Turuq Wà Hkóhkâm Lé Htuqhtîng É Myìqhtoi Dang
28
Haû Yhûmsîng Garaî é mungdang ngá chyáng jé é gi, 2 “Byù zo ê, Turuq wà hkóhkâm lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri;nàng gi, nghutbûn é myìt mai,
“Ngò gi, garai rayùq nghut lhê;
ngò gi, wuìshuq lung-aû agùng má,
garai rayùq é hkóhkâm tángmyhâng má zung tô lhê.” ga taî ri.
Nghut kôlhang, nàng, garai rayùq su hpàqchyî bò bun kôle,
garai rayùq a nghut, xângzo byù za ru nghut lhê.
3 Nàng gi, Dani-elaq htoq hpàqchyî bo lhê lhú?
Náng chyáng mai wó haq zaú tô é hkyô haî lháng a jòq myhî-nhung lhí!
4 Nàng gi, náng é hpàqchyî byéng-yá eq sê gyô é u-nuq mai,
yhûmsing é matú sùtzè ho yù mù,
hîng ngùn lé náng é sùtzè yhûm pé má hkong to bê nghut ri.
5 Nàng gi, náng é hpàqchyî htuq mó mai wuìloq kut é yánmai,
náng é sùtzè lhoqmyô yù bê nghut mù,
náng é sùtzè hau é yánmai,
náng é myìt nghutbûn byùq bê nghut ri.
6 Haû mù, Ahko Ahkáng lhúnglháng wó Sû Yhûmsîng Garai shî su ga taî ri;
nàng gi, náng gûng lé garai rayùq su hpàqchyî bò bûn é yánmai,
7 Ngò gi, nang lé htuqhtíng râ matú,
maigan a-myû wui chyáng mâ é wuî dik é byu pé shuî jé berâ nghut lhê;
yhángmòq gi, yhûmsing é shâm shê mù,
náng é hpàqchyî byéng-yá èq lhoqyúng tô é pé lé zân hkyop pyám luî,
náng é hkìkhkâm hkyô lé agòt a-û kut pyám byi kôrâ nghut lhê.
8 Yhángmòq gi, nang lé nìk é dong má lhoqhkyô pyám râ nghut mù,
nàng gi, wuìshuq lung-aû agùng má,
gyai ashop é dông sat pyâm é hui zo râ nghut lhê.
9 Haû jáng, nàng gi, nang lé sat pyám râ bâng é myòq hí má,
“Ngò gi, garai rayùq nghut lhê.” nghû wó taí râ lhú?
Nàng gi, nang lé sat pyám bâng é lòq má,
garai rayùq a nghut é za, xângzo byù nghut râ nghut lhê.
10 Nàng gi, maigan byu pê é lòq má,
ahpyo-kuq a hpyit é sû su shi byùq râ nghut lhê.
Haú hkyô lé Ngò taî é nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.’ nghû taí aq.” gâ ri.
11 Haû Yhûmsîng Garaî é mungdang ngá chyáng jé é gi, 12 “Byù zo ê, Turuq wà hkóhkâm eq séng luî ngaùhkyang sâng mù, yhang lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri;
nàng gi, hpàqchyî byéng-yá byíng mù, yúng htáng sû nghut luî,
gúmjùp é alik yù jang dùt bê nghut ri.
13 Nàng gi, Garai Gasâng é hkyâm nghu é,
Edin má nyi nyi é nghut ri;
hpaudap jung lungsêng nghut é,
ne jung lungsêng, huî muí muí é su dùt jung lungsêng, jòqtoq wúm bo é lungsêng,
bó huî hui é jung lungsêng nghut é utohpaya, nyhaú myòqjí su dùt jung lungsêng, huhpé lungsêng,
mauhkûng nyuì lungsêng, mhan-haq nyuî su dùt jung lungsêng,
myek-yoi gâ é wuimau nyuì su dùt jung lungsêng pê èq nang lé mhôn tô é nghut ri.
Náng é chapchéng pé eq sámpyí gi, hing èq saî é nghut ri;
nang lé hpan é buìnyì má, náng é matú haú pé lé hen to byi bê nghut ri.
14 Nàng gi, wú zúng é hkerubim kut râ matú namngón xû but é hui bê nghut ri;
hkâsu mù gâ le, nang lé Ngò ayá byî é nghut lhê.
Nàng gi, Garai Gasâng é chyoiyúng bùm má nghut ri;
nàng gi, dùq bang é lùqgòk gyoro má sô yông é nghut ri.
15 Nàng gi, nang lé hpan é buìnyì mai,
náng chyáng agè ashop hkyô myang é hkûn jé shoq,
náng é nyì yàp sâmlai má mara hûn jang a jòq nghut ri.
