Egutuq Mîng É Matú Ngaùhkyang Sang É Hkyô
30
Haû Yhûmsîng Garaî é mungdang ngá chyáng jé é gi, 2 “Byù zo ê, myìqhtoi htoi mù, ‘Haû Ahko Ahkáng lhúnglháng wó Sû Yhûmsîng Garai shî su ga taî ri;ngaùhkyûng ngaùyang kut mù,
“Buìnyì haû gi, dingnyé jòq ri nhung!” nghû taí aq.
3 Hkâsu mù gâ le, buìnyì haû gi, chyáng bê nghut ri;
haû Yhûmsîng Garaî é buìnyì haû gi, chyáng bê nghut ri;
haû gi, mhut htu é buìnyì,
gótû a-myû wui é matú dàm mó byî é buìnyì nghut râ nghut lhê.
4 Shâm gi, Egutuq ming lé htuqhtíng râ nghut mù,
Ehti-opi mau má myìt myo ûng wum hkyô jé râ nghut lhê.
Egutuq ming má byù sat lheq tô bum é hkûn,
Egutuq ming mâ é sùtzè pé lé yu ló pyám byi mù,
haú mâ é a-pûn awang lé lhoqhkyop pyám byi kôrâ nghut lhê.
5 Ehti-opi mau, Libya mau, Ludi-a mau, Arabi-a mau bànshoq, Hkup mau eq dangshikaq tô tô é mau mâ é byu pé gi, Egutuq byu pé eq rahá, sham èq sat pyâm é hui zo kôrâ nghut lhê.
6 Haû Ahko Ahkáng lhúnglháng wó Sû Yhûmsîng Garai shî su ga taî ri;
Egutuq ming lé htuqbáng nyi é bang gi, sat pyâm é hui kôrâ nghut mù,
yhang nghutbûn é wum-o gi, wúm shun byùq râ nghut lhê.
Mautsûng hkyam mâ é Migidola wà mai maupyî hkyam mâ é Asiwan wà jé shoq mâ é bang gi,
yhâng é mau hkaû má sham èq sat pyâm é hui râ nghut lhê;
haû gi, Ahko Ahkáng lhúnglháng wó Sû Yhûmsîng Garai taî pyo ri.
7 Yhángmòq gi, chamchyuîyuì dùt é mîngdán pé má,
chamchyuîyuì bo dùt byùq râ nghut lhê;
yhángmòq é wà pé gi, byòq htên tô é wà pé má,
bo byòq htên to râ nghut lhê.
8 Egutuq ming lé Ngò myi tap kat luî,
yhang lé garúm é bang bànshoq htên byòq bùm kô é hkûn,
Ngò gi, haû Yhûmsîng Garai nghut é lé, yhángmòq sé kôrâ nghut lhê.
9 Haú buìnyì má, hai myìt le a chiq é za nyi tô é, Ehti-opi mau mâ é byu pé lé kyuq dân râ matú, Ngá chyáng mâ é lagyô pé gi, wuìsanghpo pé jî htoq e ló luî, Egutuq ming dàm mó byî é hui zô é buìnyì má, yhángmòq myìt myo ûng wôm é hkyô hui zo kôrâ nghut lhê; hkâsu mù gâ le, haû gi, hkyak jé râ nghut lhê.
10 Haû Ahko Ahkáng lhúnglháng wó Sû Yhûmsîng Garai shî su ga taî ri;
Ngò gi, Babelon hkóhkâm Nebuhkatneza é lòq èq,
Egutuq ming mâ é byù ajùm ayò lé lhoqzîm pyám râ nghut lhê.
11 Egutuq ming haú lé lhoqhtên pyám râ matú,
byù myû wui chyáng mâ é wuî dik é byu pé nghut é,
yhang eq yhâng é gyè jùm lé shuî lé râ nghut lhê.
Yhángmòq gi, Egutuq ming lé htuqhtíng râ matú yhángmòq é shâm shê mù,
mîngdán haú má byù màng lhoqpyíng kôrâ nghut lhê.
12 Ngò gi, Nile Wuìlàng lé lhoqkân pyám mù,
haú mau lé, agè ashop é byù myû chyáng ung byî pyám râ nghut lhê;
Ngò gi, maigan byu pê é lòq èq,
mîngdán haû eq haú má nyi é lhúnglháng lé,
chamchyuîyuì kut pyám râ nghut lhê.
Haú hkyô lé, Ngò Yhûmsîng Garai taî é nghut lhê.
