut hkum ralhum jòq tô ri.10 Maupyî hkyam, sânghî pyâm wânghkaû xêwâm cháng mù, mân tô é jowò shut hû luî, wâng xêwâm eq tû-tap má wàp pé jòq bum ri; 11 gòkhkun pé má gi, lai hkyô jòq tô ri. Haú pé gi, mautsûng hkyam mâ é wàp pé eq rajung za nghut ri; hîng hpyang, làm hpyang, wàng hkum htoq hkum pé eq azòng rajung za nghut ri; 12 maupyî hkyam má le, wàp pê é hkum hkyô jòq bum ri. Hkum hkyô um má le hkum ralhum jòq ri; hkyô haû gi, buìhtoq hkyam mâ é xêwâm châng é hkyô má ló htoq ròt é nghut ri.
13 Hau htâng, yhang gi, ngo lé, “Haû mân tô é jowò shut hu tô é, mautsûng hkyam eq maupyî hkyam mâ é wàp pé gi, chyoiyúng wàp pé nghut mù, haû Yhûmsîng Garaî é hí má lé dójaú é hkyangjông pé gi, chyoiyúng htâng é hkungga pé lé haú má zo kôrâ nghut lhê. Yhángmòq gi, haú má, chyoiyúng htâng é hkungga pé nghut é, gùqzò hkungga pé, mara hkyut hkungga pé eq mara hpyî hkungga pé lé to kôrâ nghut lhê; hkâsu mù gâ le, haû gi, chyoiyúng é jowò nghut ri. 14 Haû chyoiyúng jowò má wàng bê nghut é hkyangjông pé gi, dójaú é hkûn wùt é mèbu wùt mù, chyoiyúng é jowò mai sânghî pyâm wânghkaû má wó htoq ê kôrâ a nghut; hkâsu mù gâ le, mèbu haú pé gi, chyoiyúng é nghut ri. Haû mù, yhángmòq gi, gótû mèbu wùt luî shèq, mâyû byu pé eq sêng é jowò má ge htoq ê kôrâ nghut lhê.” ga taî ri.
15 Yhang gi, noqkuq yhûm ahkaû má ban ké jáng, ngo lé, buìhtoq hkum mai shuî htoq ê mù, hau é lhînghkyùq má kê ri. 16 Yhang gi, buìhtoq hkyam shut jàm yâng èq kê ri; haû gi, ngo shô dúng bo ri. 17 Yhang gi, mautsûng hkyam shut jàm yâng èq kê ri; haû gi, ngo shô dúng bo ri. 18 Yhang gi, maupyî hkyam shut jàm yâng èq kê ri; haû gi, ngo shô dúng bo ri. 19 Hau htâng, yhang gi, buìwàng hkyâm shut jàm yâng èq kê ri; haû gi, ngo shô dúng bo ri. 20 Haú dông, yhang gi, haû myî hkyam shut lé ké bê nghut ri. Haú má, chyoiyúng jowò eq mâyû jowò gam hkoq râ matú, ngo shô dúng hîng mù, ngo shô dúng lam é xêwâm kyâm lhîng tô ri.