Sidìq A Zung É Myiwe Myhí Su Dùt É Yerusalem Wà Mó
16
Haû Yhûmsîng Garaî é mungdang ngá chyáng jé é gi, 2 “Byù zo ê, Yerusalem wà mó lé, yhang kut é achaq achyut hkyô taî htoq kyo mù, 3 ‘Haû Ahko Ahkáng lhúnglháng wó Sû Yhûmsîng Garai gi, Yerusalem wà mó lé shî su ga taî ri; náng é gùnchyung eq choq hpyit jowò gi, Hkanan byu pê é mau má nghut ri; náng wa gi, Amori byù nghut mù, náng nu gi, Hiti byù nghut ri. 4 Nàng hku lé lo é buìnyì má, nang lé choq hpyit é byù le a nyì, nang lé wui èq chî yúng râ byù le a nyì, nang lé xô èq bùt chî é eq pánchoq èq htup é byù le a nyì nghut ri. 5 Nang lé wú shogyô é byù a nyì, náng é matú haú hkyô pé kut byi râ byù a nyì; nàng hku lé lo é buìnyì má, nang lé wú chaq pyám kô é yánmai, nàng gi, yòso pá má dú lheq pyâm é hui zô é nghut ri.6 Haú hkûn, Ngò gi, haú mai sô laî ló le, náng é sui má nàng galhu lhû nyi é lé myàng mù, nàng sui hkaû má nghut nyi é u, “Chyungxe duì àq!” nghû nang lé taî é nghut lhê. 7 Ngò gi, nang lé yò mâ é hôwa zo lé su kô yúng nhang é nghut lhê; nàng gi, kô lò wáng lô mù, gùngdu shibó bó yúng nám jé luî, naú zo dàp mù, sho-maú yùq bê nghut kôlhang, gùngchîn ru dùt tô ashî nghut ri.
8 Htâng má, Ngò haú mai sô laî ló mù, nang lé wú kat é hkûn, nàng gi, byi râm zo nghut bê lé myàng luî, Ngò gi, Ngá é buhîng htâng lâng hkang mù, náng é gùngchîn lé htup nghop byî é nghut lhê. Haû mù, Ngò gi, nang lé dakâm luî, nàng eq dangshikaq to bê nghut mù, nàng gi, Ngá é myiwe dùt bê nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.
9 Haú hkûn, Ngò gi, nang lé wui èq gùng chi byi mù, náng chyáng mâ é sui lé chî sân pyám byi luî, nang lé namngón xû bùt byî é nghut lhê. 10 Ngò gi, nang lé, zá htaû tô é mèbu hut mù, réng é sho-kuq hkyî-tsung tsung byi luî, nú nhâm é jihkyîng pán yùp byi mù, hpaudap é mèbu pé hut byî é nghut lhê. 11 Ngò gi, nang lé mhôn jung pé tap byi mù, náng é lòq má hting hut luî, náng é lìngzing má wuizo pé hut byî é nghut lhê; 12 Hau htoq agó, Ngò gi, náng é nhô má nhôgóng tap byi mù, náng é nohkyap má nogóng lhang byi luî, náng é ulhum má mùqsháng tsung byî é nghut lhê. 13 Haû mù, nàng gi, ngùn hing èq mhôn to bê nghut ri; náng é mèbu pé gi, nú nhâm é jihkyîng pán, bau hkyîng pán eq zá htaû tô é pán pé nghut ri. Náng é zoshuq gi, byo-î, tsanlun xû eq je nú é mún pé nghut ri. Nàng gi, gùngdu hkyangmân yúng dik bê nghut mù, hkóhkâm myhí rayùq wó dùt bê nghut ri. 14 Nang lé Ngò byî é hkìkhkâm hkyô gi, nàng gúmjùp shoq yúng nhâng bê nghut mù, nàng yúng é hkyô gi, gótû byù myû wui chyáng hû ló byùq bê nghut ri; haû gi, Ahko Ahkáng lhúnglháng wó Sû Yhûmsîng Garai taî pyo ri.
