Noqkuq Yhûm Má Garai Gasâng É Hpungwup Shingkang Dum Taû Jé É Hkyô
43
Hau htâng, yhang gi, ngo lé, buìhtoq hkyam shut hu tô é hkum má shuî e é nghut mù, 2 ngò gi, buìhtoq hkyam mai Isira-elaq é Garai Gasâng é hpungwup shingkang htoq lo é lé myang ri; Yhâng é htê gi, wuì myo myo mying hûm é htê su gâ ri; myigùng htoq má gi, Yhâng é hpungwup shingkang byíng zan tô ri. 3 Haú hkûn, ngò myang é shing-rán gi, wà mó lé lhoqhtên pyám râ matú Yhang lé lo é hkûn ngò myang é shing-rán su le, Hkebara Wuìlàng yàm má ngò myang é shing-rán su le, dùt ri; haû mù, ngò gi, myòqdong ngóm gòp é nghut lhê. 4 Yhûmsîng Garai é hpungwup shingkang gi, buìhtoq hkyam shut hu tô é wâng hkum mai, noqkuq yhûm shut wang lo ri. 5 Haú hkûn, Sô gi, ngo lé bún mù, ahtê pyâm wânghkaû má shuî wang ló ri; wú aq, haû Yhûmsîng Garaî é hpungwup shingkang gi, noqkuq yhûm má byíng zan tô ri.6 Byù haú yùq gi, ngá é nàm má yàp tô é u, noqkuq yhûm mai byù rayùq ngo lé dáng nyo kat é lé, ngò wó gyô ri. 7 Yhang gi, ngo lé, “Byù zo ê, jowò shî gi, Ngá é hkóhkâm tángmyhâng jòq é jowò, Ngá é hkyîwa nâng é jowò nghut lhê. Shî gi, Isira-elaq byu pê chyáng Ngò ahtum abyùq nyì râ jowò nghut lhê. Isira-elaq byu pé gi, yhángmòq le, yhángmòq é hkóhkam pé le, yhûmsîng hparà hpôlhô noq é mara kut shut é dông eq, yhángmòq é hkóhkam pé é matú myhup yhûm é wè zoshuq pé dông mai, Ngá é chyoiyúng myìng lé hkâ-nhám le agòt a-û kut kôrâ a nghut lo. 8 Yhángmòq gi, yhángmòq é hkumtáng lé, Ngá é hkumtáng nâm má, yhángmòq é hkum dúnlhum lé, Ngá é hkum dúnlhum nàm má saî xuq to kômù, Ngò eq yhángmòq é gyoro má xêwâm za kyo tô é hkûn, yhángmòq kut é achaq achyut hkyô pê èq Ngá é chyoiyúng myîng lé agòt a-û kut pyám bekô nghut ri. Haû mù, Ngò gi, nhikmó-yô é mai yhángmòq lé lhoqhtên pyâm é nghut lhê. 9 Ahkuî, yhángmòq gi, yhûmsîng hparà hpôlhô noq é mara kut shut é hkyô eq yhángmòq é hkóhkam pê é matú myhup yhûm é wè zoshuq pé lé, Ngá chyáng mai huî sêng pyám kó sháng gàq; haû jáng, Ngò gi, yhángmòq chyáng ahtum abyùq nyi nyì râ nghut lhê.
10 Byù zo ê, nàng gi, Isira-elaq byu pé, yhûmsing é yubàk marâ é yánmai hoq hpû bùm kó sháng gàq, yhángmòq lé noqkuq yhûm hkyô taî sân kyo aq. Haú é gúmjùp hkyô lé yhángmòq rago myìt tû wú kó sháng gàq; 11 yhángmòq gi, yhûmsîng kut shut é yubàk mara bànshoq é yánmai, hoq hpû bùm kô é nghut jáng, yhángmòq lé, noqkuq yhûm azòng, haú lé saí râ ahkyo, htoq ló wang lò râ hkum pé, kyûng tap râ azòng bànshoq, cháng râ htûngli pé eq cháng râ târâ pé bànshoq sé nhâng àq. Yhángmòq gi, azòng haú lé rago wó kut mù, cháng râ htûngli bànshoq lé rago wó cháng kó sháng gàq, yhángmòq é hí má haú pé lé tsing kâ to aq.
12 Noqkuq yhûm hau é târâ gi, shí dông nghut lhê; bùm nyuq eq hau é awui ayàm jowò lhînghkyùq gi, chyoiyúng htâng é jowò dùt râ nghut lhê. Wú keq; haû gi, noqkuq yhûm hau é târâ nghut lhê.
