Turuq Wa É Matú Ngaùhkyang Sang É Hkyô
27
Haû Yhûmsîng Garaî é mungdang ngá chyáng jé é gi, 2 “Byù zo ê, Turuq wà eq séng luî ngaùhkyang sâng àq. 3 Wuìshuq lung-aû yàm mâ é guhkan má xuq é, zinlóng byu pé myo myô èq wuìloq kut é wà, Turuq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri;Turuq ê, “Ngò gi, yúng htáng sû nghut lhê.” ga,
nàng taî ri.
4 Náng é maukyo gi, wuìshuq lung-aû agùng mai nghut ri;
náng é wuìsanghpo saí bang gi, nang lé yúng htáng shoq saî to bekô nghut ri.
5 Yhángmòq gi, náng é siklong pé bànshoq lé,
Senira bùm mâ é htángmó gam èq saî akô;
yhángmòq gi, náng é lhaî pánlong zìng saí râ matú,
Lebanon bùm mai kyám gâm sik yu akô nghut ri.
6 Yhángmòq gi, Bashan mau mâ é wàqmyòq sik èq,
náng é wuìsanghpo shap saí mù,
Kupru zinlóng mâ é jamga sik èq,
xâng zuî tap yúng tô é wuìsanghpo má hkâng é siklong saî akô nghut ri.
7 Egutuq ming mâ é zá htaû tô é nú nhâm é jihkyîng pán gi,
wuìsanghpo má tu shap é pánlong nghut mù,
haû gi, náng é donghkón dông dùt bê nghut ri;
Elisha zinlóng mâ é mauhkûng nyuì nyui é eq mê é pán gi,
náng é wuìsanghpo má maû nghop to bê nghut ri.
8 Sidon eq Ariwadi byu pé gi, náng é wuìsanghpo shap hê bang dùt bekô;
Turuq wà mâ é hpàqchyî bò bang gi, náng é wuìsanghpo hkâng bang dùt bekô nghut ri.
9 Gebali wà mâ é lòqmú sê é sûwún wuî gi,
náng é wuìsanghpo dong lé hpo akô nghut ri;
wuìshuq lung-aû mâ é wuìsanghpo bànshoq eq haú pé lé kôn é bang gi,
náng chyáng wuìloq kut bum akô nghut ri.
10 Perisi mau, Luda mau eq Put mau mâ é byu pé gi,
náng é gyèhpúng má bo lòm kôluî, náng é gyèzô pé dùt bekô nghut ri.
Yhángmòq gi, yhûmsing é gòlong pé eq jòqtoq mùq pé lé náng é xêwâm pé má lhâng to kômù,
náng é hkìkhkâm hkyô lé lhoq hu byi bekô nghut ri.
11 Ariwadi wà eq Helek mau mâ é byu pé gi,
náng é wàhkûm lhînghkyùq má zúng bum akô;
Gamat wà byù wuì gi, náng é mâchya pé má nyi bum akô nghut ri.
Yhángmòq gi, yhûmsing é gòlong pé lé náng é wàhkûm lhînghkyùq má lhâng to kômù,
nang lé dìk shoq lhoqyúng byi bekô nghut ri.
12 Tarishi wà gi, náng chyáng wuìloq zè gyai myô é yánmai, nàng eq wuìloq kut luî, ngùn, jòqtoq, chuî eq shûmhpyû pê èq náng é wuìloq zè pé lé htaî akô nghut ri.
13 Grik byù, Tubala mau eq Meshek mau byu pé gi, nàng eq wuìloq kut kômù, jun pé eq gyi zê pê èq náng é wuìloq zè lé htaî yu akô nghut ri.
14 Bet Togarima mau bang gi, gyèlhêng shê myang pé, gyè zan myang pé eq loze pê èq náng é wuìloq zè lé htaî yu akô nghut ri.
15 Rode zinlóng mâ é byu pé gi, nàng eq wuìloq kut akô; wuimau yàm mâ é byu pé myo myo gi, nàng eq wuìloq kut bang nghut mù, yhángmòq gi, xângzuì pé eq sikxu èq htaî yu akô nghut ri.
16 Aram mau bang gi, nàng saî htoq é zè myô é yánmai, nàng eq wuìloq kut akô; yhángmòq gi, mhan-haq nyuî su dùt jung lungsêng, me mê é pán, zá htaû tô é pán, nú nhâm é jihkyîng pán, myihe lùqgòk eq ne jung lúngseng èq náng é wuìloq zè pé lé htaî yu akô.
17 Yudaq mau eq Isira-elaq mau bang gi, nàng eq wuìloq kut akô; yhángmòq gi, Minit mau mâ é súngsô, mùk, byo-î, tsanlun xû eq chi gâm agyi pê èq náng é wuìloq zè pé lé htaî yu akô.
18 Damasikuq wà gi, nàng saî htoq é zè eq wuìloq zè gyai myô é yánmai, nàng eq wuìloq kut ri; yhángmòq gi, Helibon wà mâ é tsibyiq wing, Zahara jowò mâ é saumaú eq, 19 Izala jowò mâ é î wúng pê èq náng é wuìloq zè pé lé htaî yu akô; nàng gi, dùq wìk é jòqtoq, namngón changhpyik eq hkalamu gàm pé le ûng ri.
