Yhûmsîng Garai lé Hkya-on Kúngton É Hkyô
25
Yhûmsîng Garai ê, Nàng gi, ngá é Garai Gasang nghut ri;ngò gi, Nang lé hkya-on wàq toq mù, Náng é myìng lé hkya-on kúngtôn râ nghut lhê;
hkâsu mù gâ le, Nàng gi, gúmjùp jujúm é hkyô mai,
maúhpo múzó pé lé kut bê;
haú pé gi, góhkûn mai hen tô é hkyô pé nghut ri.
2 Nàng gi, wà mó lé byòq gyòp bùm nhang to luî,
gingtîng é wà lé lhoqhtên pyám nhâng mù,
gó-mîng byu pê é gingtíng jowò lé wà a dùt loshoq kut pyâm ri;
haú lé hkâ-nhám le dum xuq râ a nghut lo.
3 Haû mù, wúm bo é byu pé gi, Nang lé hkungga kôrâ nghut lhê;
shogyo myìt a bo é a-myû wui é wà mó pé gi, Nang lé gyùq hkúngga kôrâ nghut lhê.
4 Nàng gi, myùng bâng é matú nghêhkaû jowò,
myìt myo ûng wom luî asho awui dùt bâng é matú nghêhkaû jang,
laìdun mó lo é hkûn hkaû jowò,
buì nyé é hkûn buìshûm dùt byî nyì bê nghut ri.
Hkâsu mù gâ le, shogyo myìt a bò bang nhik-ûm bùq é hkyô gi,
wàhkûm má laìdun mó lo mùt htûng nyi é su le,
5 yòso mâ é nyé soq su le dùt ri.
Nàng gi, gó-mîng byu pê é garu garín htê lé lhoqzîm pyâm ri;
mhut é wùpzô èq buì nyé é lé lhoqyom pyám byî é su,
shogyo myìt a bò bâng é mahkôn zîm byùq râ nghut lhê.
6 Haû Wum-o a-tsam dìk shoq bò Sû Yhûmsîng Garai gi, bùm shî má,
byù lhúnglháng bâng é matú,
xû xû za gâ é zoshuq agùn agó eq axau nghut bê tsibyiq wing a-mún poî kut râ nghut lhê;
poî haú má, wuinyún byíng é je ge é sho pé eq je nghâm é tsibyiq wing pé lé myàng zo myàng shuq râ nghut lhê.
7 Yhang gi, bùm shî má,
byù lhúnglhâng é mebyùng long lé le,
byù myû lhúnglháng lé gùm shoq nghop tô é pánlong lé le,
lhoqhtên pyám râ nghut lhê.
8 Yhang gi, shî nò hkyô lé, ahtum abyùq myhui pyám râ nghut lhê.
Haû Ahko Ahkáng lhúnglháng wó Sû Yhûmsîng Garai gi,
myòqdong hkangmó mâ é ngaùbyi sut pyám byi râ nghut lhê;
Yhang gi, myìdàm htoq bànshoq mai,
Yhâng é byu pê é hoq hpu hkyô lé huî sêng pyám byi râ nghut lhê.
Haú hkyô lé, Yhûmsîng Garai taî to bê nghut lhê.
9 Haú buìnyì má, yhángmòq gi,
“Gè gè yhang, shî gi, ngá-nhûng é Garai Gasang nghut ri;
ngá-nhúng, Yhang lé lùmhkaû bê nghut mù, Yhang, ngá-nhúng lé hkyi yù bê nghut ri.
Shî gi, Yhûmsîng Garai nghut ri; ngá-nhúng, Yhang lé lùmhkaû bê nghut lhê;
ngá-nhúng gi, Yhâng é hkyi yù hkyo é yánmai, gabú byam chyu myìt ngón nyî sháng.” ga taí kôrâ nghut lhê.
10 Haû Yhûmsîng Garaî é lòq gi, bùm shî má bánno râ nghut lhê;
nghut kôlhang, Moba mau gi, hpún bûm má hkówá lé nâng pyeq pyâm é su,
haú má nâng pyeq pyâm é hui râ nghut lhê.
11 Yhángmòq gi, haû wuìli li sû wuìli râ ga yhâng é lòq lé lhâm kat é su,
yhángmòq é lòq pé lé lham kôrâ nghut lhê.
Nghut kôlhang, Garai Gasang gi, yhángmòq nghutbûn é hkyô lé lhoqhkyô pyám byi mù,
yhángmòq é lòq mâ é a-tsam lé lhoqyom pyám byi râ nghut lhê.
12 Yhang gi, náng é myhang é gingtíng wàhkûm pé lé,
nyhum é jang má hpyoq hkyó mù,
myigùng jé shoq hpyoq hpyî luî,
hpuílhup yô má lhoqhkyô hkyop to râ nghut lhê.