Ammon Byu Pé Lé Htuqhtîng É Myìqhtoi Dang
25
Haû Yhûmsîng Garaî é mungdang ngá chyáng jé é gi, 2 “Byù zo ê, Ammon byu pê shut myòqdong hû mù, yhángmòq lé htuqhtîng é myìqhtoi dang taí aq. 3 Yhángmòq lé, ‘Haû Ahko Ahkáng lhúnglháng wó Sû Yhûmsîng Garaî é dang lé gyo keq. Haû Ahko Ahkáng lhúnglháng wó Sû Yhûmsîng Garai shî su ga taî ri; núngmòq gi, agòt a-û kut to huî é, Ngá é sân-yúng jowò lé le, chamchyuîyuì dùt to huî é, Isira-elaq mîngdán lé le, shúm zung to huî é, Yudaq byu pé lé le, “Ha hâ, nghut bê!” ga taî bekô nghut é yánmai, 4 Ngò gi, núngmòq lé, Buìhtoq hkyam mâ é byu pê èq sing yù râ matú, yhángmòq é lòq má àp byî pyám râ nghut lhê. Yhángmòq gi, núngmòq chyáng wàp pé xuq mù, zúm pé saî lúng kôrâ nghut lhê; yhángmòq gi, núngmòq é shi pé lé zo mù, núngmòq é no-naú lé shuq kôrâ nghut lhê. 5 Ngò gi, Raba wà lé, gola-uk pê é matú mhan nú yô dùt nhâng mù, Ammon byu pê é mau lé, sau pé up é jowò dùt nhâng râ nghut lhê. Haú hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê. 6 Hkâsu mù gâ le, haû Ahko Ahkáng lhúnglháng wó Sû Yhûmsîng Garai shî su ga taî ri; núngmòq gi, Isira-elaq mîngdán lé agè alhô é myìt mai lòqpyuq bàt mù, hkyî nâng htíng luî, gabú bekô nghut é yánmai, 7 Ngò gi, Ngá é lòq lham mù, núngmòq lé htuqhtíng luî, wó lú yu é zè lé su, gótû byù myû wuì é lòq má núngmòq lé àp byî pyám râ nghut lhê. Ngò gi, núngmòq lé, gótû byù myû wui chyáng mai lhoqhtûm pyám luî, mîngdán pé mai sat kyop pyám râ nghut lhê. Ngò gi, núngmòq lé lhoqhtên pyám râ nghut lhê; haú hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê.’ nghû taí aq.” gâ ri.Moba Mau Lé Htuqhtîng É Myìqhtoi Dang
8 Hau htoq agó, “Haû Ahko Ahkáng lhúnglháng wó Sû Yhûmsîng Garai shî su ga taî ri; ‘Moba mau eq Se-ira bùm gi, “Wú keq; Yudaq byù myû gi, gótû byù myû wuì bànshoq eq rajung za dùt bê nghut ri.” ga taí bekô nghut é yánmai, 9 Ngò gi, Moba maû é hpungwup shingkang nghut é, Moba maukyo wà mó Bet Yeshimot, Balaq Me-on eq Kiri-ahtim pé mai hput htông hî luî, 10 Moba mau lé, Ammon byu pé eq rahá, wó lú yu é zè dông, Buìhtoq hkyam mâ é byu pê é lòq má àp byî pyám râ nghut lhê; haú hkûn, Ammon byu pé lé gi, gótû a-myû wui chyáng myìtbun lo kôrâ a nghut. 11 Ngò gi, Moba mau lé le mara dàm hpu zo nhâng râ nghut lhê. Haú hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê.’ gâ ri.” le gâ ri.
Edom Mau Lé Htuqhtîng É Myìqhtoi Dang
12 Hau htoq agó, “Haû Ahko Ahkáng lhúnglháng wó Sû Yhûmsîng Garai shî su ga taî ri; ‘Edom mau gi, Yudaq byu pé lé lató hpuq é eq haû su a naù a wom kut é dông mara gyai ko bekô nghut é yánmai, 13 Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, Ngá é lòq lham mù, Edom mau lé htuqhtíng luî, byù eq shigu gaunyhaú lé sat pyám râ nghut lhê. Ngò gi, haú mau lé chamchyuîyuì kut pyám râ nghut mù, Teman wà mai Dedan wà jé shoq sham èq sat kyop pyâm é hui zo kôrâ nghut lhê. 14 Ngò gi, Ngá é Isira-elaq byu pê é lòq èq Edom byu pé lé lató hpuq râ nghut mù, yhángmòq gi, Ngò nhikjum yô é eq nhikmó-yô é má cháng luî, Edom byu pé lé hpu zo nhâng râ nghut lhê; haú hkûn, Edom byu pé gi, Ngò lató hpuq é hkyô lé sé kôrâ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.’ gâ ri.” le gâ ri.
Hpilisiti Byu Pé Lé Htuqhtîng É Myìqhtoi Dang
15 Hau htoq agó, “Haû Ahko Ahkáng lhúnglháng wó Sû Yhûmsîng Garai shî su ga taî ri; ‘Hpilisiti byu pé gi, lató hpuq é má agè alhô é myìt byíng tô é mai lató hpuq kômù, a naù a wôm é myìt rû bo nyi é mai Yudaq byu pé lé lhoqhtên pyám bekô nghut é yánmai, 16 Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, Ngá é lòq lham mù, Hpilisiti byu pé lé htuqhtíng râ nghut lhê; Ngò gi, Hkerehti byu pé lé lhoqhtûm pyám mù, wuimau yàm má nyi myìt gyó tô é bang lé lhoqhtên pyám râ nghut lhê. 17 Ngò gi, yhángmòq lé htan dik é dông lató hpuq mù, Ngá é nhikmó-yo hkyô mai mara dam byi râ nghut lhê. Ngò, yhángmòq lé lató hpuq é hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê.’ gâ ri.” le gâ ri.