Hparà Noq Bang Lé Mara Byî É Hkyô
14
Isira-elaq byu pê é sûwún wuî ra-am gi, ngá chyáng lé jé mù, ngá é hí má zung tô bum akô. 2 Haú hkûn, haû Yhûmsîng Garaî é mungdang ngá chyáng jé é gi, 3 “Byù zo ê, byù shí bang gi, yhángmòq é i-myìt nhiklhum pé má hparà hpôlhô pé tsung to mù, yhángmòq é myòq hí má agè ashop é myìt lèqbàt jowò pé tap tô akô. Ngò gi, haî mù yhángmòq myî é lé tû taí râ lhú? 4 Haû mù, yhángmòq lé dang nyô luî, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Isira-elaq byu pé mâ é rayùq yùq, yhâng é i-myìt nhiklhum má hparà hpôlhô pé tsung to mù, yhâng é myòq hí má agè ashop é myìt lèqbàt jowò pé tap to luî, myìqhtoi hpô chyáng e é nghut jáng, yhang noq é hparà hpôlhô myô é eq rajung za, Ngò, Yhûmsîng Garai gi, yhang hkam yù gíng é dông taû kut byi râ nghut lhê. 5 Ngò haû su kut é gi, yhûmsing é hparà hpôlhô pê é yánmai Ngo lé tô pyâm tô é, Isira-elaq byu pê é i-myìt nhiklhum lé dum lâng taû yù râ matú nghut lhê.’ nghû taî kyo aq.6 Haû mù, Isira-elaq byu pé lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; myìt lhîng wó keq! Núngmòq é hparà hpôlhô pé mai lhing tau mù, núngmòq kut é achaq achyut hkyô bànshoq lé tô pyám keq!
7 Isira-elaq byù nghut nghut, Isira-elaq má bíng nyi é gó-mîng byù nghut nghut, Ngò eq gang luî, yhâng é i-myìt nhiklhum má hparà hpôlhô pé tsung to mù, yhâng é myòq hí má agè ashop é myìt lèqbàt jowò pé tap to luî, Ngá é hkyô lé myi râ matú myìqhtoi hpô chyáng ê kô é nghut jáng, Ngò, Yhûmsîng Garai yhang, yhang lé tu byi râ nghut lhê. 8 Ngò gi, haú yùq lé htuqhtíng râ nghut mù, yhang lé, alhô agàn eq gya dang taî kún hpo kut pyám râ nghut lhê. Ngò gi, yhang lé Ngá é byù myû mai lhoqhtoq pyám râ nghut lhê. Haú hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê.
9 Myìqhtoi rayùq yùq, mhuî yu é hui mù, myìqhtoi htoî é nghut jáng, Ngò, Yhûmsîng Garai gi, myìqhtoi haú lé mhuî yu é nghut lhê; Ngò gi, Ngá é lòq lham mù, haú yùq lé htuqhtíng luî, Ngá é Isira-elaq byu pê chyáng mai yhang lé lhoqhtên pyám râ nghut lhê. 10 Myìqhtoi hpó eq yhang lé myìqhtoi htoi byi nhang é sû gi, rajung za mara bo é nghut lhê; yhángnhik gi, rajung za mara dam byî é hui zo kôrâ nghut lhê. 11 Haû mù, Isira-elaq byu pé gi, Ngá chyáng mai hkâ-nhám le hkyô a nghoq lo kôrâ nghut é htoq agó, yhûmsing é yubàk marâ èq yhûmsing gùng lé agòt a-û kut kôrâ a nghut lo. Yhángmòq gi, Ngá é byu pé dùt kôrâ nghut mù, Ngò gi, yhángmòq é Garai Gasang dùt râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.’ nghû taí aq.” gâ ri.