16 Nàng gi, wuìloq làm làm wó kut é yánmai,
náng é lú lhum bàt zìk hkyô byíng zan to mù,
nàng yubàk mara kut shut bê nghut ri.
Haû mù, Ngò gi, nang lé, Garai Gasâng é bùm mai hoq hkyi rayhup hkat htoq pyám bê nghut lhê;
wú zúng é hkerubim ê, Ngò gi, nang lé,
dùq bang é lùqgòk gyoro pé mai huî sêng pyám bê nghut lhê.
17 Nàng gi, yúng é yánmai, i-myìt nghutbûn byùq bê nghut ri;
nàng hkìkhkam é yánmai, náng é hpàqchyî byéng-yá htên byòq byùq bê nghut ri.
Haû mù, Ngò gi, nang lé myìdàm htoq jé shoq dú hkyô pyám bê nghut lhê;
Ngò gi, nang lé hkóhkam pé wó myâng shoq,
yhángmòq é hí má nang lé hoq hpu nhâng râ nghut lhê.
18 Nàng gi, a târa é wuìloq kut luî, nàng mara myo myo kut shut é mai,
náng é sân-yúng jowò lé lháng agòt a-û kut pyám bê nghut ri.
Haû mù, Ngò gi, náng chyáng mai myi htoq lô nhâng mù,
nang lé nyé gyó nhâng bê nghut lhê;
Ngò gi, náng lé wú nyî bang bànshoq é hí má,
nang lé myigùng htoq má myiwap dùt nhâng bê nghut lhê.
19 Nang lé sê é byù myû wuì bànshoq bang gi,
náng é yánmai gyùq ngha bum bê nghut ri;
nàng gi, gyùq chiq hpo alhô agàn dùt byùq mù,
htângnùng má hkâ-nhám le dum nyì râ a nghut lo.’ nghû taí aq.” gâ ri.
Sidon Wà Lé Htuqhtîng É Myìqhtoi Dang
20 Haû Yhûmsîng Garaî é mungdang ngá chyáng jé é gi, 21 “Byù zo ê, Sidon wà shut myòqdong hû mù, yhang lé htuqhtîng é myìqhtoi dang lé, 22 ‘Haû Ahko Ahkáng lhúnglháng wó Sû Yhûmsîng Garai shî su ga taî ri;
Sidon ê, Ngò gi, nang lé htuqhtîng é nghut lhê;
Ngò gi, náng chyáng Ngá é hpungwup shingkang lhoqhû é nghut lhê.
Ngò gi, náng chyáng mara dàm byi mù,
Ngò chyoiyúng é hkyô lé náng chyáng lhoqhtoq shit é hkûn,
Ngò gi, haû Yhûmsîng Garai nghut é lé, nàng sé râ nghut lhê.
23 Ngò gi, náng chyáng wúm nhang kat râ nghut mù,
náng é wà hkyô pé má sui yuî nhâng râ nghut lhê.
Náng é lhînghkyùq mai nang lé sham èq htuqhtíng râ nghut mù,
náng chyáng byù sat lheq bûm râ nghut lhê.
Haú hkûn, Ngò gi, haû Yhûmsîng Garai nghut é lé, nàng sé râ nghut lhê.
24 Isira-elaq byu pê é awui ayàm má nyì mù, yhángmòq lé nò shoq rhoî jihkyoî kut é myòqgàm eq zu zû é zugâm kut nyi é, ashop é bang gi, htângnùng má nyì râ a nghut lo. Haú hkûn, Ngò gi, haû Ahko Ahkáng lhúnglháng wó Sû Yhûmsîng Garai nghut é lé, yhángmòq sé kôrâ nghut lhê.
25 Haû Ahko Ahkáng lhúnglháng wó Sû Yhûmsîng Garai shî su ga taî ri; Isira-elaq byu pé lé, yhángmòq byo myín nyi tô é byù myû wui chyáng mai Ngò shuî tsîng yu é hkûn, Ngò gi, yhángmòq dông, Ngò chyoiyúng é hkyô lé, byù myû wui é myòq hí má sàksé shit râ nghut lhê. Haú hkûn, yhángmòq gi, Ngá é duìnhâng zoshâng Yakup lé Ngò byî tô é, yhángmòq é mîngdán má nyì kôrâ nghut lhê. 26 Yhángmòq gi, haú má ngón za myang nyì mù, yhûm pé saí luî, tsibyiq hkyâm pé saí kôrâ nghut lhê. Yhángmòq lé rhoî jihkyoî kut é, yhángmòq é maukyo bang bànshoq lé Ngò nò shoq mara dàm byî é hkûn, yhángmòq gi, ngón za myang nyì kôrâ nghut lhê. Haú hkûn, Ngò gi, yhángmòq é Garai Gasang nghut é, haû Yhûmsîng Garai nghut é lé, yhángmòq sé kôrâ nghut lhê.’ nghû taí aq.” gâ ri.