Hkungga Gyàp Mó Saî Saî É Hkyô
13 Kê é dúng dông hkungga gyàp lé kê é hkyô gi, shí dông nghut ri; kê é dúng haû gi, radúng èq lòqwa rahup bo é dúng nghut ri; hkungga gyàp é awang má gi, radúng nìk mù, radúng lam é langhkyo saí luî, lhînghkyùq má lòq rahup dúng tô é nghut râ nghut lhê; haû gi, hkungga gyàp é awang langhkyo nghut ri. 14 Awang langhkyo haú mai sânghî tsáng jé shoq gi, í dúng myhâng luî, radúng lam é gyám tam to ri; haú mai gyorô tsáng jé shoq gi, myi dúng myhâng mù, radúng lam é gyám tam tô é nghut ri. 15 Hau é ahtoq tsáng gi, hkungga nyhé jang nghut mù, myi dúng myhâng luî, ahtoq shut hkyuî myi hkyuî dàp é nghut râ nghut lhê. 16 Hkungga nyhê é tsáng gi, myi chyûn mâ é nghut luî, hîng hpyang raxe í dúng bò mù, làm hpyang raxe í dúng bo é nghut râ nghut lhê. 17 Haú tsâng é awang le myi chyûn mâ é nghut luî, hîng hpyang raxe myi dúng bò mù, làm hpyang raxe myi dúng bo é nghut râ nghut lhê. Hau é awang lhînghkyùq má gi, radúng lam é langhkyo eq rahto èq lòqwa rahup dúng ze htoq tô é nghut râ nghut lhê. Hkungga gyàp é zùmhtâng gi, buìhtoq hkyam shut hu tô é nghut râ nghut lhê.” ga taî ri.
18 Hau htâng, yhang gi, ngo lé, “Byù zo ê, haû Ahko Ahkáng lhúnglháng wó Sû Yhûmsîng Garai shî su ga taî ri; hkungga gyàp saî tô é buìnyì má, haú má sui hpyûn gyun râ eq myi nyhé hkungga pé nyhê nhông râ cháng ra târâ pé gi, shí dông nghut lhê; 19 Ngo lé dójaú râ matú, Ngá é hí má chyâng lé lo é, Lewiq up byù, Zadok é awùt ashín hkyangjông pé lé, mara hkyut hkunggâ é matú nohtó râm zo radu àp byi râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 20 Nàng gi, hau é sui ra-am lé yù mù, hkungga gyàp é hkyuî myi hkyuî má le, ahtoq mâ é myi chyûn má le, lhînghkyùq dúng htoq ze tô é má le, but ra râ nghut lhê; haú dông, nàng gi, hkungga gyàp lé lhoq sân-yúng luî, hau é matú hkô htaí hkungga nhông byi ra râ nghut lhê. 21 Nàng gi, mara hkyut hkunggâ é matú nohtó haú lé yù mù, sân-yúng jowò shinggan, noqkuq yhûm mâ é masàt tô é jowò má, haú lé nyhé ra râ nghut lhê.
22 Htang nyí, nàng gi, mara hkyut hkunggâ é matú, haî le a râ é bainám lo radu nhông byi mù, hkungga gyàp lé nohtô èq lhoq sân-yúng é su, hau èq lhoq sân-yúng ra râ nghut lhê. 23 Hkungga gyàp lé wó lhoq sân-yúng jáng, nàng gi, haî le a râ é, nohtó râm zo radu eq sau hpúng mâ é saulo radu lé nhông byi ra râ nghut lhê. 24 Nàng gi, haû í du lé, Yhûmsîng Garaî é hí má nhông byi ra râ nghut lhê; hkyangjông pé gi, hau é ahtoq má xo hpyun byi mù, haû Yhûmsîng Garaî é matú myi nyhé hkungga dông àp nhông byi ra râ nghut lhê.
25 Nàng gi, nyhit nyí yhang, mara hkyut hkunggâ é matú nyí wuî bainám lo radu du nhông byi mù, haî le a râ é, nohtó râm zo radu eq sau hpúng mâ é saulo radu lé nhông byi ra râ nghut lhê. 26 Yhángmòq gi, nyhit nyí yhang, hkungga gyàp é matú hkô htaí hkungga nhông byi mù, haú lé lhoq sân-yúng ra râ nghut lhê; yhángmòq gi, haú dông, hkungga gyàp haú lé àp nhông byi kôrâ nghut lhê. 27 Buìnyì haú pé ngap jáng, shit nyí nyí mai, hkyangjông pé gi, hkungga gyàp haú má, núngmòq é myi nyhé hkungga pé eq zùmhkaû hkungga pé lé nhông byi ra kôrâ nghut lhê. Haú hkûn, Ngò gi, núngmòq lé hàp yù râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.” ga taî ri.