Hpara-uq É Matú Ngaùhkyang Sang É Hkyô
32
Raxe í zan zàn, raxe í hkyap hkyap, lhôxân nyí má, haû Yhûmsîng Garaî é mungdang ngá chyáng jé é gi, 2 “Byù zo ê, Egutuq hkóhkâm Hpara-uq eq séng luî ngaùhkyang sâng mù, yhang lé,‘Nàng gi, byù myû wui chyáng hkanghkyi râm zo su nghut ri;
nghut kôlhang, nàng gi, wuimau pé mâ é mànjùng mó za nghut bê mù,
náng é wuìlàng zo pé má wuìli lî yông wún luî,
náng é hkyi èq wuìlàng zo haú pé lé lhu mhuî bê nghut ri.
3 Haû Ahko Ahkáng lhúnglháng wó Sû Yhûmsîng Garai shî su ga taî ri;
Ngò gi, byù ajùm ayò eq rahá,
náng lé gùn dú nghop râ nghut mù,
yhángmòq gi, nang lé Ngá é gùn mai lâng htoq yû kôrâ nghut lhê.
4 Ngò gi, nang lé myigùng htoq má dú lheq to mù,
pá mau má lhuî tâng pyám râ nghut lhê.
Ngò gi, maulat nghoqzo bànshoq lé náng é ahtoq má zùng nhâng mù,
myìdàm htoq mâ é tân jung yòsô zè bànshoq lé, náng é shî màng zô gyi nhâng râ nghut lhê.
5 Ngò gi, náng é sho lé bùm pé má hkâng pyám mù,
myìt gyó tô é sho lé langhkaû pé má lhoqpyíng râ nghut lhê.
6 Ngò gi, náng chyáng mai yui htoq é sui lé,
ra-mau gón, bùm pé jé shoq teq nhâng luî,
langhkung pé má lhoqpyíng râ nghut lhê.
7 Nang lé Ngò lhoqhtûm pyâm é hkûn,
Ngò gi, mauhkûng lé nghop pyám mù,
haú mâ é kyî pé lé mauchut byùq nhâng râ nghut lhê;
Ngò gi, buì lé mhut èq nghop pyám mù,
lha-mó gi, a tso byùq râ nghut lhê.
8 Ngò gi, mauhkûng mâ é dùq bó gûng bànshoq lé,
náng é ahtoq má mauchut byùq nhâng râ nghut lhê;
Ngò gi, náng é mîngdán má mauchut tuq dùt nhâng râ nghut lhê;
haû gi, Ahko Ahkáng lhúnglháng wó Sû Yhûmsîng Garai taî pyo ri.
9 Ngò gi, nàng htên byòq é hkyô lé,
nàng a sê é mîngdán pé mâ é byù myû wui chyáng jé hkyâng nhang é hkûn,
byù myo myô é i-myìt nhiklhum má myìt wui myìt hke dùt nhâng râ nghut lhê.
10 Ngò gi, byù myo myo lé, náng é yánmai maú dân nhâng râ nghut mù,
yhángmòq é hkóhkam pê é hí má Ngò shâm wing é hkûn,
hkóhkâm haú bang gi, náng é yánmai gyùq nán byùq bùm kôrâ nghut lhê.
Nàng gyòp gyó byùq é buìnyì má,
yhángmòq yùq hkangmó gi,
yhûmsing é chyungxê é matú ahkyíng hkangmó gyùq nán bûm kôrâ nghut lhê.
11 Hkâsu mù gâ le, haû Ahko Ahkáng lhúnglháng wó Sû Yhûmsîng Garai shî su ga taî ri;
Babelon hkóhkam é shâm gi,
náng chyáng jé râ nghut lhê.
12 Ngò gi, byù myû wuì bànshoq mâ é je wuî é byù nghut é,
sârhe pê é sham èq náng é byù ajùm ayò lé gyòp gyó nhâng râ nghut lhê.
