Mara Kut Shut Sû Shi Byùq Râ Nghut É Hkyô
‘Mó wuî gi, chyin é tsibyiq shi zo luî, zoshâng wuì zuì kyum ri.’ ga,
Isira-elaq mau eq séng luî sânghkyang shî lé chûng kô é gi, hai lichyúm nghut akô lhú?
3 Ngò rû dui nyi é eq rajung za, núngmòq gi, Isira-elaq mau má sânghkyang shî lé dum chûng lo kôrâ a nghut; haû gi, Ahko Ahkáng lhúnglháng wó Sû Yhûmsîng Garai taî pyo ri. 4 Byù yùq hkangmó é chyungxe lé Ngò sing lhê; mó wui é chyungxe lé Ngò sing é su, zô wui é chyungxe lé le Ngò sing lhê. Mara kut shut sû gi, shî râ nghut lhê.
5 Târâ ràp-rá hkyô eq jo têng é hkyô kut é,
díngmán é byù rayùq nyi é nghut jáng,
6 yhang gi, bùm htoq mâ é hparà noq jowò pé mâ é zoshuq lé a zo;
Isira-elaq a-myû mâ é hparà hpôlhô lé a wú;
yhûmkyochâng é myiwe lé a lú;
lhôhking lé é myiwe eq gùngsho a zùm kut ri.
7 Yhang gi, ó yùq lé le a zìk zô é za,
dakâm sàksé zè lé dum tau byi;
lú zo lú shuq hkyô a kut é za,
zò-mut hui sû lé zoshuq byi tso mù,
gùngchîn dùt sû lé mèbu byi hut ri.
8 Yhang gi, ngùnhpún kat é eq
a-myàt yu é kut râ matú a chyi byi kut ri.
Yhang gi, a jo a têng é hkyô a kut é za,
byù í hpûng é gyoro má díngmán é dông mû hpyit byî ri.
9 Yhang gi, Ngá é târâ wàng hkunmó lé cháng mù,
jujúm myìt mai Ngá é târâ pé lé châng kut ri.
Haú yùq gi, díngmán sû nghut ri;
yhang gi, gè gè yhang, chyungxe duì râ nghut lhê;
haû gi, Ahko Ahkáng lhúnglháng wó Sû Yhûmsîng Garai taî pyo ri.
10 Nghut kôlhang, yhang gi, byù sat é, a nghut jáng, shí hkyô pé mâ é rajung jung kut é, byù jum nghut é yùqzo rayùq wó é nghut mù, 11 (yhâng wa gi, haú pé haî lé le a kut wú kôlhang,)
yhang gi, bùm htoq mâ é hparà noq jowò pé mâ é zoshuq zo mù,
yhâng é yhûmkyochâng é myiwe lé lú é nghut jáng le,
12 yhang gi, myùng bang eq asho awuî é bang lé zìk zo mù,
lú zo lú shuq hkyô kut shut é nghut jáng le,
yhang gi, dakâm sàksé zè lé a tau byî é nghut jáng le,
yhang gi, hparà hpôlhô pé lé wú é nghut jáng le,
yhang gi, achaq achyut é hkyô pé lé kut é nghut jáng le,
13 yhang gi, ngùnhpún kat mù, a-myàt yu é nghut jáng le,
shî sû é byù gi, chyungxe wó duî râ lhú? Yhang gi, chyungxe duì râ a nghut! Yhang gi, achaq achyut hkyô shí pé bànshoq kut bê nghut é yánmai, hkyak shi byùq ra râ nghut lhê; yhâng é sui gi, yhâng é ulhum htoq má jé râ nghut lhê.
14 Nghut kôlhang, haú yùq gi, yùqzo rayùq wó mù, yùqzo haû gi, yhâng wa kut shut é hkyô bànshoq lé myàng kôlhang, haû sû é hkyô pé lé a kut shut é sû nghut jáng,
15 yhang gi, bùm htoq mâ é hparà noq jowò pé mâ é zoshuq lé a zô é htoq agó,
Isira-elaq a-myû mâ é hparà hpôlhô pé lé le a wú kut ri.
Yhang gi, yhûmkyochâng é myiwe lé a lú nghut ri.
16 Yhang gi, ó yùq lé le a zìk zô é htoq agó,
dakâm sàksé zè byi nhâng luî chyi byî é hkyô le a kut nghut ri.
Yhang gi, lú zo lú shuq hkyô le a kut é za,
zò-mut sû lé zoshuq byi tso mù,
gùngchîn dùt sû lé mèbu hut byî ri.
17 Yhang gi, hpû é shô é bang lé rhoî jihkyoî a kut é za,
ngùnhpún le a kat, a-myàt le a yù zo nghut ri.
Yhang gi, Ngá é târâ pé lé châng kut mù, Ngá é târâ wàng hkunmó pé lé le châng ri.
Yhang gi, yhâng wâ é yubàk marâ é yánmai shi byùq râ a nghut; yhang gi, hkyak chyungxe duì râ nghut lhê. 18 Nghut kôlhang, yhâng wa gi, yhûmsing é yubàk marâ é yánmai shi byùq râ nghut lhê; hkâsu mù gâ le, yhang gi, zìk zo zìk shuq kut luî, yhûmsing é gu-mang lé lú zo lú shuq mù, yhûmsing é a-myû wui chyáng a ge é múzó kut bê nghut ri.
