Shúm Zûng Hui Râ Alhô Agàn
12
Haû Yhûmsîng Garaî é mungdang ngá chyáng jé é gi, 2 “Byù zo ê, nàng gi, gumlau toq é a-myû chyáng nyi tô é nghut ri. Yhángmòq gi, myàng râ matú myòqjí dàp to kôlhang, a myàng kó, wó gyo râ matú nohkyap dàp to kôlhang, a wó gyo kó nghut ri; hkâsu mù gâ le, yhángmòq gi, gumlau toq é a-myû nghut ri.3 Haû mù, byù zo ê, shúm zûng e ló râ matú râ é zè món mù, nyí lé, yhángmòq é myòq hí má, nàng nyi tô é mai gótû jowò shut htòt htoq ê àq. Yhángmòq gi, gumlau toq é a-myû nghut kôlhang, sê gyô lò kó âbe. 4 Nyí lé, yhángmòq wú tô é hkûn, shúm zûng e ló râ matú món tô é zè yu htoq aq; myín lé yhángmòq é myòq hí má, shúm zûng e ló é bang su kut htoq ló aq. 5 Yhángmòq é myòq hí má, wàhkûm dû htong mù, haú mai náng é zè pé yu htoq aq. 6 Yhángmòq é myòq hí má zè haú pé lé gòqsân mai wàq yù mù, mauchut é u lé wàq htoq ló aq. Nàng gi, myigùng lé a myàng râ matú myòqdong lé nghop pyám aq; hkâsu mù gâ le, Ngò gi, Isira-elaq byu pê é matú nang lé alhô agàn kut bê nghut lhê.” gâ ri.
7 Haû mù, ngò gi, ngo lé hkunmó hkyô é eq rajung za kut bê nghut lhê; ngò gi, nyí lé, shúm zûng e ló râ matú ngá é zè pé món yû luî, myín lé, ngá lòq èq wàhkûm lé dong dû htông é nghut lhê. Ngò gi, mauchut tô é u, yhángmòq é myòq hí má, ngá é zè pé lé gòqsân mai wàq htoq ló é nghut lhê.
8 Nàpkyó lé, haû Yhûmsîng Garaî é mungdang ngá chyáng jé é gi, 9 “Byù zo ê, gumlau toq é a-myû Isira-elaq byu pé gi, ‘Nàng haî kut nyi lhê?’ ga nang lé myi kô é, a nghut lhí?
10 Yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; shî gi, Yerusalem wà mó má ùp é zau eq haú má nyi é Isira-elaq byù bànshoq eq sêng é shing-rán dang nghut lhê.’ nghû taî kyo aq. 11 Hau htoq agó, yhángmòq lé, ‘Ngò gi, núngmòq é matú alhô agàn nghut lhê.’ nghû le taî kyo aq.
Ngò kut shit é eq rajung za, yhángmòq hui zo kôrâ nghut lhê. Yhángmòq gi, shúm zûng râ matú chyup shuî ló é hui zo kôrâ nghut lhê.
12 Yhángmòq chyáng mâ é zau gi, mauchut u, yhâng é zè pé lé gòqsân mai wàq luî htoq ló râ nghut lhê; yhángmòq gi, yhang htoq ló râ matú wàhkûm dû htông to byi kôrâ nghut lhê; yhang gi, myigùng lé a myàng loshoq, yhâng é myòqdong lé nghop pyám râ nghut lhê. 13 Ngò gi, yhang lé Ngá é gùn èq nghop pyám râ nghut mù, yhang gi, Ngá é dumzo má myí râ nghut lhê; Ngò gi, yhang lé, Babelon byu pê é mau, Babelon wà mó má shuî ló râ nghut lhê; nghut kôlhang, yhang gi, haú lé a myang é za, shi byùq râ nghut lhê. 14 Ngò gi, yhâng é lhînghkyùq má nyi é bànshoq bang nghut é, yhang lé garúm é bang eq yhâng é gyèhpúng bànshoq lé, maumyî myi chyûn shut lhoqpyo hâng kat mù, shâm shê luî, yhángmòq lé châng hkat râ nghut lhê.
