Zùn Í Du Eq Tsibyiq Nui É Hkyô
17
Haû Yhûmsîng Garaî é mungdang ngá chyáng jé é gi, 2 “Byù zo ê, Isira-elaq byu pé lé danglhîng htoq byi mù, dangtú dông taí aq; 3 yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; isâm ajung jung dàp mù, nghoqmaú gahíng híng myo myo yùq luî, dùng mó dàp é zùn mó radu gi, Lebanon bùm má jé mù, kyám gâm siknyùq lé htê zing to luî, 4 je ló myhang é a-nyùq lé htê hpyit yû mù, wuìloq kut é mau má wàq ló luî, wuìloq kut é wà má ló tô tô ri.5 Zùn haû gi, haú mau mâ é kyôzo rajà yù mù, myìhpún bo é maumyî má hô tô ri; yhang gi, wuì yàm má yùq é sikgâm lé su, wuì gyai bâm é maumyî má kyôzo haú lé hô tô ri. 6 Kyôzo haû gi, a-nyùq nyún lô mù, a-nyhûm za mai yùq hkyâm lam ló é tsibyiq nuî dùt luî, hau é akoq pé gi, zùn nyi tô é shut nui toq ló ri; a-myìt kúm gi, a-ô shut chîn tô ri. Haû mù, haû gi, akoq pé hkyâm làm luî, a-nyùq byong byong dùt é tsibyiq gâm dùt bê nghut ri.
7 Nghut kôlhang, dùng mó dàp é eq nghoqmaú gahíng híng myo myo yùq é zùn mó gódu nyi ri. Wú aq, tsibyiq nuî haû gi, ûchyam myàng shuq râ matú, yùq tô é jowò mai, zùn haú du shut a-myìt chîn ló mù, akoq pé hkyâm lam dòq ló ri. 8 Tsibyiq nuî haû gi, akoq hkyâm làm mù, ashi zui luî, wúm yúng é tsibyiq nuî wó dùt sháng gàq ga, wuì myo mù, myìhpún bo é maumyî má hô tô é nghut ri.’ nghû taí aq.
9 Hau htoq agó, yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; tsibyiq nuî haû wó yùq kô yúng râ lhú? A-nuì haû nyhuî kyuq byùq râ matú, a-myìt lé nùt htoq pyám mù, ashi lé hpyoq yu pyám râ a nghut lhí? Haú mai nyún lo é bànshoq nyhuî kyuq byùq râ nghut lhê. Haú lé a-myìt eq roq nùt htoq pyám râ matú, wúm bo é lòqbú eq byù myo myo a ra nghut ri. 10 A-nuì haû gi, hô to bê nghut kôlhang, wó yùq kô yúng râ lhú? Buìhtoq hkyam mâ é laì mùt lò jáng, haû bànshoq nyhuî kyuq byùq râ, a nghut lhí? Haû gi, yùq kô lo é maumyî má nyhuî kyuq byùq râ nghut lhê.’ nghû taí aq.” gâ ri.
11 Hau htâng, haû Yhûmsîng Garaî é mungdang ngá chyáng jé é gi, 12 “Gumlau toq é byù shí bang lé, ‘Shí hkyô pé hai lichyúm nghut é lé núngmòq a sé kó lhú?’ nghû taí aq. Hau htoq agó, yhángmòq lé, ‘Babelon hkóhkâm gi, Yerusalem wà mó má lé mù, haú mâ é hkóhkâm hpó eq zaugun wuì lé chyup yû luî, Babelon wà mó shut shuî ló bê nghut ri. 13 Hau htoq agó, yhang gi, hkóhkâm a-myû mâ é rayùq lé hkyin yù mù, yhang eq dangshikaq to luî, haú yùq lé dakâm nhang ri. Yhang gi, haú mîngdán mâ é byù mó pé lé le chyup shuî yu ló bê nghut ri. 14 Haû su kut é gi, mîngdán haû, dangshikaq hau é ahkaû má za nyì râ dùt byùq mù, wum nyhôm ló byùq luî, a wó dum kô myhang lò râ matú nghut ri. 15 Nghut kôlhang, Yudaq hkóhkâm hpó gi, myang pé eq gyèzô pé myo myo ê dûng yù râ matú, Egutuq ming shut lagyo nhang kat é dông, Babelon hkóhkâm lé gumlau toq bê nghut ri. Yhang gi, wó ûngmyuq râ nghut lhê lhí? Haû sû é hkyô kut é sû gi, wó hpang lùt wú é lhú? Yhang gi, dangshikaq lé lhoqhpyoq luî, wó hpang lùt râ lhú?