19 Nghut kôlhang, núngmòq, ‘Zo gi, haî mù yhâng wâ é yubàk lé a bo hkam yù râ lhú?’ ga myî akô nghut ri. Zo gi, târâ ràp-rá hkyô eq díngmán hkyô lé kut mù, Ngá é târâ wàng hkunmó bànshoq lé rago cháng bê nghut luî, hkyak chyungxe duì râ nghut lhê. 20 Mara kut shut sû gi, shî râ nghut lhê. Zo gi, mó é yubàk hkâm zo râ a nghut; mó le, zô é yubàk hkâm zo râ a nghut. Díngmán sû gi, díngmán hkyo é ashi hkam yù râ nghut mù, agè ashop sû gi, agè ashop é ashi lé hkam yù râ nghut lhê.
21 Nghut kôlhang, agè ashop sû gi, yhang kut shut é yubàk mara bànshoq lé koi pyám mù, Ngá é târâ wàng hkunmó bànshoq lé cháng luî, târâ ràp-rá hkyô eq díngmán hkyô lé kut é nghut jáng, yhang gi, hkyak chyungxe duì râ nghut lhê; yhang gi, shî byùq râ a nghut. 22 Yhang târâ lu laî pyâm é mara haî lé le a bun byi lo râ nghut lhê. Yhang gi, díngmán hkyô pé lé kut bê nghut é yánmai, chyungxe dui nyì râ nghut lhê. 23 Agè ashop sû shi byùq é hkyô lé Ngò myìt ngui é nghut lhê lhú? Yhâng é a ge é hkyô pé lé tô pyám luî, yhang chyungxe dui nyì râ lé shèq, Ngò je myìt ngui lhê, a nghut lhí? Haû gi, Ahko Ahkáng lhúnglháng wó Sû Yhûmsîng Garai taî pyo ri.
24 Nghut kôlhang, díngmán sû rayùq, yhâng é díngmán hkyô lé tô pyám luî, mara kut shut mù, agè ashop sû kut é achaq achyut hkyô pé lé châng kut é nghut jáng, yhang gi, chyungxe dui nyì râ nghut lhê lhú? Haú yùq kut é díngmán hkyô haî lé le myìtbun byi râ a nghut. Yhang a jujúm pyâm é mara eq yhang kut shut pyâm é marâ é yánmai, yhang gi, shi byùq râ nghut lhê.
25 Nghut kôlhang, núngmòq, ‘Haû Yhûmsîng Garai kut é hkyô gi, târâ a ràp-rá nghut ri.’ ga taî akô; Isira-elaq byu pé ê, gyo keq; Ngò kut é hkyô târâ a ràp-rá é nghut lhê lhú? Núngmòq kut é hkyô shèq târâ a ràp-rá é nghut lhê, a nghut lhí? 26 Díngmán sû rayùq, yhang díngmán é hkyô lé tô pyám luî, mara kut shut é nghut jáng, yhang gi, hau é matú shi byùq râ nghut lhê; yhang kut shut é marâ é yánmai, yhang shi byùq râ nghut lhê. 27 Nghut kôlhang, agè ashop sû rayùq, yhang kut shut é agè ashop hkyô lé tô pyám mù, târâ ràp-rá hkyô eq díngmán hkyô lé kut é nghut jáng, yhang gi, yhâng é chyungxe lé wó hkyi yù râ nghut lhê. 28 Yhang gi, yhang kut shut é yubàk mara bànshoq lé myìt wú mù, haú pé lé tô pyám bê nghut é yánmai, hkyak chyungxe duì râ nghut lhê; yhang gi, shi byùq râ a nghut. 29 Nghut kôlhang, Isira-elaq byu pé, ‘Haû Yhûmsîng Garai kut é hkyô gi, târâ a ràp-rá nghut ri.’ ga taî bum akô. Isira-elaq byu pé ê, Ngò kut é hkyô pé gi, târâ a ràp-rá é nghut lhê lhú? Núngmòq kut é hkyô pé shèq târâ a ràp-rá é nghut lhê, a nghut kó lhí?
30 Haû mù, Isira-elaq byu pé ê, Ngò gi, núngmòq yùq hkangmó kut é hkyô pé má cháng luî, núngmòq lé jéyáng râ nghut lhê. Myìt lhîng keq! Núngmòq kut shut é yubàk mara bànshoq mai lhing tau keq; haû jáng, núngmòq gi, marâ é yánmai gyòp gyó byùq râ a nghut; haû gi, Ahko Ahkáng lhúnglháng wó Sû Yhûmsîng Garai taî pyo ri. 31 Núngmòq kut shut é yubàk mara bànshoq lé tô pyám mù, i-myìt asik eq sô asik lé htaî kat yû keq. Isira-elaq byu pé ê, núngmòq gi, haî mù shi byùq kôrâ lhú? 32 Ngò gi, ó yùq shi byùq râ lé le a ô naù nghut é yánmai, myìt lhîng mù, chyungxe duì keq! Haû gi, Ahko Ahkáng lhúnglháng wó Sû Yhûmsîng Garai taî pyo ri.