Ezekela Lé Wú Zúng Sû Kut Nhang É Hkyô
33
Haû Yhûmsîng Garaî é mungdang ngá chyáng jé é gi, 2 “Byù zo ê, náng é byu pé lé dang nyô mù, yhángmòq lé, ‘Mîngdán ralhum lhum lé Ngò sham èq htuqhtîng jáng, mîngdán haú mâ é byu pé gi, yhángmòq chyáng mâ é byù rayùq hkyin htoq yû mù, haú yùq lé, yhángmòq é wú zúng sû kut nhang akô nghut ri; 3 haú yùq gi, mîngdán lé htuqhtíng râ shâm jé é lé myàng jáng, tut mùt mù, shiwa byu pé lé sidìq byî ri. 4 Haú hkûn, rayùq yùq tut htê lé wó gyo kôlhang, sidìq byî é lé a cháng kut mù, shâm gi, haú yùq é chyungxe lé yu pyám byi râ nghut jáng, haú yùq é sui mara gi, haú yùq é ulhum má nghut râ nghut lhê. 5 Yhang gi, tut htê lé wó gyô to kôlhang, sidìq byî é lé a cháng kut pyám bê nghut mù, yhâng é sui mara gi, yhâng é ulhum má nghut râ nghut lhê. Sidìq byî é lé yhang cháng é nghut jáng, yhang gi, yhûmsing chyungxe lé wó hkyi yù râ nghut lhê. 6 Nghut kôlhang, wú zúng sû gi, shâm jé é lé myang to gù, shiwa byu pé lé sidìq byi râ matú tut a mùt é nghut mù, yhángmòq mâ é rayùq yùq lé sham èq sat pyâm é nghut jáng, haú yùq gi, yhûmsing é marâ é yánmai, shi byùq bê nghut kôlhang, Ngò gi, haú yùq é sui yuichyîn lé wú zúng su chyáng bùt râ nghut lhê.’ nghû taí aq.7 Haû eq rajung za, byù zo ê, Ngò gi, nang lé, Isira-elaq byu pé lé wú zúng râ sû kut nhang to bê nghut lhê; haû mù, Ngá é dang lé gyô yù luî, Ngá é dâng èq yhángmòq lé sidìq byi aq. 8 Ngò gi, agè ashop sû lé, ‘Agè ashop sû ê, nàng teng za shî râ nghut lhê.’ nghû taî é hkûn, nàng gi, haú yùq lé, yhâng é hkyô pé mai lhing taû lò râ matú a taî é nghut jáng, agè ashop sû haú yùq gi, yhâng é yubàk mara mai shî râ nghut kôlhang, Ngò gi, haú yùq é sui yuichyîn lé náng chyáng bùt râ nghut lhê. 9 Nghut kôlhang, nàng gi, agè ashop sû lé, yhâng é hkyô pé mai lhing taû lò râ matú sidìq byi bê nghut kôle, yhang gi, a lhing taû lo é nghut jáng, yhâng é yubàk marâ é yánmai shi byùq râ nghut lhê; nàng kúm, yhûmsing chyungxe hkyi yu é hui râ nghut lhê.
10 Byù zo ê, Isira-elaq byu pé lé, ‘Núngmòq gi, “Ngá-mòq târâ lu laî é hkyô pé eq ngá-mòq é yubàk mara pê èq ngá-mòq lé nhê zìk tô é yánmai, ngá-mòq gi, jôm ló nyî bê nghut ri. Haû mù, ngá-mòq gi, hkâsu kut chyungxe wó duî râ lhú?” ga taî akô nghut ri.’ nghû taí aq. 11 Hau htoq agó, yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî pyo ri; Ngò rû dui nyi é eq rajung za, agè ashop sû shi byùq râ lé Ngò ô nau é a nghut; haû agè ashop sû gi, yhâng é hkyô pé mai lhing taû lò mù, chyungxe duì râ lé shèq, Ngò ô nau nyi é ru nghut lhê. Lhing taû lò keq! Núngmòq é agè ashop hkyô pé mai lhing taû lò keq! Isira-elaq byu pé ê, haî mù shi byùq kôrâ lhú?’ nghû le taí aq.