15 Nghut kôlhang, nàng gi, nàng yúng é hkyô lé lùmhkaû mù, nàng myìng hû é hkyô mai shiwa myhí dùt bê nghut ri; nàng gi, sô laî ló é bànshoq bang eq mara kut shut mù, náng é yúng hkyô gi, yùqgè hkangmó eq sêng byùq bê nghut ri. 16 Nàng gi, náng é mèbu ra-am hkyut yû mù, myhang é hparà noq jowò pé lé isâm ajung jûng èq mhôn to luî, haú pé má shiwa myhí múzó kut ri. Haú hkyô gi, hkâ-nhám le a jòq wú, htâng má le jòq râ a nghut. 17 Nàng gi, Ngò, nang lé byî é, Ngá é ngùn hîng lé saî é gùng mhón zê lé yù mù, náng é matú yùqgè hparà hpôlhô pé saî yù luî, haú pé eq shiwa myhí múzó kut shut bê nghut ri. 18 Nàng gi, zá htaû yúng tô é náng é mèbu lé yù mù, haú pé lé hut byi luî, Ngá é xû eq namngón jung lé haú pê é hí má nhông byi bê nghut ri. 19 Náng é matú Ngò byî é zoshuq nghut é, nang lé Ngò zó nhang é mún, tsanlun xû eq byo-î pé lé le, nàng yù mù, namngón shôm hkungga dông yhángmòq é hí má àp nhông bê nghut ri. Haú hkyô gi, dùt htoq bê nghut ri; haû gi, Ahko Ahkáng lhúnglháng wó Sû Yhûmsîng Garai taî pyo ri.
20 Hau htoq agó, Ngá é matú nàng hkû byî é, náng é yùqzo byìzô pé lé, nàng shuî yù mù, hparà hpôlhô pê é zoshuq dông nàng nhông byî pyám bê nghut ri. Nàng kut é shiwa myhí múzó gi, a gé lùq shi lhú? 21 Nàng gi, Ngá é zodù wuì lé sat pyám mù, hparà hpôlhô pê é matú yhángmòq lé nyhê nhông byî pyám bê nghut ri. 22 Hau htoq agó, nàng gi, náng é achaq achyut hkyô pé eq náng é shiwa myhí múzó pé bànshoq lé kut nyi é hkûn, nàng tiq tô u gùngchîn dùt é eq náng é sui má nàng galhu lhû é hkyô lé a myìtbûn kat nghut ri.
23 Dingnyé wó ri! Dingnyé wó ri! Haû gi, Ahko Ahkáng lhúnglháng wó Sû Yhûmsîng Garai taî pyo ri. Nàng gi, náng é agè ashop hkyô shí pé bànshoq htoq má, 24 yhûmsing é matú myhang é jowò saí mù, wà byù zîng é jowò hkangmó má myhang é hparà noq jowò tsing saî to bê nghut ri. 25 Nàng gi, hkyô chyûn hkangmó má myhang é hparà noq jowò pé saí mù, náng é yúng hkyô lé achaq achyut kut pyám luî, haú mai laî ló é yùq hkangmó lé, náng é hkyî lâng hkyaq shit mù, mara kut shut é múzó lhoq myô yù bê nghut ri. 26 Nàng gi, náng é yhûmkyochang nghut é, gùngsho ko mù yùt yùt ô nau é Egutuq byu pé eq mehpye hpyê é múzó kut luî, mara kut shut é múzó lhoq myô é dông, Ngo lé nhikjum lhoqyo bê nghut ri. 27 Haû mù, Ngò gi, Ngá é lòq lhâm kat luî, náng é maumyî lhoqyôm byi bê nghut lhê; Ngò gi, náng é mehpye hpyê é múzó é yánmai hoq dan é, náng é gyè nghut é Hpilisiti byu pê é byìzô pê é lòq má, nang lé àp byî pyám bê nghut lhê. 28 Nàng gi, yùt yùt ô nau é nhik a dìk shî é yánmai, Asuri byu pé eq le mehpye hpyê é múzó kut ashî nghut ri; hau htâng má lháng, nàng gi, yùt yùt ô nau é nhik a dìk shi nghut ri. 29 Haû mù, nàng gi, wuìloq kut mau nghut é Babelon byu pé eq mehpye hpyê é múzó kut shut é hkyô lhoqmyô yù bê nghut ri; nàng gi, haû nghut kôlhang, yùt yùt ô nau é nhik a dìk shi nghut ri.
