Au Dông Nghut É Yerusalem Wà Mó
24
Gau zan zàn, raxê hkyap, raxê nyí nyí má, haû Yhûmsîng Garaî é mungdang ngá chyáng jé é gi, 2 “Byù zo ê, buìnyì shí nyí é myìng lé kâ to mù, buìnyì shî lé yhang xûm to aq; hkâsu mù gâ le, Babelon hkóhkâm gi, buìnyì shí nyí má yhang, Yerusalem wà mó lé lhom hkyuq to bê nghut ri. 3 Gumlau toq é byù shí bang lé, dangtú dông, ‘Haû Ahko Ahkáng lhúnglháng wó Sû Yhûmsîng Garai shî su ga taî ri;Au xuq to aq; au xuq aq;
au haú má wuì hut kat àq.
4 Au haú má, je yúng é sho nghut é,
tangsân sho eq gòqsân sho jàp kat mù,
réng é showui pé kat pyíng aq.
5 Sau hpúng mâ é je xu yúng é sau hkyin htoq àq;
showui pé kyuí râ matú htang kat àq;
au haú lé rago lhoq tsû aq;
hau é ahkaû má showui pé kyuí aq.
6 Hkâsu mù gâ le, haû Ahko Ahkáng lhúnglháng wó Sû Yhûmsîng Garai shî su ga taî ri;
hkâ-nhám le myiso kyap a shâng byùq é za ru jâng dàp tô é au nghut é,
sui lhoqshun pyâm é wà mó gi, dingnyé wó ri!
Hkâ lé le a hkyin é za,
htoq lo é shohkyí lé rahkyî htâng rahkyí xe htoq yû keq.
7 Hkâsu mù gâ le, yhang sat pyám bâng é sui gi,
yhâng é ahkaû má jòq tô ri;
sui haú lé, hpuílhup èq nghop byùq râ matú myigùng má a hut hkyô é za,
chyut chyut dùt é lùqgòk mó htoq má shèq hut hkyô é nghut ri.
8 Ngò gi, Ngo lé nhikmó lhoq yo mù, lató wó hpuq râ matú,
sui lé a wó nghop pyâm to shoq,
yhâng é sui lé, chyut chyut dùt é lùqgòk mó má tô tô é nghut lhê.
9 Haû mù, Ahko Ahkáng lhúnglháng wó Sû Yhûmsîng Garai shî su ga taî ri;
sui lhoqshun pyâm é wà mó gi, dingnyé wó ri!
Ngò le, gyai myhâng shoq htang bum zang to râ nghut lhê.
10 Haû mù, htang kat jàt keq;
myi lhoqgyúng keq.
Sho pé lé rago chyoq mù,
xo chang shihpyik lé lhu nyhó keq;
showui pé lé nyhê hkâng keq.
11 Hau htâng, haú má dàp é agòt a-u é pé nyé yui byùq mù,
haú má htan dàp tô é myiso kyap pé nyé gyó byùq âbe,
au kôm lé myigye htoq má kê to keq;
haú mâ é gyi nyé ne byùq shoq myigye gyúng nhâng keq.
12 Au haû sân-yúng râ matú shi-kùt wú kôlhang,
haú má dàp tô é myiso lûm htû mù a wó lhoq hkyô pyám;
myî èq lháng a wó lhoq hkyô pyám nghut ri.
13 Nàng a sansêng é múzó gi, nàng mehpye hpyê é múzó nghut ri. Ngò, nang lé lhoq sanséng byî wú kôlhang, náng é a sansêng é hkyô mai nàng wó sanséng râ a nghut é yánmai, Ngò, nang lé nhikmó-yô é hkyô a zîm byùq byùq gi, nàng wó dum sanséng râ a nghut.
14 Ngò Yhûmsîng Garai taî é nghut lhê. Ngá é matú haú lé lhoqdìk râ ahkyíng jé bê nghut ri; Ngò, Ngá é dang lé taû wùp yù râ a nghut; Ngò gi, shogyo myìt bò râ le a nghut é htoq agó, myìt dum lhîng râ le a nghut. Nàng gi, nàng nyì yàp é hkyô eq nàng kut é hkyô pé má cháng luî, târâ jéyáng é hui zo râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.’ nghû taí aq.” gâ ri.
