Lêng Byùq É Lebanon Mâ É Kyám Gâm Su Dùt É Hpara-uq
31
Raxe razan zàn, lha-mó sum hkyap hkyap, lhôxân nyí má, haû Yhûmsîng Garaî é mungdang ngá chyáng jé é gi, 2 “Byù zo ê, Egutuq hkóhkâm Hpara-uq eq yhâng é byù ajùm ayò lé,‘Náng é kô làm hkìkhkâm hkyô lé ó yùq wó whuí râ lhú?
3 Asuri ming lé myìt tû wú keq;
yhang gi, Lebanon bùm mâ é kyám gâm su dùt wú ri;
yhang gi, akoq hkyâm lam yúng mù, gyaí wúm é nghut luî,
agàm gyai ko gyai myhâng luî, siknyùq pé gi, mhut pé má lháng jé hkyang ri.
4 Wuìlàng é yánmai kô lò mù,
nìk é wuìbúm pê é yánmai gyai kô myhang lo ri;
wuì zo làng pé gi, hau é lhînghkyùq má yui nyì mù,
haú mâ é wuìhkyo pé gi, pá pé mâ é sikgâm pé bànshoq má yui jé bum ri.
5 Haû mù, agàm haû gi, pá pé mâ é sikgâm pé bànshoq htoq má je myhang ri;
agàm haû yùq myhang lò mù,
wuì myô é yánmai, hau é akoq pé gyai hkyâm lam lò bê nghut ri.
6 Maulat nghoqzô pé bànshoq gi,
hau é akoq pé má nghoqsut saî akô;
tân jung yòsô zè pé bànshoq gi,
hau é akoq pê é buìshûm ô má azo lé shuî bum akô;
byù myû mó pé bànshoq gi,
hau é buìshûm ô má nyi bum akô nghut ri.
7 Sikgâm hau é a-myìt gi, wuì myô é jang má chîn tô é yánmai,
sikgâm haû kô myhâng hkyâm lam lò mù,
kô yúng hkìkhkam to bê nghut ri.
8 Garai Gasâng é hkyâm mâ é kyám gâm pé gi,
sikgâm haú lé wó whuí râ a nghut;
shihtáng gam é akoq pé le,
htángnyhoq gam é akoq pé le,
hau é akoq pé lé wó whuí râ a nghut;
Garai Gasâng é hkyâm má yùq é sikgâm pé bànshoq gi,
sikgâm haû su yúng é a bò nghut ri.
9 Garai Gasâng é hkyâm Edin mâ é sikgâm pé lháng mânon shoq,
Ngò gi, sikgâm haú lé akoq myo myo dàp nhang é dông lhoqyúng tô é nghut lhê.
10 Haû mù, haû Ahko Ahkáng lhúnglháng wó Sû Yhûmsîng Garai shî su ga taî ri; kyám gâm shî gi, mhuthtui má lháng a-nyùq jé hkyang é nghut mù, haú lé nghutbun bê nghut é yánmai, 11 Ngò gi, gótû byù myû wui é zaû é lòq má sikgâm haú lé àp pyám bê nghut lhê; haú yùq gi, yhâng é agè ashop hkyô má cháng mù, yhang lé dam byi râ nghut lhê. Ngò gi, sikgâm haú lé tô pyám bê nghut mù, 12 maigan byù myû pé mâ é byù wui mó gi, sikgâm haú lé htuq pyám luî, tô pyâm to bê nghut ri. Haú é akoq pé gi, bùm htoq pé má le, langhkaû bànshoq pé má le, gyó lèq tô ri; hau é a-kyâng pé lé gi, ra-mau gón é langhkung bànshoq pé má lhoqhkyop pyâm to bê nghut ri. Myìdàm htoq mâ é byù myû bànshoq gi, hau é buìshûm ô mai htoq lô kômù, haú lé tô pyâm to bekô nghut ri. 13 Nghoqzô pé bànshoq gi, lêng lèq tô é sikgâm haú má nyi bùm mù, tân jung yòsô zè pé gi, hau é akoq gyoro pé má nyi bum akô nghut ri. 14 Haû mù, wuì yàm má yùq é sikgâm pé hkâ le, gyai yùq myhang é yánmai a nghutbûn é htoq agó, yhûmsing é siknyùq lé mhuthtui má a jé nhâng kôrâ nghut lhê. Wuì bò mù yùq kô é sikgâm hkâ le, haú myháng wó myhâng râ a nghut; hkâsu mù gâ le, haú pé bànshoq gi, mosumhkung shut wang ló é xângzo byu pé eq rahá, myìdàm ahkaû mâ é shî nò hkyo é matú, àp byî pyâm é huî é chyat nghut akô nghut ri.
15 Haû Ahko Ahkáng lhúnglháng wó Sû Yhûmsîng Garai shî su ga taî ri; sikgâm haû mosumhkung má gyó ló é buìnyì má, Ngò gi, hau é matú iyon yôn é nìk é wuìbúm pé lé nghop pyâm é nghut lhê; Ngò gi, hau é wuìlàng zô pé eq agùn agó é wuì lé lhoqnô pyâm é nghut lhê; sikgâm hau é yánmai, Ngò gi, Lebanon bùm lé iyon yon nhâng mù, pá pé mâ é sikgâm bànshoq lé nyhuî kyuq byùq nhang é nghut lhê. 16 Sikgâm haú lé, nìk é dong má wang ló bang eq rahá, mosumhkung má Ngò hkyô hâng kat é hkûn, sikgâm haû lêng é htê yánmai, Ngò gi, byù myû wuì lé gyùq nán nhâng bê nghut lhê. Haú hkûn, Eden mâ é sikgâm bànshoq, Lebanon bùm mâ é je réng je ge é sikgâm pé, wuì rago wó é sikgâm pé gi, myìdàm hkaû má nhiktîng é hui bê nghut ri. 17 Haú pé le, sham èq sat hui mù mosumhkung má gyó wang ló bang eq rahá, kyám gâm mó su wang ló bê nghut lhê; haú bang gi, gótû byù myû wuì chyáng sikgâm hau é buìshûm ô má nyi é, yhâng é lòqwum nghu é bang nghut akô.
18 Egutuq hkóhkâm nàng gi, Edin má yùq é, hkìkhkâm kô myhang é sikgâm pé hkâ eq du lhê lhú? Nghut kôlhang, nàng le, Edin má yùq é sikgâm pé eq rahá, myìdàm hkaû má lhoqhkyô pyâm é hui râ nghut lhê; nàng gi, sham èq sat huî é, ahpyo-kuq a hpyit é bâng chyáng lé lèq to râ nghut lhê.
Haû gi, Hpara-uq eq yhâng é byù ajùm ayò pé nghut ra nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.’ nghû taí aq.” gâ ri.