16 Yhang gi, yhang lé hkóhkâm ayá má tsung to su é dangshikaq lhoqhpyoq pyám mù, dâkam tô é dang lé wú tiq pyám bê nghut ri; Ngò rû dui nyi é eq rajung za, yhang gi, hkóhkâm hpó hau é mau, Babelon wà mó má shi byùq râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 17 Babelon byu pé gi, byù myo myo lé sat pyám râ matú, wàhkûm lhînghkyùq má zùmhtâng saî tap tô é hkûn, Hpara-uq eq yhâng é gyè hpúng mó, gyèzo pé ajùm ayò gi, majan má yhang lé a wó garúm yû râ nghut lhê. 18 Yhang gi, dangshikaq lé lhoqhpyoq pyâm é dông, dâkam tô é dang lé wú tiq pyám bê nghut ri. Yhang gi, lòq ke mù dâkam to bê nghut kôlhang, haú hkyô pé bànshoq kut bê nghut mù, wó hpang lùt râ a nghut lo.
19 Haû mù, haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, rû dui nyi é eq rajung za, yhang, Ngá é dakâm dang lé wú tiq pyám mù, Ngá é dangshikaq lé lhoqhpyoq pyâm é yubàk lé, yhâng chyáng jé nhâng râ nghut lhê. 20 Ngò gi, Ngá é gun èq yhang lé dú nghop yû râ nghut mù, Ngá é dumzo má yhang lé myhî yù râ nghut lhê. Ngò gi, yhang lé Babelon wà mó má shuî ló mù, yhang, Ngo lé a jujúm kut é yánmai, yhang lé haú má târâ jéyáng pyám râ nghut lhê. 21 Yhang eq rahá hpang é sarhê gyèzo bànshoq gi, sham èq sat pyâm é hui râ nghut lhê; wó nyi myìt gyó tô é bang gi, maumyî myi chyûn shut lhoqpyo hâng kat é hui kôrâ nghut lhê. Haú hkûn, haú hkyô lé Ngò Yhûmsîng Garai taî é nghut é lé, núngmòq sé kôrâ nghut lhê.
22 Haû Ahko Ahkáng lhúnglháng wó Sû Yhûmsîng Garai shî su ga taî ri; Ngò yhang, kyám gâm mâ é jé myhang tô é a-nyùq lé hkyuî yù mù, hô to râ nghut lhê; hau htoq agó, Ngò gi, je myhang tô é a-nyùq pé mâ é nú é a-nyùq lé hkyuî yù mù, gyaí myhang é bùm htoq má hô to râ nghut lhê. 23 Isira-elaq mâ é je myhang é bùm htoq má Ngò hô to râ nghut mù, akoq pé yùq hkyâm lam lò luî, ashi zui mù, gyai yùq yúng é kyám gâm dùt byùq râ nghut lhê. Nghoq a-myû hkangmó gi, hau é a-ô má sut lé saí kômù, hau é akoq pê é buìshûm hkaû má myang nyì kôrâ nghut lhê. 24 Haú hkûn, Ngò, Yhûmsîng Garai gi, myhang é sikgâm lé lhoqnyhum pyám mù, nyhum é sikgâm lé lhoqmyhang é lé le, nyui é sikgâm lé lhoqkyuq pyám mù, kyuq é sikgâm lé lhoqnyui é lé le, sik mó lung-aû yò mâ é sikgâm pé bànshoq sé kôrâ nghut lhê.
Ngò, Yhûmsîng Garai gi, taí bê é eq rajung za, kut râ nghut lhê.’ nghû taí aq.” gâ ri.