Ezekela É Yhûmsîng Myhí Shi Byùq É Hkyô
15 Haû Yhûmsîng Garaî é mungdang ngá chyáng jé é gi, 16 “Byù zo ê, Ngò gi, náng é myòq má nhik htûng dik é sû lé, náng chyáng mai byò dàn tung yu pyám byi râ nghut lhê. Nghut kôlhang, ngaùhkyang hkâsâng, hkâ-ngaû, ngaùbyi hkâhtoq. 17 Zim za myìt nò-kying kying aq; shi byùq su é matú iyon hkâyon; uhtup htup mù, hkyî-tsung tsung aq; náng é nhutmui lé hkâ-nghop pyám, byu pê èq lé byî é wè zoshuq lé hkâzo.” gâ ri.
18 Haû mù, ngò gi, nàpsûn u mingbyû wuì lé dáng nyo é nghut lhê; myín lé gi, ngá é yhûmsîng myhí shi byùq bê nghut ri. Htang nàpkyó, ngò gi, ngo lé hkunmó hkyô é eq rajung za kut bê nghut lhê.
19 Haú hkûn, mingbyû wuì gi, ngo lé, “Shí hkyô pé gi, ngá-mòq eq haî sêng lhê lhú? Ngá-mòq lé taî kyô wú aq. Nàng, haî mù shî su kut lhê lhú?” ga myî akô.
20 Haû mù, ngò gi, yhángmòq lé, “Ngá chyáng haû Yhûmsîng Garaî é mungdang jé ri; 21 Isira-elaq byu pé lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; wú keq, núngmòq é nghutbun jang gingtíng jowò, núngmòq é myòq má nhik htûng é jang, núngmòq gyai ha bûn é jowò nghu é, Ngá é sân-yúng jowò lé, Ngò agòt a-û kut pyám berâ nghut lhê. Núngmòq nyhi hkyô tô é yùqzo byìzô pé gi, sham èq shi byùq kôrâ nghut lhê. 22 Ngò kut é su, núngmòq le kut kôrâ nghut lhê. Núngmòq gi, nhutmui le nghop kôrâ a nghut, byu pê èq lé byî é wè zoshuq le zo kôrâ a nghut. 23 Núngmòq gi, núngmòq é uhtup htup mù, núngmòq é hkyî-tsung tsung kôrâ nghut lhê. Núngmòq gi, iyon yôn é eq ngaùbyi ngaùnhap dùt kôrâ a nghut; nghut kôlhang, núngmòq é yubàk marâ é yánmai, ròp ròp dùt ló byùq kômù, núngmòq é ahkaû má myìt nò-kying kying kôrâ nghut lhê. 24 Ezekela gi, núngmòq é matú alhô agàn dùt râ nghut mù, núngmòq gi, yhang kut é eq rajung za kut kôrâ nghut lhê. Haú hkyô dùt jáng, Ngò gi, haû Ahko Ahkáng lhúnglháng wó Sû Yhûmsîng Garai nghut é lé, núngmòq sé kôrâ nghut lhê.’ nghû taí aq.
25 Nàng le, byu zo ê, Ngò, yhángmòq é gingtíng jowò, yhángmòq é gabú hkyô eq hpungwup shingkang, yhángmòq é myòq má nhik htûng é jang, yhángmòq myìt ô nau é jowò eq yhángmòq é yùqzo byìzô pé lé wùp yu pyám byî é buìnyì má, 26 wó nyi lùt gyó tô é sû gi, haú hkyô eq sêng é lùdang lé náng chyáng lé taî kyo râ, a nghut lhí? 27 Haú nyí, nàng gi, zim za a nyi to lô é za, wó nyi lùt gyó to sû lé, nhuthkum hpóng mù dang nyô râ nghut lhê. Haû mù, nàng gi, yhángmòq é matú alhô agàn dùt râ nghut mù, Ngò gi, haû Yhûmsîng Garai nghut é lé, yhángmòq sé kôrâ nghut lhê.” ga taî é nghut lhê.