Shiwa Myhí Kut É Yhang gu Yhâng nhâ Nhik É Dangtú
23
Haû Yhûmsîng Garaî é mungdang ngá chyáng jé é gi, 2 “Byù zo ê, înu rayùq mâ é myiwe í yùq nyi ri. 3 Yháng nhiktâng gi, zo-myi zô pyàt mai Egutuq ming má shiwa myhí dùt bekô nghut ri. Haú mau má, yhángnhik é naú lé sop byi mù, naúshi lé le sop rhín byi bekô nghut ri. 4 Î-nhá yùq é myìng gi, Ohola, yhang gu yùq é myìng gi, Oholiba gâ ri; yháng nhiktâng gi, Ngá é myiwe dùt kômù, yùqzo byìzô pé hku akô nghut ri. Ohola gi, Samariq wà nghut mù, Oholiba gi, Yerusalem wá mó nghut ri.5 Ohola gi, Ngá é myiwe ru nghut nyi ashî le shiwa myhí kut bê nghut ri; yhang gi, yhâng é chyit bang nghut é, Asuri byù sârhe pé lé yùt yùt myìt tui ô naù nyi ri. 6 Haú bang gi, mauhkûng nyuì nyui é mèbu wùt é, ming zau wuì, gyèzaû pé nghut mù, bànshoq bang gi, myang ji jî é, yúng lhê shingkâng lhê dùt é zorâm wuì chyat nghut bum akô nghut ri. 7 Yhang gi, Asuri byu pé mâ é xânghpoq nge wó bang bànshoq eq shiwa myhí mú kut shut mù, yhang yùt yùt myìt tui ô naù sû yùq hkangmó é hparà hpôlhô èq yhûmsing gùng lé agòt a-û kut yû bê nghut ri. 8 Yhang gi, Egutuq ming má nyi hkûn yhang kut hi é shiwa myhí múzó lé a tô pyám nghut ri; yhâng é zo-myi zô pyàt mai, yùqgè wuì gi, yhang eq yhup luî, yhâng é naú zo lé sop byi rhín byi kut mù, yhang eq mara kut shut bum akô nghut ri.
9 Haû mù, Ngò gi, yhang lé, yhang yùt yùt myìt tui ô nau nyi é, yhâng é chyit bang Asuri byu pé lé àp byî pyám bê nghut lhê. 10 Yhángmòq gi, yhang lé mèbu hkyut shang pyám byi mù, yhâng é yùqzo byìzô pé lé shuî yu pyám byi luî, yhang lé sham èq sat bekô nghut ri; yhang gi, mara dam byî é gyai yhang hui zo bê nghut mù, myiwe wui chyáng gya dang taî kún hpo dùt byùq bê nghut ri.
11 Yhang gu Oholiba gi, haú hkyô lé myàng kôlhang, yhâng nhâ htoq je riyhang yùt yùt ô nau é myìt bò mù, je riyhang mara kut shut bê nghut ri. 12 Yhang le, Asuri byù nghut é ming zau wuì, gyèzaû pé, gyèhking hkyak wùt é sârhe pé, myang ji jî é bang eq yúng lhê shingkâng lhê dùt é zorâm wuì haû bànshoq lé yùt yùt myìt tui ô nau nyi ri. 13 Yhang le, yhûmsing gùng yhûmsîng agòt a-û kut yu é lé Ngò myang ri; yháng nhiktâng í yùq é rahkyô za châng akô nghut ri.
