Egutuq Ming Lé Htuqhtîng É Myìqhtoi Dang
Hpara-uq Lé Mara Dam Byî É Hkyô
29
Raxê zan zàn, raxê hkyap, raxe í nyí nyí má, haû Yhûmsîng Garaî é mungdang ngá chyáng jé é gi, 2 “Byù zo ê, Egutuq hkóhkâm Hpara-uq shut myòqdong hû mù, yhang eq Egutuq ming gón mâ é byu pé lé htuqhtîng é myìqhtoi htoi aq. 3 Yhang lé dang nyô mù, ‘Haû Ahko Ahkáng lhúnglháng wó Sû Yhûmsîng Garai shî su ga taî ri;Nile Wuìlàng agùng má lèq dûm tô é mànjùng mó nghut é,
Egutuq hkóhkâm Hpara-uq ê, Ngò gi, nang lé htuqhtîng é nghut lhê;
nàng gi, “Nile Wuìlàng gi, ngá é wuìlàng nghut lhê;
ngò yhang, ngá é matú wuìlàng haú lé hpan é nghut lhê.” ga taî ri.
4 Nghut kôlhang, Ngò gi, gòknghê èq náng é âm mai nghê yù mù,
náng é a-kyap pé má náng é wuìlàng mâ é ngozô pé lé dàp to nhâng râ nghut lhê.
Ngò gi, nang lé le, náng é a-kyap má dàp tô é ngozo bànshoq lé le,
náng é wuìlàng hkaû mai lâng htoq yû râ nghut lhê.
5 Ngò gi, nang lé le, náng é wuìlàng mâ é ngozo bànshoq lé le,
pyáng pyut yòso má dú pyâm to râ nghut lhê.
Nàng gi, pá mau má lèq dûm to râ nghut lhê;
ó yùq le nang lé lé gùq tsing râ a nghut.
Ngò gi, nang lé, myìdàm htoq mâ é tân jung yòsô zè pé eq,
maulat nghoqzô pê é matú, zoshuq dông àp byî pyám râ nghut lhê.
6 Haú hkûn, Ngò gi, haû Yhûmsîng Garai nghut é lé, Egutuq ming má nyi é lhúnglhâng bang sé kôrâ nghut lhê.
Hkâsu mù gâ le, nàng gi, Isira-elaq byu pé htuq é nyhôm é dumbáng dùt nyì bê nghut ri. 7 Isira-elaq byu pé gi, nang lé kyaq zui kôjáng, nàng gi, gyuî byùq mù, yhángmòq é gòqsân yhik byùq bê nghut ri; yhángmòq gi, nang lé lèq nghê kôjáng, nàng gi, gyòp byùq mù, yhángmòq é hpyidum lhoqhún bê nghut ri.
8 Haû mù, haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, nang lé htuqhtíng râ shâm jé nhâng râ nghut mù, byù eq gaunyhaû pé lé sat htûm pyám râ nghut lhê. 9 Egutuq ming gi, chamchyuîyuì tô sâ tô é ming dùt byùq râ nghut lhê; haú hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê.
Nàng gi, “Nile Wuìlàng gi, ngá é nghut lhê; ngò yhang haú lé hpan é nghut lhê.” ga taî é yánmai, 10 Ngò gi, nang lé le, náng é wuìlàng pé lé le htuqhtîng é nghut lhê; Ngò gi, Egutuq ming lé, mautsûng hkyam mâ é Migidola wà mai maupyî hkyam mâ é Asiwan wà jé, haú mai Ehti-opi maukyo jé shoq, htên byùq nhâng mù, chamchyuîyuì dùt to nhâng râ nghut lhê. 11 Byù le, gaunyhaú le, haú mai lai râ a nghut; myi xê zàn yhang haú má ó le nyì râ a nghut. 12 Ngò gi, chamchyuîyuì dùt é mîngdán pé má, Egutuq ming lé le chamchyuîyuì dùt to nhâng râ nghut lhê; haú mâ é wà pé gi, byòq htên tô é wà pé má, myi xê zàn yhang chamchyuîyuì dùt to râ nghut lhê. Ngò gi, Egutuq byu pé lé, gótû byù myû wui chyáng hkat hâng kat mù, mîngdán pé má lhoqpyo hâng kat râ nghut lhê.
13 Nghut kôlhang, haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, myi xê zàn haû byíng jáng, Egutuq byu pé lé, yhángmòq lé lhoqpyo hâng kat tô é byù myû wui chyáng mai shuî tsîng yù râ nghut lhê. 14 Ngò gi, yhángmòq lé, shúm zung é jang mai shuî htoq lô mù, Egutuq ming Ahtoq Túm, yhángmòq é îchyí îwâ pê é mau má shuî lò râ nghut lhê. Haú má, yhángmòq gi, wum nyhôm é mîngdán dùt byùq râ nghut lhê. 15 Haû gi, mîngdán pé má wum je nyhôm é mîngdán dùt râ nghut mù, gótû byù myû wui htoq wàq toq é hkâ-nhám le dum hui râ a nghut lo. Ngò gi, mîngdán haú lé, gótû byù myû lé hkâ-nhám le a wó dum ùp loshoq, wum lhoqnyhôm pyám byi râ nghut lhê. 16 Isira-elaq byu pé gi, Egutuq byu pê é htâng cháng jáng, yubàk mara hkyô hui zô é lé myìtbun mù, yhángmòq lé lùmhkaû jang dum kut râ a nghut lo. Haú hkûn, Ngò gi, haû Ahko Ahkáng lhúnglháng wó Sû Yhûmsîng Garai nghut é lé, yhángmòq sé kôrâ nghut lhê.’ nghû taí aq.” gâ ri.
Egutuq Ming Lé Nebuhkatneza Zân Ung Pyám Râ Hkyô
17 Í xe nyhit zan zàn, sânghî lhôhkyap, lhôxân nyí má, haû Yhûmsîng Garaî é mungdang ngá chyáng jé é gi, 18 “Byù zo ê, Babelon hkóhkâm Nebuhkatneza gi, yhâng é gyè hpúng shui mù, Turuq wà lé gyai htuqhtîng shi-kùt é nghut luî, uxâm lháng lhoqhkyut pyám mù, gòqsân hkangmó jèq ló bûm kôlhang, yhang eq yhâng é gyè hpúng gi, Turuq wà lé htuqhtîng shi-kùt é mai hai a-kyû a wó hkam yù kó nghut ri. 19 Haû mù, Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, Egutuq ming lé, Babelon hkóhkâm Nebuhkatneza é lòq má àp byî pyám râ nghut mù, yhang gi, mingbyû wuì lé shúm kut yû mù, yhâng é gyèzô pé lé ahpau byi râ matú, haú mâ é sùtzè lé lú yu ló râ nghut lhê. 20 Yhang eq yhâng é gyèzô pé gi, Ngá é matú haú hkyô kut byi bekô nghut é yánmai, yhang shi-kùt é chyûnghuq dông, Ngò, yhang lé Egutuq ming àp byi bê nghut lhê; haû gi, Ahko ahkáng lhúnglháng wó Sû Yhûmsîng Garai taî pyo ri.
21 Haú buìnyì má, Ngò gi, Isira-elaq byu pê é matú wum-o nghu é hkyuî yùq htoq nhâng râ nghut lhê; hau htoq agó, Ngò gi, yhángmòq chyáng nàng Ezekela é nhuthkum hpóng byi râ nghut lhê. Haú hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê.” gâ ri.