20 Dedan wà gi, myang buí mè pé ung mù, nàng eq wuìloq kut ri.
21 Arabi-a byu pé eq Kedara up mâ é zau wuì gi, nàng eq wuìloq kut bang nghut mù, sau zô pé, saulo zô pé eq bainám èq náng chyáng wuìloq kut akô nghut ri.
22 Sheba mau eq Rama jowò mâ é wuìloq kut bang gi, gù je bo é namngón jung pé, hpaudap lungsêng pé eq hîng pê èq náng é wuìloq zè pé lé htaî yu akô nghut ri.
23 Haran wà, Hkane wà, Eden wà, Sheba mau, Ashuri wà eq Hkilimat wà pé mâ é wuìloq kut bang gi, nàng eq wuìloq kut akô nghut ri. 24 Yhángmòq gi, náng é wuìloq kut jowò pé má, yúng é buhîng pé, mauhkûng nyuì nyui é pán pé, zá htaû tô é pán pé, tuî èq tuî dîng to mù, a hten râ xû bùt tô é, isâm dàp é taphkang htû pé lé yu háng mù, nàng eq wuìloq kut akô nghut ri.
25 Tarishi wà mâ é wuìsanghpo gi,
náng é wuìloq zê hto byî ri.
Haû mù, nàng gi, wuìshuq lung-aû hkaû mai laî ló é hkûn,
zè gyai laî byùq é nghut ri.
26 Wuìsanghpo shap lé lhû bang gi,
nang lé wuì káng shut shuî e ló râ nghut mù,
buìhtoq hkyam mâ é laì gi,
nang lé wuìshuq lung-aû agùng má lhoqhkyop pyám râ nghut lhê.
27 Nàng htên gyòp é buìnyì má,
náng é sùtzè, náng é wuìloq zè, nàng ûng é zè,
náng é duìnhâng zoshâng wuì, wuìsanghpo hkâng bang, wuìsanghpo wú gon bang,
náng é wuìloq kut bang, haú má lom é gyèzô pé bànshoq,
haú má lom é shiwa byù bànshoq gi,
wuìshuq lung-aû akáng má myùp wang ló byùq kôrâ nghut lhê.
28 Náng é wuìsanghpo hkâng bang wùt garû ngaù kô é hkûn,
awui ayàm mâ é bang gi, gyùq nán byùq bùm kôrâ nghut lhê.
29 Wuìsanghpo shap lé lhû bang gi,
yhángmòq é wuìsanghpo pé lé tô pyâm to kôrâ nghut mù,
wuìsanghpo hkâng bang eq duìnhâng zoshâng wuì gi,
wuì yàm má gyó yàp kôrâ nghut lhê.
30 Yhángmòq gi, náng é matú,
htê mó lhoqmyhâng mù, sing hpyik û gyàng wùt ngaù kôrâ nghut lhê;
yhángmòq gi, yhûmsing ulhum má hpuílhup kyaq gyun mù,
myiwap má goleng leng kôrâ nghut lhê.
31 Yhángmòq gi, náng é yánmai uwuq pyám luî,
jimê tû wùt kôrâ nghut lhê.
Yhángmòq gi, náng é matú gyai yhang no hpu zô é myìt mai ngaù luî,
ngaùhkyûng ngaùyang dùt bùm kôrâ nghut lhê.
32 Yhángmòq gi, náng é matú ngaùhkyang sâng kô é hkûn,
nàng eq séng luî, “Wuìshuq lung-aû agùng má htûm byùq é Turuq wà su,
hká wâ zîm byùq wú é lhú?” ga ngaùhkyang mó sâng kôrâ nghut lhê.
33 Náng é wuìloq kut zè pé wuìshuq lung-aû mai laî ló é hkûn,
nàng gi, byù myû myo myo lé nhik lhoqdìk byi mù,
náng é sùtzè mó eq wuìloq zè pê èq,
myìdàm htoq mâ é hkóhkam pé lé sùtzè wó nhâng bê nghut ri.
34 Ahkuî, nàng kúm gi, wuìshuq lung-aû mâ é,
nìk jang mâ é wuì pê èq nghop hup pyâm to bê nghut mù,
náng é wuìloq zè pé eq náng htâng châng é byù bànshoq bang,
nàng eq rahá bo gyó wâng bekô nghut ri.
35 Wuimau yàm pé má nyi é bang gi,
náng é yánmai gyùq hong bùm bekô nghut ri;
yhángmòq é hkóhkam pé gi, gyai yhang gyùq byùq kômù,
gyòqshi hpyuí hpyuí myòqdong shum byùq kôrâ nghut lhê.
36 Byù myû wui chyáng mâ é wuìloq kut bang gi, nang lé lùmù gànsâng kôrâ nghut lhê;
nàng gi, gyùq chiq hpo alhô agàn dùt byùq mù,
htângnùng má hkâ-nhám le dum nyì râ a nghut lo.’ nghû taí aq.” gâ ri.