14 Nghut kôlhang, Oholiba gi, hau htoq je riyhang shiwa myhí múzó kut shut ri; yhang gi, yhûm xêwâm má, kâ jung chî ne èq kâ tap tô é Babelon yùqgè alhô pé lé myang ri; 15 haú bang gi, hpyihit hit mù, yhángmòq é ulhum má uhtup htupsháng mau shut dâng tô ri; haú bang bànshoq gi, choq hpyit Babeloni-a mau mâ é, gyèlhêng kon zau Babelon byu pé su dùt bum akô nghut ri. 16 Yhang gi, alhô haú pé lé myàng eq yhang, hau bang lé yùt yùt myìt tui ô nau byùq mù, Babelon mau shut haú bâng chyáng lagyô pé nhang kat bê nghut ri. 17 Haû mù, Babelon byu pé gi, yhâng chyáng lé jé mù, chyit myìt byíng é hpyang má, yhángmòq yùt yùt ô nau é èq yhang lé agòt a-û kut pyám bekô nghut ri. Yhang gi, haú bang eq agòt a-û kut é htâng má, haú bang lé chaq pyâm é myìt bo byùq bê nghut ri. 18 Yhang gi, de de yhang, shiwa myhí múzó lé kut é u, yhâng é gùngchîn lé ahoq ahî lhoqhtoq shit é hkûn, Ngò gi, yhâng nhâ chyáng mai lhing pyâm é su, yhang lé chaq é myìt èq, yhâng chyáng mai lhing pyám bê nghut lhê. 19 Nghut kôlhang, yhang gi, zo-myi zô pyàt lé Egutuq ming má shiwa myhí kut é buìnyì pé lé myìtbun mù, je riyhang mara kut shut bê nghut ri. 20 Yhang gi, loze pê é zè í ko mù, myang pê é nyàmwing myhó myô é, yhâng é chyit bang lé, haú jowò má yùt yùt ô naù bê nghut ri. 21 Haû mù, nàng gi, Egutuq ming má nyi é hkûn, nang lé rago sop byi mù, náng é naú lé sop rhín byî é, náng é zo-myi zô pyàt má mehpye hpyê é múzó lé dum myìt tuî nyì bê nghut ri.
22 Haû mù, Oholiba ê, haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, nang lé htuqhtíng kôrâ matú, nàng chaq é myìt mai tô pyâm tô é, náng é chyit bang lé myìt nhaû toq byi râ nghut mù, yhángmòq lé, náng é lhînghkyùq mai nang lé htuqhtíng nhâng râ nghut lhê. 23 Haú bang gi, Babelon byu pé, Hkelade byù le gâ é Babelon byù bànshoq, Pekot up, Sho-a up eq Ko-a up pê é byu pé, Asuri byù bànshoq nghut é, yúng luî shingkâng é, zorâm wuì, ming zau wuì eq gyèzaû pé bànshoq, gyèlhêng kon zau wuì eq myìng htoq é zau wuî nghut ri; haú bang bànshoq myang ji jî akô nghut ri. 24 Yhángmòq gi, shâm lhâm pé, gyèlhêng pé, zè htô é lhêng pé eq byù ajùm ayò lé lô mù, tiq é kô é gòlong eq jòqtoq mùq pé kut luî, náng é lhînghkyùq mai nang lé lhom to kôrâ nghut lhê. Ngò gi, mara dam byi râ matú yhángmòq é lòq má nang lé àp byî pyám râ nghut mù, yhángmòq gi, yhûmsing é htûng târâ má cháng luî, nang lé mara dam byi kôrâ nghut lhê. 25 Ngò gi, ladu lai shoq nhik yô é mai nang lé dàm byi râ nghut mù, yhángmòq gi, nhikmó-yô é èq nang lé hpu zo nhâng râ nghut lhê. Yhángmòq gi, náng é nhô eq náng é nohkyap pé lé hpyit pyám byi râ nghut mù, nyi myìt gyó tô é bang gi, sham èq sat pyâm é hui zo kôrâ nghut lhê. Yhángmòq gi, náng é yùqzo byìzô pé lé shuî ló byùq râ nghut mù, nyi myìt gyó tô é bang gi, myî èq nyé jôm pyâm é hui zo kôrâ nghut lhê. 26 Yhángmòq gi, náng é mèbu lé le hkyut shang pyám byi râ nghut mù, náng é je hpaudap é gùng mhón zê pé lé le yu pyám byi kôrâ nghut lhê. 27 Haû mù, Ngò gi, mehpye hpyê é hkyô lé le, Egutuq ming má nàng kut hi é shiwa myhí múzó hkyô lé le, lhoqnô pyám byi râ nghut mù, nàng gi, nàng yùt yùt ô nau é hkyô shí pé lé a wú lo mù, Egutuq ming lé a myìtbun lo râ nghut lhê.