13 Haû Ahko Ahkáng lhúnglháng wó Sû Yhûmsîng Garai shî su ga taî ri;
Ngò gi, hparà hpôlhô pé lé lhoqhtên pyám luî,
Memhpi wà mâ é hparà lhô pé lé lhoqhtûm pyám râ nghut lhê.
Egutuq ming má zau nyì râ a nghut lo;
Ngò gi, ra-mau gón lé gyùq chiq nhâng râ nghut lhê.
14 Ngò gi, Egutuq ming Ahtoq Túm lé lhoqhtên pyám mù,
Zo-an wà lé nyhê pyám luî,
Htebe wà má mara dàm mó byi râ nghut lhê.
15 Ngò gi, Egutuq é gingtíng jowò nghut é,
Pelusi-um wà htoq má Ngá é nhikmó-yo hkyô hut hkyô kat mù,
Htebe wà mâ é byù ajùm ayò lé lhoqhtûm pyám râ nghut lhê.
16 Ngò gi, Egutuq ming lé nyhê hkyó râ nghut mù,
Pelusi-um wà gi, dìk shoq hpu zo râ nghut lhê.
Htebe wà gi, gyòp byùq mù,
Memhpi wà gi, myìt myo ûng wôm é ayang hui zo râ nghut lhê.
17 Heli-opolisa wà eq Bubasiti wà mâ é zorâm wuì gi,
sham èq shî kôrâ nghut mù,
wà pé mâ é byu pé gi, shúm zung é hui kôrâ nghut lhê.
18 Egutuq mîng é kyaú lé Ngò lhoqhkyuî pyâm é hkûn,
Tahpan-hesi wà má, nyí gi, myín dùt byùq râ nghut lhê;
yhang nghutbûn é wum-o gi, htûm byùq râ nghut lhê.
Wà haú má mhut htup byùq râ nghut luî,
hau é wà htum pé gi, shúm zung é hui kôrâ nghut lhê.
19 Haû mù, Ngò gi, Egutuq ming lé mara dam mó byi râ nghut mù,
Ngò gi, haû Yhûmsîng Garai nghut é lé, yhángmòq sé kôrâ nghut lhê.’ nghû taí aq.” gâ ri.
Hpara-uq É Wum-o Nghut É Lòqbú Gyuî Byùq É Hkyô
20 Raxe razan zàn, sânghî lhôhkyap, nyhit nyí nyí má, haû Yhûmsîng Garaî é mungdang ngá chyáng jé é gi, 21 “Byù zo ê, Ngò gi, Egutuq hkóhkam Hpara-uq é wum-o nghut é lòqbú lé lhoqhkyuî pyám bê nghut lhê. Haû gi, chi kat luî htup byî é huî é a nghut; shâm lé wó zui wum bò râ matú, pân èq htup byî é le huî é a nghut. 22 Haû mù, Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, Egutuq hkóhkâm Hpara-uq lé htuqhtîng lhê. Ngò gi, yhâng é lòqbú lé lhoqhkyui byi mù, jàp byùq bê nghut é lòqbú lé le lhoqhkyui byi râ nghut luî, yhâng é lòq mâ é shâm lé lhoqhkyô pyám byi râ nghut lhê. 23 Ngò gi, Egutuq byu pé lé, gótû byù myû wui chyáng hkat hâng kat mù, mîngdán pé má lhoqpyo hâng kat râ nghut lhê. 24 Ngò gi, Babelon hkóhkam é lòqbú lé wum lhoqkíng byi luî, yhâng é lòq má Ngá é shâm kat byi râ nghut lhê; nghut kôlhang, Hpara-uq é lòqbú lé gi, Ngò lhoqhkyuî pyám byi râ nghut mù, yhang gi, dàm dap zu záng luî shî râ nghut é byù rayùq su, Babelon hkóhkam é hí má myìt nò-kying kying râ nghut lhê. 25 Ngò gi, Babelon hkóhkam é lòqbú lé wum lhoqkíng byi râ nghut lhê; nghut kôlhang, Hpara-uq é lòqbú gi, nyhuî lhâng byùq râ nghut lhê. Ngò gi, Ngá é shâm lé Babelon hkóhkam é lòq má kat byi mù, yhang gi, Egutuq ming lé htuqhtíng râ matú shâm haú lé wing tô é hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê. 26 Ngò gi, Egutuq byu pé lé, gótû byù myû wui chyáng hkat hâng kat mù, mîngdán pé má lhoqpyo hâng kat râ nghut lhê. Haú hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê.” gâ ri.