Myìqhtoi Pyoq Pé Lé Mara Hun É Hkyô
13
Haû Yhûmsîng Garaî é mungdang ngá chyáng jé é gi, 2 “Byù zo ê, ahkuî myìqhtoi htoî nyi é Isira-elaq é myìqhtoî pé lé htuqhtîng é myìqhtoi htoi aq. Haû yhángmòq é u-nuq mai htoq é hkyô lé myìqhtoi htoî nyi é bang lé, ‘Haû Yhûmsîng Garaî é dang lé gyo keq! 3 Haû Ahko Ahkáng lhúnglháng wó Sû Yhûmsîng Garai shî su ga taî ri; haî lé le a myang é za, yhûmsing é i-myìt sô má châng é, go é myìqhtoî pé gi, dingnyé wó ri! 4 Isira-elaq a-myû ê, náng é myìqhtoî pé gi, htên byòq yèq tô é jang má nyi é dànghkuî pé eq du ri. 5 Myìqhtoi núngmòq gi, haû Yhûmsîng Garaî é buìnyì mâ é majan má Isira-elaq byu pê é wàhkûm wó gingtîng nyì shoq, dông tô é wàhkûm lé ê hpô byi râ matú a dòq ê kó nghut ri. 6 Myìqhtoi pyoq pê é shing-rán gi, a-pyoq nghut mù, yhángmòq bùt hpyit é hkyô gi, mhaû é nghut ri. Yhángmòq lé haû Yhûmsîng Garai nhang kat é a nghut kôlhang, yhángmòq gi, “Haû Yhûmsîng Garai taî pyo ri.” ga taí kômù, yhángmòq é dang lé lhoqdìk byi râ matú Yhâng chyáng myòqbyu akô nghut ri. 7 Ngò a taí kôlhang, “Haû Yhûmsîng Garai taî pyo ri.” ga myìqhtoi pyoq núngmòq taí kô é hkûn, núngmòq gi, shing-rán lé akôm má myang pyám mù, mhaû é dông bùt hpyit pyám bekô, a nghut kó lhú?8 Haû mù, haû Ahko Ahkáng lhúnglháng wó Sû Yhûmsîng Garai shî su ga taî ri; núngmòq é a têng é dang pé eq mhaû é shing-rán é yánmai, Ngò gi, núngmòq lé htuqhtîng é nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 9 Ngá é lòq gi, a têng é shing-rán pé myang é eq mhaû é hkyô bùt hpyit é myìqhtoî pé lé htuqhtíng râ nghut lhê. Yhángmòq gi, Ngá é byu pê é hpàqchyî byi hpúng má bo myang lòm kôrâ le a nghut; Isira-elaq byu pê é jihpán má le bo myang lòm kôrâ a nghut; Isira-elaq é mîngdán má le bo myang wang ló kôrâ a nghut. Haú hkûn, Ngò gi, haû Ahko Ahkáng lhúnglháng wó Sû Yhûmsîng Garai nghut é lé, núngmòq sé kôrâ nghut lhê.
10 Myìqhtoi pyoq pé yhángmòq gi, nguì ngón hkyô a jòq kôlhang, “Nguì ngón ri.” ga taí mù, Ngá é byu pé lé hkyô shuî nghoq kô é yánmai le, hkyâm xêwâm kyâm to jáng, yhángmòq gi, chuhuí hpyû bùt to kô é yánmai le, 11 chuhuí hpyû bùt tô é bang lé, xêwâm haû leng râ nghut lhê nghû taî kyo aq. Ngò gi, xêwâm haú lé, mau htúngkyî htúnglhum wo gyun nhâng mù, lìkwò mó bàt nhâng luî, laìdun mó èq mùt hkyop nhâng râ nghut lhê. 12 Xêwâm haû lèq gyòp é hkûn, byu pé gi, “Nàng bùt tô é chuhuí hpyû gi, hká ló bê lhú?” ga núngmòq lé myi kôrâ nghut lhê.