30 Nàng gi, me hoq a sê é shiwa myhí su, haú hkyô pé bànshoq kut bê nghut é yánmai, Ngò gi, nang lé nhikmó-yo bê nghut lhê! Haû gi, Ahko Ahkáng lhúnglháng wó Sû Yhûmsîng Garai taî pyo ri. 31 Nàng gi, hkyô chyûn hkangmó má náng é matú myhang é jowò saí mù, byù zîng é jowò hkangmó má myhang é hparà noq jowò pé tsing saî é hkûn, mehpye hpyê é ahpau a yu é yánmai, shiwa myhí su a dùt nghut ri.
32 Nàng gi, sulàng lú é myiwe myhí nghut ri myhî-nhung! Nàng gi, náng é yhûmsîng hpô é gùnglik dông, bíng hpô pé lé je ô nau ri myhî-nhung! 33 Shiwa myhî pé bànshoq gi, chyûnghuq yu akô; nghut kôlhang, nàng gi, nàng chyit é bang bànshoq lé chyûnghuq tsing byî ri; nàng gi, jowò hkangmó mâ é bang, nàng eq lé wó zùm yàp shoq, yhángmòq lé chyûnghuq èq mhuî yu ri. 34 Haû mù, nàng gi, gótû shiwa myhî pé eq shai é dông kut ri; nang lé ho é byù a nyì nghut ri. Nàng shèq ahpau byî é nghut mù, nang lé ahpau byî é byù a nyi é yánmai, nàng gi, shiwa myhí góbang eq shai ri.
35 Haû mù, shiwa myhí nàng ê, haû Yhûmsîng Garaî é dang lé gyo aq! 36 Haû Ahko Ahkáng lhúnglháng wó Sû Yhûmsîng Garai shî su ga taî ri; nàng gi, nàng yùt yùt ô nau é hkyô lé hut htoq shit mù, nàng chyit é bang eq mehpye hpyê é múzó kut é má, nàng gùngchîn kut htoq shit é yánmai le, náng é achaq achyut é hparà hpôlhô bànshoq é yánmai le, yhángmòq lé náng é zodù wui é sui nhông byî é yánmai le, 37 Ngò gi, nàng chyit é bang ra-am eq nàng a ngui é bang ra-am nghut é, nàng eq ngón kûn é, nàng chyit é bang bànshoq lé shuî tsîng to râ nghut lhê. Ngò gi, lhînghkyùq mai nang lé htuqhtíng râ matú yhángmòq lé shuî tsîng yù mù, yhángmòq é hí má náng é mèbu hkyut shang pyám byi râ nghut luî, yhángmòq gi, nàng gùngchîn dùt é lé myàng kôrâ nghut lhê. 38 Ngò gi, sulàng shut é eq byù sat é myiwe wuì lé mara dam byî é su, nang lé mara dam byi râ nghut lhê; Ngò gi, nhikmó-yô é eq nhikjum yô é mai, nang lé sui yui chyîn lató hpuq râ nghut lhê. 39 Hau htâng, Ngò gi, nang lé, nàng chyit bâng é lòq má àp byî pyám râ nghut mù, yhángmòq gi, náng é matú myhang é jowò pé lé hpyoq hpyi pyám luî, náng é myhang é hparà noq jowò pé lé lhoqhtên pyám byi râ nghut lhê; hau htoq agó, yhángmòq gi, náng é mèbu lé hkyut shang pyám byi mù, náng gûng má tap tô é yúng é ngùn hîng zè pé lé yu pyám byi luî, nang lé gùngchîn tô pyâm to kôrâ nghut lhê. 40 Yhángmòq gi, byù mòqmó lé le shuî lé lô kôrâ nghut mù, haú bang gi, nang lé lùqgòk èq chôm dú luî, sham èq jàp pyám kôrâ nghut lhê. 41 Yhángmòq gi, náng é yhûm pé lé nyhê hkyô pyám mù, myiwe myo myô é hí má, nang lé mara dàm mó byi kôrâ nghut lhê. Ngò gi, nang lé, shiwa myhí a wó kut loshoq nô pyám nhâng râ nghut mù, nàng gi, nàng chyit bang lé ahpau a byi lo râ nghut lhê. 42 Haû mù, nang lé Ngò nhikmó-yô é hkyô zîm byùq râ nghut mù, Ngò, nang lé nhikjum wú yô é hkyô lé, náng chyáng mai wùp yu pyám râ nghut lhê; Ngò gi, zim za nyì mù, nhikjum yo râ a nghut lo.