Yhángmòq gi, Egutuq mîng é nghutbun hkyô lé akôm kut pyám byi kômù,
yhâng é byù ajùm ayò bànshoq lé lhoqhtên pyám byi kôrâ nghut lhê.
13 Ngò gi, wuì mó lâng yàm pé má nyi é,
yhâng é shigu gaunyhaú pé bànshoq lé lhoqhtûm pyám râ nghut mù,
byu é hkyî le, shigu gaunyhaû pê é hkôdòq le,
wuì haú lé lhoqmhuî kôrâ a nghut lo.
14 Haú hkûn, Ngò gi, yhâng é wuì lé lhoq sân-yúng râ nghut mù,
yhâng é wuìlàng pé lé, xû su yui nyì nhâng râ nghut lhê;
haû gi, Ahko Ahkáng lhúnglháng wó Sû Yhûmsîng Garai taî pyo ri.
15 Ngò gi, Egutuq ming lé chamchyuîyuì kut pyám mù,
haú ming mâ é lhúnglháng lé shang yu pyám byi luî,
haú má nyi é bang bànshoq lé sat kyop pyâm é hkûn,
Ngò gi, haû Yhûmsîng Garai nghut é lé, yhángmòq sé kôrâ nghut lhê.’ nghû taí aq.
16 Haû gi, ngaùhkyang sângdang nghut mù, yhâng é matú yhángmòq ngaùhkyang sâng râ dang nghut lhê. Byù myû wui é byìzô pé gi, haú dông ngaùhkyang sâng kôrâ nghut lhê; yhángmòq gi, Egutuq ming eq yhâng é byù ajùm ayò bànshoq é matú, haú dông ngaùhkyang sâng kôrâ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.” gâ ri.
Egutuq Mîng É Matú Ngaùhkyang Sang É Dang
17 Raxe í zan zàn, lha-mó rahkyap, raxe ngo nyí nyí má, haû Yhûmsîng Garaî é mungdang ngá chyáng jé é gi, 18 “Byù zo ê, Egutuq ming mâ é byù ajùm ayo é matú ngaùhkyang sâng mù, nìk é dong má gyó wang ló bang eq rahá, Egutuq ming lé le, byù myû mó pê é byìzô pé lé le, myìdàm ahkaû má lhoqhkyô hâng kat àq. 19 Haû mù, yhángmòq lé, ‘Egutuq ming nàng gi, góbâng htoq je yúng lhê lhú? Gyó ló mù, ahpyo-kuq a hpyit é bâng chyáng ló bo lèq to aq.’ nghû taí aq. 20 Yhángmòq gi, sham èq sat hui bâng chyáng bo shi lèq to kôrâ nghut lhê; shâm gi, she htoq to bê nghut ri; yhang lé le, yhâng é byù ajùm ayò lé le, she hkyut htoq pyám keq. 21 Wum-o a-tsam mó bo é ushuq pé gi, mosumhkung mai, Egutuq ming eq yhang lé htuqbáng é bang eq séng luî, ‘Yhángmòq gi, gyó wang lò mù, ahpyo-kuq a hpyit é bang eq le, sham èq sat huî é bang eq le, bo lèq to bekô nghut ri.’ ga taí kôrâ nghut lhê.
22 Asuri mau eq yhâng é gyèhpúng mó gi, haú má nyi tô ri; sat hui bang bànshoq é lùp pé gi, yhâng é lhînghkyùq má jòq tô ri; haú bang bànshoq gi, sham èq sat pyâm é hui bang chyat nghut ri. 23 Yhángmòq é lùp pé gi, dong mâ é nìk é jang má jòq mù, yhâng é gyèhpúng pé gi, yhâng é lùp lhînghkyùq má nyi bum ri. Dui nyì bâng é myìdàm htoq má gyùq chiq hpo lhoqpyo é bang bànshoq gi, sham èq sat lheq pyâm é hui bekô nghut ri.