15 Yhángmòq lé, Ngò, byù myû wui chyáng hkat hâng kat mù, mîngdán pé má hkat pyo hâng kat é hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê. 16 Nghut kôlhang, Ngò gi, yhángmòq chyáng mâ é ra-am lé, shâm, mùtmó gyó é eq wúm gyó é mai lhoqlhut to râ nghut lhê; haû mù, yhángmòq gi, yhángmòq jé é byu myû wui chyáng, yhángmòq kut é achaq achyut hkyô bànshoq lé wó sê gyo kôrâ nghut lhê. Haú hkûn, Ngò gi, haû Yhûmsîng Garai nghut é lé, yhángmòq sé kôrâ nghut lhê.” gâ ri.
17 Hau htoq agó, haû Yhûmsîng Garaî é mungdang ngá chyáng jé é gi, 18 “Byù zo ê, gyùq nán uchyang náng é zoshuq zo mù, kòk kòk gyùq nán é èq náng é ûchyam shuq àq. 19 Mingbyû wuì lé, ‘Yerusalem wà mó má nyi é bang eq Isira-elaq mîngdán eq séng luî, haû Ahko Ahkáng lhúnglháng wó Sû Yhûmsîng Garai shî su ga taî ri; yhángmòq gi, myìt myo ûng wôm é mai yhángmòq é zoshuq lé zo mù, gyùq ngha byùq é mai yhángmòq é ûchyam lé shuq kôrâ nghut lhê. Hkâsu mù gâ le, yhángmòq é mîngdán má nyi é lhúnglháng bâng é lú lhum bàt zìk é hkyô pê é yánmai, mîngdán haú mâ é zè lhúnglháng lhoqhtên pyâm é hui râ nghut lhê. 20 Byù nyi é wà pé gi, tô sâ tô é hui mù, mîngdán haû gi, chamchyuîyuì dùt byùq râ nghut lhê. Haú hkûn, Ngò gi, haû Yhûmsîng Garai nghut é lé, núngmòq sé kôrâ nghut lhê.’ nghû taí aq.” gâ ri.
Ahkyíng Hkyak Má Dik Byùq Râ Hkyô
21 Haû Yhûmsîng Garaî é mungdang ngá chyáng jé é gi, 22 “Byù zo ê, Isira-elaq mau má, ‘Tûng buìnyì pé laî byùq jáng, shing-rán lhúnglháng akôm dùt pyám.’ ga núngmòq taî é sânghkyang gi, haî nghut lhê lhú? 23 Yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Ngò gi, sânghkyang shî lé lhoqhtûm pyám râ nghut mù, yhángmòq gi, Isira-elaq mau má sânghkyang haú lé taí kôrâ a nghut lo.’ nghû taí aq. Hau htoq agó, yhángmòq lé, ‘Shing-rán lhúnglháng dìk râ buìnyì chyáng bê nghut ri. 24 Hkâsu mù gâ le, htângnùng má, Isira-elaq byu pê chyáng, a têng é shing-rán pé eq mhaû é bùt hpyit hkyô pé a jòq lo râ nghut lhê. 25 Nghut kôlhang, Ngò, Yhûmsîng Garai gi, Ngò myìt ô nau é lé taí râ nghut mù, ahkyíng hkyak má haú pé dìk byùq râ nghut lhê. Hkâsu mù gâ le, gumlau toq é byu pé ê, núngmòq é buìnyì pé má, Ngò taî é lhúnglháng lhoqdìk râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.’ nghû le taí aq.” gâ ri.
26 Haû Yhûmsîng Garaî é mungdang ngá chyáng dum jé é gi, 27 “Byù zo ê, ‘Yhang myang é shing-rán gi, ahkuî mai buìnyì myáng ashî; yhang myìqhtoi htoî é pé gi, htângnùng lhê é myáng myáng é hkyô eq ru sêng ri.’ ga Isira-elaq byu pé taî nyi bum akô nghut ri.
28 Haû mù, yhángmòq lé, ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Ngò taî é dang haî le, ahkyíng a láng lô é za lhoq dìk râ nghut lhê; Ngò haî taî le haî dìk byùq râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.’ nghû taí aq.” gâ ri.