12 Haû mù, byù zo ê, náng é byu pé lé, ‘Díngmán sû rayùq jì-no a gyô byùq é nghut jáng, yhang díngmán pyâm é hkyô gi, hai a-kyû a bò lo dùt byùq râ nghut lhê. Agè ashop sû rayùq myìt lhîng wó é nghut jáng, yhang kut pyâm é agè ashop hkyô mai yhang mara dam byî é hui zo râ a nghut lo. Díngmán sû rayùq mara kut shut é nghut jáng, yhang gi, díngmán pyám bê nghut kôle, chyungxe wó duî râ a nghut.’ nghû taí aq. 13 Díngmán sû rayùq lé, ‘Nàng gi, gè gè yhang, chyungxe duì râ nghut lhê.’ nghû Ngò taí kôlhang, yhang gi, yhâng é díngmán hkyô lé lùm mù, agè ashop é hkyô kut é nghut jáng, haú yùq kut é díngmán hkyô haî lé le myìtbun byi râ a nghut; yhang gi, yhang kut é agè ashop hkyô mai shi byùq râ nghut lhê. 14 Agè Ashop sû rayùq lé, ‘Nàng gi, gè gè yhang, shî râ nghut lhê.’ nghû Ngò taí kôlhang, yhang gi, yhûmsing é yubàk mara lé koi pyám luî, târâ ràp-rá hkyô eq jo têng é hkyô lé kut mù, 15 chyî yu hkun lhê é dakâm sàksé zè lé dum tau byi, hkaû yu tô é zè lé dum tau byi kut luî, chyungxe duì nhang é târâ wàng hkunmó pé lé châng kut mù, agè ashop é hkyô lé a kut lô é nghut jáng, haú yùq gi, gè gè yhang, chyungxe duì râ nghut lhê; yhang gi, shî râ a nghut. 16 Haú yùq kut shut é yubàk mara haî lé le myìtbun byi râ a nghut. Yhang gi, târâ ràp-rá hkyô eq jo têng é hkyô lé kut bê nghut ri. Yhang gi, gè gè yhang chyungxe duì râ nghut lhê.
17 Nghut kôlhang, náng é byu pé, ‘Haû Yhûmsîng Garaî é hkyô gi, târâ a ràp-rá nghut ri.’ ga taî bum akô. Gè gè ga jáng, yhángmòq é hkyô shèq târâ a ràp-rá nghut ri. 18 Díngmán sû rayùq, yhâng é díngmán hkyô mai lhing tau mù, agè ashop hkyô kut é nghut jáng, yhang gi, agè ashop hkyô hau é yánmai shi byùq râ nghut lhê. 19 Agè ashop sû rayùq, yhâng é agè ashop hkyô mai lhing tau luî, târâ ràp-rá hkyô eq jo têng é hkyô lé kut é nghut jáng, yhang gi, haú dông mai chyungxe duì râ nghut lhê. 20 Nghut kôlhang, Isira-elaq byù núngmòq gi, ‘Haû Yhûmsîng Garaî é hkyô gi, târâ a ràp-rá nghut ri.’ ga taî bum akô. Nghut kôlhang, Ngò gi, núngmòq yùq hkangmó kut é hkyô pé má cháng luî, târâ jéyáng râ nghut lhê.” gâ ri.
Yerusalem Wà Mó Htên Byòq Byùq É Hkyô
21 Ngá-mòq shúm zung é raxe í zan zàn, lha-mó raxê hkyap, ngo nyí nyí má, byù rayùq, Yerusalem wà mó mai ngá chyáng hpang lùt jé lé mù, “Wà mó gi, htên byòq byùq bê nghut ri.” ga taî ri. 22 Haû wó hpang lùt lé sû jé râ hî myìn má, Yhûmsîng Garaî é lòq gi, ngá é ahtoq má jé mù, ngá é nhuthkum hpóng byi luî, htang nàpkyó haú yùq jé jáng, Ngò gi, nhuthkum hpóng bê nghut mù, zim za a nyi to lô é nghut lhê.
