Hkya-on Kúngton É Mahkôn
26
Haú buìnyì má, a-ô mâ é mahkôn lé, Yudaq mau má hkôn kôrâ nghut lhê.Ngá-mòq gi, gingtîng é wà mó wó lhê;
Garai Gasang gi, hkyi yù hkyô lé,
wà hau é wàhkûm eq mâchya kut râ nghut lhê.
2 Haû jujúm myìt bò luî,
díngmán é a-myû wó wâng sháng gàq,
wà hkum pé lé hpông to keq.
3 Haû myìt jujúm nyî sû gi,
Nang lé lùmhkau nyi é yánmai,
Nàng gi, yhang lé gúmjùp é nguì ngón hkyô byi râ nghut lhê.
4 Haû Yhûmsîng Garai lé pyàt dedu lùmhkau nyì àq;
hkâsu mù gâ le, haû Yhûmsîng Garai, Yhûmsîng Garai gi, ahtum abyùq é Lungmó Zîng nghut ri.
5 Yhang gi, myhang é jang má nyi é bang lé lhoqhkyô pyám mù,
myhang é wà mó lé lhoqnyhum pyâm ri;
Yhang gi, haú lé, myigùng jé shoq hpyoq hpyi hkyó luî,
hpuílhup yô má lhoqhkyô hkyop tô ri.
6 Byu é hkyi èq haú lé nâng pyeq pyâm ri;
haû gi, zìk zo hui bâng é hkyi èq le,
asho awui dùt bâng é hkyîbye èq le, nâng pyeq pyâm é nghut ri.
7 Haû díngmán bâng é hkyô gi, nyang ri;
Myìt díng Sû ê, Nàng gi, díngmán bâng é hkyô lé lhoqrhá byî ri.
8 Yhûmsîng Garai ê, ngá-mòq gi, Náng é târâ pé lé cháng luî,
Nang lé láng nyi lhê;
ngá-mòq é i-myìt nhiklhum gi,
Náng é myìng eq hû nyi é Náng é myìng lé, myìt tuî nyi ri.
9 Ngá é i-myìt sô gi, myín lé, Nang lé myìt tuî nyi ri;
ngá é sô gi, nàpsûn lé, Nang lé ho nyi ri.
Hkâsu mù gâ le, myìdàm htoq má Nàng târâ jéyáng é hkûn,
mingkan htoq mâ é byu pé gi, díngmán hkyô lé mhoq yu akô nghut ri.
10 Haû agè ashop é bang gi, jeju lé myang hkam yù kôle,
díngmán hkyô lé a mhoq yû kó nghut ri;
yhángmòq gi, i-myìt díng é mau má lháng agè ashop hkyô kut kômù,
haû Yhûmsîng Garaî é kô làm hkyô lé haî su a ngàm kut akô nghut ri.
11 Yhûmsîng Garai ê, Náng é lòq tu myhang to kôlhang,
yhángmòq gi, haú lé a myàng kó nghut ri.
Nàng, Náng é byu pé lé myìt zìng zùq é hkyô lé, yhángmòq myàng mù, hoq hpu kó sháng gàq;
Náng é gye pé gi, myî èq nyhê hkyô é hui kó sháng gàq.
12 Yhûmsîng Garai ê, Nàng gi, ngá-mòq lé, nguì ngón hkyô masàt byi bê nghut ri;
ngá-mòq wó lhoqpân é múzó bànshoq gi, ngá-mòq é matú, Nàng kut byî é nghut ri.
13 Ngá-mòq é Garai Gasang nghut é, Yhûmsîng Garai ê, Nàng mai lai luî, gótû yhûmsing pé le, ngá-mòq lé up bekô nghut ri;
nghut kôlhang, ngá-mòq gi, Náng é myìng lé za hkunggâ lhê.
14 Yhángmòq shi byùq bekô; yhángmòq dum duì râ a nghut lo;
gâng ló byùq bê sô haú bang dum dui toq râ a nghut lo.
Nàng gi, yhángmòq lé dam byi luî, yhángmòq lé lhoqhten lhoqhpyoq pyám bê nghut ri;
Nàng gi, yhángmòq lé myìtbun râ myìng bànshoq lé bùt sut pyám byi bê nghut ri.
15 Yhûmsîng Garai ê, Nàng gi, ngá-mòq a-myû shî lé lhoqmyo byi bê nghut ri;
Nàng gi, ngá-mòq a-myû shî lé lhoqmyo byi bê nghut ri.
Nàng gi, Náng é matú hpungwup shingkang wó yû bê nghut ri;
Nàng gi, maumyî shi é maukyo bànshoq lé lhoqjàt yù bê nghut ri.
16 Yhûmsîng Garai ê, yhángmòq gi, myìt myo ûng wom jáng, Náng chyáng lé bekô nghut ri;
Nàng, yhángmòq lé mhoqshit é hkûn,
yhángmòq gi, myìt nò-kying kyîng é mai kyûdung bekô nghut ri.
17 Yhûmsîng Garai ê, zogûng wun é myiwe gi, zo hkû berâ nghut mù,
zo hkû nò nò luî, kyek garû ngau é su,
ngá-mòq le, Náng é hí má dùt nyi é nghut lhê.
18 Ngá-mòq gi, zogûng wùn luî, zo hkû nò nò kôlhang,
laì lé za hku kat bê nghut lhê.
Ngá-mòq gi, myìdàm htoq má hkyi yu é hkyô haî a wó kut nghut ri;
ngá-mòq gi, mingkan htoq mâ é byu pê é matú haî a wó kut byi nghut ri.
19 Nghut kôlhang, Náng é shi byùq bê bang gi, dum dui toq kôrâ nghut lhê;
yhángmòq é gùngsôm pé dum dui toq râ nghut lhê.
Hpuílhup yô má nyi nyi é bang ê,
bûn gying mù, gabú garu keq.
Hkâsu mù gâ le, náng chyáng gyó é nghân gi,
nàpsun lhê é nghân su nghut nyi ri;
myìdàm htoq gi, yhâng chyáng shi byùq é bang lé dum lhoqhtoq byi râ nghut lhê.
20 Ngá é byu pé ê, núngmòq é wàp má wàng ló mù,
hkum pé myhî pyám keq;
Yhâng é nhikmó-yo hkyô laî ló byùq é hkyíng jé shoq,
razùp zo byam haq nyî keq.
21 Wú keq, haû Yhûmsîng Garai gi, myìdàm htoq mâ é byu pê é marâ é yánmai,
yhángmòq lé dam byi râ matú, Yhâng é nyì jang mai htoq lé lô bê nghut ri.
Haû myìdàm gi, yhâng chyáng shun é sui pé lé lhoqhtoq shit râ nghut lhê;
yhang gi, yhâng chyáng sat huî é bang lé nghop to râ a nghut lo.