43 Nàng gi, náng é zo-myî pyàt lé a bûn byùq mù, shí hkyô pé bànshoq èq Ngo lé gumlau toq bê nghut é yánmai, Ngò gi, nàng kut bê é eq rajung za, náng é ulhum htoq má hkyak yubàk jé nhâng râ nghut lhê; haú hkûn, nàng gi, nàng kut é achaq achyut hkyô shí pé bànshoq htoq má, mehpye hpye múzó lé wó dum kut jàt bê a nghut lhú? Haû gi, Ahko Ahkáng lhúnglháng wó Sû Yhûmsîng Garai taî pyo ri.
44 Sânghkyang taî é sû ó yùq le, “Mó mâ é zo.” ga Yerusalem myiwe myhí nàng eq sêng é sânghkyang shî lé taí kôrâ nghut lhê. 45 Nàng gi, yhûmsing yhang lâng eq yhûmsing yhang zô pé lé tô pyâm tô é myiwe myhî é yhang zo byìzo yhang nghut ri; nàng gi, yhûmsing yhang lâng eq yhûmsing yhang zô pé lé tô pyâm tô é gu-nhá wuî mâ é rayùq nghut ri. Náng nu gi, Hiti byù nghut mù, náng wa gi, Amori byù nghut ri. 46 Nángnhá gi, yhâng é byìzô pé eq rahá náng é mautsûng hkyam má nyi é Samariq wà nghut ri; nunggu byìzo gi, yhang zo byìzô pé eq rahá náng é maupyî hkyam shut nyi é Sodom wà nghut ri. 47 Nàng gi, yhángmòq é htûngli cháng mù, yhángmòq kut é achaq achyut hkyô lé shû yu é za a nghut; a myáng má, náng é hkyô bànshoq má yhángmòq htoq je htên byòq byùq é nghut lhê. 48 Ngò rû dui nyi é eq rajung za, nunggu Sodom wà eq yhâng é byìzô pé gi, nàng eq nungzo byìzô pé kut é hkyô lé, hkâ-nhám le a kut kó nghut ri; haû gi, Ahko Ahkáng lhúnglháng wó Sû Yhûmsîng Garai taî pyo ri.
49 Wú aq; nunggu Sodom wa é yubàk mara gi, shî su nghut ri. Yhang eq yhâng é byìzô pé gi, nghutbûn é, zô myo shuq myô é, myìt myo ûng hkyik é hkyô a bo é za nyì kômù, myùng bang eq asho awuî é bang lé a garúm yû kó nghut ri. 50 Yhángmòq gi, myìt myhâng nghutbûn é htoq agó, Ngá é hí má achaq achyut é hkyô pé kut bum akô nghut ri. Haû mù, Ngò gi, núngmòq myang é eq rajung za, yhángmòq lé hkyom pyám râ nghut lhê. 51 Samariq wà gi, nàng kut é yubàk mara rawuí gû lháng a kut shut nghut ri. Nàng gi, yhángmòq htoq achaq achyut hkyô myô kut bê nghut mù, nángnhá eq nunggu byìzô pé gi, nàng kut é shí hkyô pé bànshoq é yánmai, díngmán é su ngam bum akô nghut ri. 52 Nàng gi, nángnhá eq nunggu byìzô pé lé sân-yúng bun nhâng bê nghut é yánmai, hui zo gíng é hoq hpu hkyô lé hkam yù lo aq. Náng é yubàk mara gi, yhángmòq é yubàk mara htoq je agè ashop é yánmai, yhángmòq gi, náng htoq je díngmán é dông dùt bekô nghut ri. Haû mù, nàng gi, nángnhá eq nunggu byìzô pé lé, díngmán é dông dùt nhâng bê nghut é yánmai, gùng-yuì luî, hui zo gíng é hoq hpu hkyô lé hkam yù lo àq hkoi.