23 Haú hkûn, haû Yhûmsîng Garaî é mungdang ngá chyáng jé é gi, 24 “Byù zo ê, htên byòq tô é Isira-elaq mîngdán má nyi gyó tô é bang gi, ‘Abraham, yhang baú za nyì kôlhang, mîngdán haú lé myang sing yu ri. Nghut kôlhang, ngá-nhúng gi, myo myo nghut lhê mù, mîngdán haú lé ngá-nhûng é matú silî wunlî maumyî dông hkyak byî to bê nghut lhê.’ ga taî nyi bum akô nghut ri. 25 Haû mù, yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; núngmòq gi, suí bo é sho lé zo kômù, hparà hpôlhô pé lé tu wú kôluî, byù lé sat pyám bekô nghut luî nhîng, mîngdán haú lé wó sing yù kôrâ lhú? 26 Núngmòq gi, shâm lé lùm kômù, achaq achyut é hkyô pé kut kôluî, yhûmkyochâng é yhûmsîng myhí lé agòt a-û kut pyám kômù nhîng, mîngdán haú lé wó sing yù kôrâ lhú?’ nghû taí aq.
27 Hau htoq agó, yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Ngò rû dui nyi é eq rajung za, htên byòq tô é jang má nyi gyó tô é bang gi, sham èq shi byùq kôrâ nghut lhê; yòso pá pé má jé nyi é bang lé gi, tân jung yòsô zè pê èq zô pyám râ matú àp pyám râ nghut lhê; gingtíng jowò eq lùqhkyûng má nyi é bang gi, wúm mai shi byùq kôrâ nghut lhê. 28 Ngò gi, mîngdán haú lé chamchyuîyuì jòq sâ to nhâng râ nghut lhê; yhang nghutbûn é wum-o a-tsam gi, htûm byùq râ nghut lhê; Isira-elaq é bùm pé gi, ó le a laî byùq loshoq, chamchyuîyuì dùt byùq râ nghut lhê. 29 Haû mù, yhángmòq kut é achaq achyut hkyô bànshoq é yánmai, mîngdán haú lé Ngò chamchyuîyuì kut pyâm é hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê.’ nghû le taí aq.
30 Byù zo ê, náng é byu pé gi, wàhkûm pé eq yhûmhkum pé má nàng eq séng luî taî nyi bum akô; yhángmòq gi, ‘Sâ, haû Yhûmsîng Garaî chyáng mâ é mungdang lé ê gyo sháng.’ ga rayùq eq rayùq taî lhûm bum akô nghut ri. 31 Ngá byu pé gi, yhángmòq lhaq kut nyi bum é su, náng chyáng lé mù, náng é dang gyô yù kôrâ matú náng é hí má zung bùm kôlhang, dang haú pé lé a châng kut kó nghut ri; yhángmòq gi, nhut mai chyitdàp hkyô taí kôlhang, a târa é sùtzè wó râ matú myòqnòq myìt bo bum akô nghut ri. 32 Wú aq, náng é dang gi, yhángmòq é hí má, gyai ngón é hkyung htê mai chyitdàp mahkôn hkôn mù, mùt jung bàt jung lé rago dàt mùt dàt bàt é sû su dùt byùq ri; hkâsu mù gâ le, yhángmòq gi, náng é dang gyô yu bùm kôlhang, dang haú pé lé a châng kut kó nghut ri.
33 Dang haú pé bànshoq hkyak dùt htoq râ nghut mù, haú pé dìk byùq é hkûn, yhángmòq chyáng myìqhtoi rayùq nyì bê nghut é hkyô lé, yhángmòq sé kôrâ nghut lhê.” gâ ri.