28 Hkâsu mù gâ le, haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, nang lé, nàng chaq é myìt mai tô pyâm tô é, nàng a ngui byùq é bâng é lòq má àp pyám râ za nghut bê. 29 Yhángmòq gi, nang lé a ngui é myìt mai htim kômù, nàng zui saî shi-kùt tô é zè bànshoq lé yu pyám byi luî, nang lé gùngchîn tô pyâm to kôrâ nghut mù, nàng shiwa myhí kut é hoq hpu hkyô gi, de de dùt to râ nghut lhê. Nàng mehpye hpyê é múzó eq mara kut shut é hkyô le de de dùt to râ nghut lhê. 30 Nàng gi, gótû byù myû wuì lé yùt yùt ô nau é eq yhángmòq é hparà hpôlhô pê èq yhûmsing gùng lé agòt a-û kut yû bê nghut é yánmai, haú hkyô pé náng chyáng jé bê nghut ri. 31 Nàng gi, nángnhâ é hkyô lé cháng bê nghut é yánmai, Ngò gi, yhâng é mara dam byî é gòm lé náng é lòq má kat byi râ nghut lhê.
32 Haû Ahko Ahkáng lhúnglháng wó Sû Yhûmsîng Garai shî su ga taî ri;
nàng gi, nángnhâ é mara dam byi gòm lé shuq râ nghut lhê;
gòm haû gi, kô lhê nìk lhê dùt é gòm nghut ri;
gòm haú má gyai myo shoq bo tô é nghut mù,
nàng gi, wú tiq rhoî dang taî pyám é eq wuìzuì kut pyám byî é hui râ nghut lhê.
33 Nàng gi, nángnhá Samariq wà shuq é gòm nghut é,
shuq wùt tô é eq yón é hkyô,
htên byùq é eq chamchyuîyuì dùt é gòm lé shuq wùt to râ nghut lhê.
34 Nàng gi, haú lé shuq mù, kan shoq chyup yù luî,
gòm lé lháng ajàp azo dùt shoq ngàt hkyop pyám râ nghut lhê;
nàng gi, náng é naú lé lháng lâng cheq pyám râ nghut lhê.
Haú hkyô lé Ngò taí é nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.
35 Haû mù, haû Ahko Ahkáng lhúnglháng wó Sû Yhûmsîng Garai shî su ga taî ri; nàng gi, ngo lé tô-myhî pyám mù, Ngá chyáng mai náng gûng lhik ló byùq bê nghut é yánmai, nàng mehpye hpyê é hkyô eq shiwa myhí múzó kut é hkyo é mara dàm hkâm zo ra râ nghut lhê.” gâ ri.