53 Nghut kôle, Ngò gi, Sodom wà eq yhâng é byìzô pé lé le, Samariq wà eq yhâng é byìzô pé lé le, nang lé le, dum yùqyò nhâng râ nghut lhê; 54 haú hkûn, nàng gi, yhángmòq nhik wó tîng yù râ matú, nàng kut é hkyô bànshoq é yánmai, gùng-yuì mù, hui zo gíng é hoq hpu hkyô lé hkam yù berâ nghut lhê. 55 Nunggu Sodom wà eq yhâng é byìzô pé le, nángnhá Samariq wà eq yhâng é byìzô pé le, hí lhê su dum lhing dùt kôrâ nghut lhê; nàng eq nungzo byìzô pé le, hí lhê su dum lhing dùt kôrâ nghut lhê. 56 Nàng gi, nàng nghutbûn é buìnyì má, nunggu Sodom wà eq séng luî lháng a taî htoq, a nghut lhí? 57 Haû gi, náng é agè ashop hkyô lé a lhoqbyông htoq shî é hkûn dùt é hkyô nghut ri; ahkuî, nàng gi, Edom wà é byìzô pé eq yhâng é wàkyo pé mâ é bànshoq eq Hpilisiti byu pê é byìzô pé bànshoq bang nghut é, nang lé wú tiq é náng é awui ayàm má nyi é haú bang bànshoq èq wú tiq pyâm é hui zo bê nghut ri. 58 Nàng gi, nàng kut é mehpye hpyê é múzó eq nàng kut é achaq achyut hkyo pê é mara dam ashi lé myang hkâm zo râ nghut lhê; haû gi, Yhûmsîng Garai taî pyo ri.
59 Haû Ahko Ahkáng lhúnglháng wó Sû Yhûmsîng Garai shî su ga taî ri; nàng gi, dangshikaq lé lhoqhpyoq pyâm é dông, dâkam é dang lé wú tiq pyám bê nghut é yánmai, Ngò gi, nàng hkam yù gíng é eq rajung za, nang lé taû kut byi râ nghut lhê. 60 Nghut kôlhang, Ngò gi, nàng zorâm pyàt má, Ngò, nàng eq tô tô é dangshikaq lé myìtbun râ nghut lhê; Ngò gi, nàng eq ahtum abyùq dangshikaq to râ nghut lhê. 61 Haú hkûn, nàng gi, nángnhá eq nunggu byìzô pé lé hàp yu é u, náng é hkyô pé lé myìtbun mù, hoq hpû é hui zo râ nghut lhê; Ngò gi, yhángmòq lé, náng é byìzô pé dùt nhâng râ nghut lhê; nghut kôle, haû gi, nàng eq Ngá é dangshikaq má cháng mù, byî é a nghut. 62 Haû mù, Ngò gi, nàng eq Ngá é dangshikaq to râ nghut mù, Ngò gi, haû Yhûmsîng Garai nghut é lé, nàng sé râ nghut lhê. 63 Nàng kut shut é yubàk mara bànshoq lé, Ngò mara hkyut byi jáng, nàng gi, myìtbun luî, hoq bun râ nghut mù, nàng gùng-yui byùq é yánmai, hkâ-nhám le náng é nhut dum há râ a nghut lo; haû gi, Ahko Ahkáng lhúnglháng wó Sû Yhûmsîng Garai taî pyo ri.’ nghû taí aq.” gâ ri.