13 Haû mù, haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, nhikmó-yô é mai laìdun mó nhang kat luî, nhikjum yô é mai, lìkwò mó pé eq mau htúngkyî htúnglhum wò nhâng mù, xêwâm lé lhoqhtên pyám râ nghut lhê. 14 Ngò gi, núngmòq chuhuí hpyû bùt tô é xêwâm lé lhoqhkyop pyám mù, hau é a-pûn awang lháng de de dùt to râ matú, myigùng eq rawuí za dùt shoq lhoqhkyop pyám râ nghut lhê. Haû gyòp gyó é hkûn, núngmòq gi, nhê hkyop sat pyâm é hui zo kôrâ nghut lhê; haú hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê. 15 Haû mù, Ngò gi, xêwâm haú lé le, haú lé chuhuí hpyû bùt é bang lé le, Ngò nhikmó-yô é mai htuqhtíng râ nghut lhê. Haú hkûn, Ngò gi, núngmòq lé, “Xêwâm gi, htên byòq byùq bê nghut ri; haú lé chuhuí hpyû bùt é bang le shi htûm byùq bê nghut ri. 16 Nguì ngón hkyô a jòq kôlhang, Yerusalem wà mó é matú nguì ngón hkyô shing-rán myàng byi luî, wà haú lé myìqhtoi htoî é Isira-elaq é myìqhtoî pé gi, a nyi byùq lo râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.” nghû taí râ nghut lhê.’ nghû taí aq.
17 Ahkuî, byù zo ê, yhángmòq é u-nuq mai htoq é lé myìqhtoi htoî nyi é bâng é myiwe wuì shut myòqdong hû aq; yhángmòq lé htuqhtíng râ myìqhtoi dang taí aq ga mù, 18 ‘Haû Ahko Ahkáng lhúnglháng wó Sû Yhûmsîng Garai shî su ga taî ri; byu pé lé myìt lâng nghoq yû râ matú, lòqbú lòqyìn bànshoq má byù mhuí zê mhón tap to mù, yhángmòq é ulhum má cháng luî u-nghop saî nghop tô é myiwe wuì gi, dingnyé wó ri. Núngmòq gi, yhûmsing chyungxe wó dui nyì râ matú, Ngá é byu pê é myìt lé lâng nghoq yû kôrâ lhú? 19 Núngmòq gi, mùk-yó gùq ra-tsup eq mùk rajàp é yánmai, Ngá é byu pê chyáng Ngo lé taî hpoî pyâm akô; hau htoq agó, mhaû é dang lé gyô nau é Ngá é byu pé lé mhaú zô é dông, a shî gíng é bang lé sat pyám kômù, shî gíng é bang lé chyungxe duì nhang tô akô nghut ri.
20 Haû mù, Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, nghoqzô pé lé su, núngmòq, byu pê é i-myìt lé lâng nghoq yu é, núngmòq é byù mhuí zê lé htuqhtíng râ nghut mù, haú pé lé núngmòq é lòqbú lòqyìn mai lâng cheq hkyô pyám byi râ nghut lhê; Ngò gi, nghoqzô pé lé su, núngmòq èq i-myìt lâng nghoq yu é byu pé lé lhoqlhut kat râ nghut lhê. 21 Ngò gi, núngmòq é u-nghop lé lâng cheq pyám byi mù, núngmòq é lòq mai Ngá é byu pé lé hkyi yù râ nghut mù, yhángmòq gi, htâng má núngmòq èq chyup yu é a dum hui lo kôrâ nghut lhê. Haú hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê. 22 Ngò a lhoqyón wú é díngmán su é i-myìt lé, núngmòq mhaû é dâng èq lhoqyón kôluî, agè ashop é sû gi, hkyi yu é a hui shoq, yhâng é agè ashop é hkyô mai a lhing lò râ matú, yhang lé núngmòq myìt wum byî akô nghut ri. 23 Haû mù, núngmòq gi, htâng má, shing-rán pyoq a myàng lo râ nghut é htoq agó, bùt hpyit é hkyô le a kut lo kôrâ nghut lhê. Ngò gi, núngmòq é lòq mai Ngá é byu pé lé hkyi yù râ nghut lhê. Haú hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê.’ gâ ri.” ga taî kyô ri.