24 Haú má, Elam mau le jòq é nghut mù, yhâng é byù ajùm ayò bànshoq gi, yhâng é lùp lhînghkyùq má nyi bum akô. Haû lhúnglhâng bang gi, sham èq sat lheq pyâm é huî bum akô. Dui nyì bâng é myìdàm htoq má gyùq chiq hpo lhoqpyo é bang bànshoq gi, ahpyo-kuq a hpyit é bang dông myìdàm ahkaû má gyó wang ló akô nghut ri. Yhángmòq gi, dong má gyó wang ló bang eq rahá hoq hpû é bo hui bekô nghut ri. 25 Yhâng é lùp lhînghkyùq má nyi é yhâng é byù ajùm ayò bànshoq eq rahá, sat hui bâng é gyoro má yhâng é matú hpyang saî to byî akô. Yhángmòq bànshoq bang gi, sham èq sat huî é, ahpyo-kuq a hpyit bang nghut akô. Yhángmòq gi, dui nyì bâng é myìdàm htoq má gyùq chiq hpo dùt kô é yánmai, nìk é dong má gyó wang ló bang eq rahá hoq bo hpu kôrâ nghut lhê; yhángmòq gi, sat pyâm é hui bâng é gyoro má lheq tô bum é huî akô nghut ri.
26 Meshek mau eq Tubala mau le haú má jòq tô é nghut mù, yhángnhik é lùp lhînghkyùq má gi, yhángnhik é byù ajùm ayò bànshoq nyi tô bum akô. Yhángmòq gi, dui nyì bâng é myìdàm htoq má gyùq chiq hpo lhoqpyô kô é yánmai, sham èq sat huî é, ahpyo-kuq a hpyit é bang nghut akô. 27 Nghut kôlhang, yhángnhik gi, góhkun lhê é sat huî é sârhe pé eq rahá bo myang lèq to râ a nghut; haú bang gi, yhûmsing é shâm lhâm eq rahá mosumhkung má gyó wang ló mù, yhûmsing é shâm pé lé uhkuq hkuq luî, yhûmsing é gòlong lé yhûmsing é showui htoq má kê tô akô; hkâsu mù gâ le, yhángnhik gi, dui nyì bâng é myìdàm htoq má gyùq chiq hpo lhoqpyô bekô nghut ri.
28 Hpara-uq ê, nàng le, lhoqhkyop pyâm é hui mù, sham èq sat huî é, ahpyo-kuq a hpyit bâng é gyoro má lèq to râ nghut lhê.
29 Edom ming le haú má jòq tô é nghut mù, yhâng é hkóhkâm pé eq yhâng é zau wuî bànshoq le, haú má nyi tô akô; yhángmòq gi, hpungwup a-tsam bo tô é u lháng, sham èq sat pyâm é hui bang eq rahá lèq tô bum akô. Yhángmòq gi, nìk é dong má gyó wang ló é, ahpyo-kuq a hpyit é bang eq rahá lèq tô bum akô nghut ri.
30 Mautsûng mâ é zau wuî bànshoq eq Sidon wà byù bànshoq gi, haú má nyi tô bum akô; yhángmòq gi, yhûmsing é hpungwup a-tsâm èq lhoqhtoq é gyùq chiq hpô é yánmai, hoq hpû é má sat huî bum akô; yhángmòq gi, sham èq sat huî é bang eq rahá, ahpyo-kuq a hpyit é za lèq to kôrâ nghut mù, nìk é dong má gyó wang ló bang eq rahá hoq bo hpu kôrâ nghut lhê.
31 Hpara-uq eq yhâng é gyèhpúng bànshoq gi, yhángmòq lé myàng kôrâ nghut mù, yhang gi, sham èq sat huî é yhâng é byù ajùm ayò bànshoq é matú nhiktîng é wó hkam yù râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 32 Ngò gi, yhang lé, dui nyì bâng é myìdàm htoq má gyùq chiq hpo dùt nhâng bê nghut kôle, Hpara-uq eq yhâng é byù ajùm ayò bànshoq gi, sham èq sat pyám huî é, ahpyo-kuq a hpyit bâng é gyoro má lèq to kôrâ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.” gâ ri.