Târâ Jéyáng É Mai A Wó Lùt Râ Hkyô
12 Haû Yhûmsîng Garaî é mungdang ngá chyáng jé é gi, 13 “Byù zo ê, mîngdán ralhum lhum, a jujúm kô é dông mai Ngo lé mara kut shut luî, Ngò gi, Ngá é lòq lhâm kat mù, mîngdán haú lé htuqhtíng luî, zoshuq htuq é hkyô lé hpyit pyám byi mù, mîngdán haú má mùtmó gyó nhâng luî, haú mâ é byu pé eq yhángmòq é shigu gaunyhaû pé lé sat pyâm é nghut jáng, 14 mîngdán haú má No-aq, Dani-elaq eq Yobaq pé sum yuq nyi to kôlhang, yhángmòq gi, yhángmòq é díngmán hkyo é yánmai, yhûmsing é chyungxe za wó lùt kôrâ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.
15 Ngò gi, haú mau gón má tân jung yòsô zè nhang kat luî, haú pê èq zoshâng a nyi byùq loshoq kut pyám mù, chamchyuîyuì dùt byùq luî, yòsô zè haú pê é yánmai ó yùq le haú mai a wó laî ló dùt é nghut jáng, 16 Ngò rû dui nyi é eq rajung za, haú má yhángmòq sum yuq nyi to kôlhang, yhángmòq gi, yhángmòq é yùqzo byìzô pé lé wó hkyi yù râ a nghut. Yhángmòq é gùng za hkyi yu é hui kôrâ nghut lhê; nghut kôlhang, mîngdán haû gi, chamchyuîyuì dùt byùq râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.
17 Ngò gi, mîngdán haú má shâm jé nhâng mù, ‘Shâm haû gi, mîngdán gón jé lhîng sháng gàq.’ nghû taí mù, haú ming mâ é byu pé eq yhángmòq é shigu gaunyhaû pé lé sat pyâm é nghut jáng, 18 Ngò rû dui nyi é eq rajung za, haú má yhángmòq sum yuq nyi to kôlhang, yhángmòq gi, yhángmòq é yùqzo byìzô pé lé wó hkyi yù kôrâ a nghut. Yhángmòq é gùng za hkyi yu é hui kôrâ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.
19 Ngò gi, mîngdán haú má wúm gyó nhâng mù, suí shun pyám râ dông Ngá é nhikmó-yo hkyô lé hau é ahtoq má hut hkyô kat luî, haú ming mâ é byu pé eq yhángmòq é shigu gaunyhaû pé lé sat pyâm é nghut jáng, 20 Ngò rû dui nyi é eq rajung za, mîngdán haú má No-aq, Dani-elaq eq Yobaq pé sum yuq nyi to kôlhang, yhángmòq é yùqzo byìzô pé lé wó hkyi yù kôrâ a nghut. Yhángmòq gi, yhángmòq é díngmán hkyo é yánmai, yhûmsing é chyungxe za wó lùt kôrâ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.
21 Haû Ahko Ahkáng lhúnglháng wó Sû Yhûmsîng Garai shî su ga taî ri; Yerusalem wà mó mâ é byu pé eq yhángmòq é shigu gaunyhaû pé lé sat pyám râ matú, Ngò dam byî é gyùq chiq hpo mó myî jung nghut é, shâm, mùtmó gyó hkyô, tân jung yòsô zè pé eq wúm pé lé wà haú má nhang kat é nghut jáng, wà haû gi, hkâ-í yhang wuîhkê byùq râ nghut lhê ô! 22 Nghut kôlhang, wó lùt gyó tô é byù ra-am nghut é yùqzo byìzô pé gi, haú mai shuî htoq ló é hui kôrâ nghut lhê. Yhángmòq gi, núngmòq chyáng jé kôrâ nghut mù, núngmòq gi, yhángmòq é nyì yàp sâmlai eq hkyîzó lòqzó pé lé lhom myàng kôjáng, Yerusalem wà mó má Ngò jé nhang é byò dàn byò sho hkyô bànshoq eq séng luî, nhiktíng hkyô wó yù kôrâ nghut lhê. 23 Núngmòq gi, yhángmòq é nyì yàp sâmlai eq hkyîzó lòqzó pé lé lhom myàng kôjáng, nhiktíng hkyô wó yû kôrâ nghut lhê; hkâsu mù gâ le, núngmòq gi, wà haú lé Ngò kut é haí jung le, jumgú má Ngò a kut é hkyô lé wó sé kôrâ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.” gâ ri.