41
Hau htâng, yhang gi, ngo lé noqkuq yhûm ahkaû wàp mó má shuî ê mù, hkum chyûn zìng pé lé kê ri; í hkyam shut mâ é zìng gi, hkyuq dúng dúng htu é nghut mù, bànshoq sàksé zúm eq rajung za lam ri. 2 Yhûm wàng hkum gi, raxê dúng lam ri; hkum í yâm mâ é xêwâm gi, ngo dúng dúng lam ri. Yhang gi, yhúmhkaû wàp mó lé le kê ri; haû gi, hîng hpyang myi xê dúng bò mù, làm hpyang í xê dúng bo ri.3 Hau htâng, yhang gi, ahtê pyâm sân-yúng jowò má wang ló mù kê ri; hkum zîng gi, razìng í dúng dúng htu ri; hkum gi, hkyuq dúng làm mù, hkum í hkyam shut mâ é xêwâm gi, nyhit dúng dúng lam ri. 4 Yhang gi, ahtê pyâm sân-yúng jowò lé kê ri; haû gi, hîng hpyang í xê dúng bò mù, làm hpyang í xê dúng bo ri; haû gi, yhúmhkaû wàp mó xêwâm eq xoq tô ri; haú hkûn, yhang gi, ngo lé, “Shî gi, Chyoiyúng Htáng Jowò nghut lhê.” ga taî ri.
5 Hau htâng, yhang gi, noqkuq yhûm xêwâm lé kê ri; haû gi, hkyuq dúng htu ri; noqkuq yhûm xêwâm lhînghkyùq mâ é wàp pé gi, myi dúng dúng lam ri. 6 Xêwâm mâ é wàp pé gi, ra-tsáng má sum xê wàp wàp kut luî, sum tsáng kut tô ri. Wàp haú pé gi, noqkuq yhûm xêwâm ahkaû shut a tap háng râ matú, xêwâm gyam eq xoq lhûm tô ri. 7 Xêwâm mâ é wàp pé gi, ra-tsâng htoq ra-tsáng mâ é wàp je lam ri; hkâsu mù gâ le, wàp haú pé gi, noqkuq yhûm lhînghkyùq má saî toq tô é nghut mù, ra-tsáng mâ é wàp pé gi, ra-tsâng htoq saî lam toq ló é nghut ri. Sânghî tsáng mai gyorô tsáng, haú mai ló htâng é tsáng jé shoq zùmhtâng htung dòq ló é nghut ri.
8 Ngò gi, noqkuq yhûm haû lhînghkyùq má gyám tam hkâng tô é along lé myang ri; haû gi, xêwâm mâ é wàp pê é a-pûn awang nghut ri; haû gi, hkyuq dúng bo é jàm yang rayang híng lam é nghut ri. 9 Xêwâm mâ é wàp pê é shinggan shut mâ é xêwâm gi, ngo dúng htu ri. Noqkuq yhûm xêwâm mâ é wàp pé eq, 10 hkyangjông pê é wàp pê é gyoro má, noqkuq yhûm lhînghkyùq mân tô é jowò gi, í xê dúng lam ri. 11 Xêwâm mâ é wàp pé má wàng râ hkum gi, mân tô é jowò shut hpông tô é nghut mù, rahkum gi, mautsûng hkyam shut, rahkum gi, maupyî hkyam shut hu tô ri; mân tô é jowò lhînghkyùq má ngo dúng làm shoq gyám tam hkâng tô ri.
12 Noqkuq yhûm buìwàng hkyam mâ é mân tô é jowò má, nyhit xê dúng lam é yhûm ralhum jòq tô ri; hau é xêwâm gi, lhînghkyùq má ngo dúng htû luî, gau xê dúng hing ri.
13 Hau htâng, yhang gi, noqkuq yhûm lé kê ri; haû gi, hîng hpyang rashô dúng bo ri; haû mân tô é jowò eq yhûm hau é xêwâm pé le, hîng hpyang rashô dúng dúng bo ri. 14 Noqkuq yhûm yhûmhkun eq buìhtoq hkyam má mân tô é jowò gi, làm hpyang rashô dúng bo ri.
15 Hau htâng, yhang gi, noqkuq yhûm nùnghtáng shut mâ é mân tô é jowò shut hu tô é yhûm eq hau é laìshînhtâng í hkyam lé kê ri; haû gi, rashô dúng bo ri.
Yhúmhkaû wàp mó, ahtê pyâm sân-yúng jowò eq wânghkaû mâ é laìshînhtâng pé, 16 hkumtáng pé, hkohot zo pé, hkumtáng pê hí mâ é, lhînghkyùq sum tsáng mâ é wàp eq, myigùng pyâm mai hkohot jé shoq le, hkohot zo pé má le, siklông èq nghop tô ri. 17 Ahtê pyâm sân-yúng jowo é hkum ahtoq mâ é mân tô é jang eq sân-yúng jowo é ahte shut mâ é xêwâm eq shinggan shut mâ é xêwâm lhînghkyùq má gi, 18 hkerubim alhô eq byùm gàm alhô pé kyûng tap tô bum ri; hkerubim alhô í lhum má byùm gàm alhô ralhûm htâng ralhum lhum dàp tô ri; hkerubim alhô ralhum má, myòqdong í lhum lhum dàp tô ri. 19 Byu myòqdong gi, byùm gàm alhô rahkyam shut hu to mù, hkanghkyi râm myòqdong gi, byùm gàm alhô góhkyam shut hu tô ri. Noqkuq yhûm gón má haú dông kyûng tap tô bum ri. 20 Yhúmhkaû wàp mó é myigùng hpyang mai hkum ahtoq jé shoq, xêwâm má hkerubim alhô eq byùm gàm lhô pé tsing kyûng tap tô ri.
21 Yhúmhkaû wàp mó mâ é hkumzîng gi, myi chyûn bò mâ é nghut ri; Chyoiyúng Htáng Jowò hí mâ é hkumzîng le haû su dùt ri. 22 Sik hkungga gyàp ralhum jòq tô ri; hau é myhâng hpyang gi, sum dúng bò mù, hîng hpyang gi, í dúng bo ri; hau é htúngchyûn pé, tsûngjang pé eq myi yâm shut gi, sik chyat nghut ri. Yhang gi, ngo lé, “Shî gi, haû Yhûmsîng Garaî hí mâ é mùkgyàp nghut lhê.” ga taî ri. 23 Yhúmhkaû wàp mó le, Chyoiyúng Htáng Jowò le, hkum í long long dàp ri. 24 Rahkum má, hkumlong í long long dàp mù, agùng má wó lâng nghuq ri. 25 Noqkuq yhûm ahkaû wàp mó mâ é xêwâm pé má kyûng tap tô é eq rajung za, yhúmhkaû wàp mó hkum long pé má le, hkerubim alhô eq byùm gàm alhô pé kyûng tap tô bum ri; hkúmtot mâ é laìshînhtâng má gi, sik èq saî nghop tô ri. 26 Laìshînhtâng í hkyam shut mâ é xêwâm mâ é hkohot zo pê é í yâm má gi, byùm gàm alhô pé tsing kyûng tap tô bum ri. Noqkuq yhûm xêwâm wàp pé má le, laìshînhtâng pé saî nghop tô bum ri.