36 Haû Yhûmsîng Garai gi, ngo lé, “Byù zo ê, nàng gi, Ohola eq Oholiba nhiktâng lé târâ jéyáng râ lhú? Haû jáng, yháng nhiktâng lé, yhángnhik kut é achaq achyut hkyô pé lé lhoqhtoq shit àq; 37 hkâsu mù gâ le, yháng nhiktâng gi, sulàng lú hkyô kut shut mù, yháng nhiktang é lòq má sui dap bekô nghut ri. Yháng nhiktâng gi, yhûmsing é hparà hpôlhô pê é yánmai, sulàng shut bekô nghut ri; Ngá é matú yháng nhiktâng hku é zodù wuì lé lháng, hparà hpôlhô pê é matú zoshuq dông, myi nyhé hkungga nhông byi bekô nghut ri. 38 Hau htoq agó, yháng nhiktâng gi, Ngo lé shî su kut ashi kô nghut ri; haú nyí má yhang, Ngá é sân-yúng jowò lé agòt a-û kut pyám kômù, Ngá é Bánno Buìnyì pé lé a lhoq chyoiyúng kut pyâm akô nghut ri. 39 Yháng nhiktang é hparà hpôlhô pê é matú, yhûmsîng zodù wuì lé myi nyhé hkungga kut é buìnyì má yhang, yháng nhiktâng gi, Ngá é sân-yúng jowò má wàng mù, haú lé agòt a-û kut pyâm akô nghut ri. Haû gi, Ngá é yhûm má, yháng nhiktâng kut é hkyô nghut ri.
40 Hau htoq agó, yháng nhiktâng gi, lagyô pé lé nhâng luî, mau we mâ é yùqgè wuì lé wùt yu ri; haú bang lé jé kôjáng, yháng nhiktâng gi, haú bâng é matú gùng chi mù, myòq má chi but luî, gùng mhón zê yu wùt akô nghut ri. 41 Yháng nhiktâng gi, yúng hkìk é yhupgyàp htoq má zùng mù, hí má zègyap tô to luî, hau é ahtoq má Ngá é namngón jung eq tsanlun xû kê tô akô.
42 Hau é lhînghkyùq má ye ngón kûn é byù hpúng pê é htê baú htoq nyi ri; kâm é su kut é byu pé eq rahá yòso mâ é î shuq wùt bang le haú má bo lom bum akô; haú bang gi, yháng nhiktang é lòq má hting hut byi kômù, ulhum má yúng é jánmaú tsung byî akô nghut ri. 43 Haú hkûn, Ngò gi, myiwe wum a bò loshoq sulàng lú é myiwe myhí haû eq séng luî, ‘Myiwe myhí haû gi, hau é matú za nghut lhê mù, yhángmòq gi, yhang lé shiwa myhí dông chûng kó sháng gàq.’ nghû taî é nghut lhê. 44 Yhángmòq gi, shiwa myhî chyáng wang é su, mehpye myhî nhik Ohola eq Oholiba chyáng wang akô nghut ri. 45 Nghut kôlhang, yháng nhiktâng gi, sulàng lú é eq sui lhoqshûn su nhiktâng nghut é yánmai, díngmán é bang gi, sulàng lú é eq byù sat é myiwe myhí lé mara dam byî é su, yháng nhiktâng lé mara dam byi kôrâ nghut lhê.
46 Haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, yháng nhiktang chyáng byù mòqmó shuî lé mù, yháng nhiktâng lé gyùq chiq mó huí nhang é eq hpyoq zo hpyoq shuq é hui nhâng râ nghut lhê. 47 Byù mòqmó haû gi, yháng nhiktâng lé lùqgòk èq chôm dú mù, yhángmòq é sham èq sat pyám luî, yháng nhiktang é yùqzo byìzô pé lé le sat pyám mù, yhángmòq é yhûm pé lé nyhê hkyô pyám byi kôrâ nghut lhê.
48 Haû mù, Ngò gi, myiwe wuì góbang bànshoq sidìq byî é hui mù, yháng nhiktâng su a châng kut râ matú, mehpye hpyê é hkyô lé haú mau má lhoq htûm pyám râ nghut lhê. 49 Núng nhiktâng gi, núng nhiktâng kut é mehpye hpyê é múzó é matú mara dam mó hpuzo kôrâ nghut mù, núng nhiktâng hparà noq é yubàk hui zo kôrâ nghut lhê. Haú hkûn, Ngò gi, haû Ahko Ahkáng lhúnglháng wo Sû Yhûmsîng Garai nghut é lé, núng nhiktâng sé kôrâ nghut lhê.” gâ ri.